Uyghur pa'aliyetchiler: "Ilham toxti mesilisini dawamliq tekitlesh Uyghurlarning nöwettiki weziyitining teqezzasi"

Muxbirimiz méhriban
2020-04-29
Élxet
Pikir
Share
Print
Ilham toxtigha "Waslow xawél kishilik hoquq mukapati" bérildi. Mukapatni "Ilham toxti guruppisi" ning bashliqi enwejan tapshurup aldi. 2019-Yili 30-séntebir.
Ilham toxtigha "Waslow xawél kishilik hoquq mukapati" bérildi. Mukapatni "Ilham toxti guruppisi" ning bashliqi enwejan tapshurup aldi. 2019-Yili 30-séntebir.
Enwerjan teminligen

2016-Yili 6-ayda gérmaniyede tizimgha aldurulghan "Ilham toxti guruppisi" 28-aprél bayanat élan qilip, mezkur guruppining kéngeytilip "Ilham toxti instituti" gha özgertilgenlikini élan qildi.

Yéngidin özgertip qurulghan "Ilham toxti instituti" ning re'islik wezipisini üstige alghan enwer jan ependini bu munasiwet bilen ziyaritimizni qobul qildi.

Enwer jan ependi aldi bilen bizning "'ilham toxti instituti' ilham toxti mesilisi we Uyghurlarning weziyiti heqqide némilerni otturigha qoymaqchi?" dégen so'alimizgha jawab bérip: "Ilham toxti guruppisi" ning "Ilham toxti instituti" gha kéngeytilip qurulushining sewebi, meqsiti we bundin kéyinki pilanlirini tonushturup ötti.

Enwer jan ependi institut tor békitidiki ilham toxtining Uyghurlarning qanuniy heqlirini telep qilish mezmun qilin'ghan sözliri heqqide toxtilip, ilham toxti idiyesige tarixiy shert-shara'it nuqtisidin qarash kéreklikini bildürdi.

U xitayning yüriki bolghan béyjingda turup, Uyghurlarning xitaydiki qanuniy heq-hoquqlirini telep qilghan ilham toxtidek bir mötidil Uyghur ziyaliysining eng axirida xitay hökümiti teripidin tutqun qilinip muddetsiz qamaqqa höküm qilinishtek bir aqiwetke qalghanliqini tekitlep ötti. Enwer jan yene ilham toxti mesilisini dunyagha dawamliq anglitishning xitay hökümitining Uyghurlar üchün sözligen herqandaq bir awazni qobul qilmaydighanliqidek bir réyalliqni ispatlap bergenlikini bildürdi.

Enwer jan ependi yene 3 milyondek Uyghur lagérgha qamalghan, xitay hökümiti Uyghurlarni pütkül millet boyiche düshmen körüp basturush nishanigha aylandurghan bügünkidek bir shara'itta Uyghurlarning xitay bilen yene bille yashash mumkinchilikining qalmighanliqini tekitlidi.

Amérikadiki Uyghur pa'aliyetchi ilshat hesen ependi ilham toxti we u qurghan "Uyghurbiz" torini yéqindin bilidighan ziyaliylarning biri. U ilgiri ilham toxti teripidin qurulghan "Uyghurbiz" torida "Bürküt" texellusi bilen xitayning Uyghur siyasitidiki tengsizlikler heqqide xitay tilida obzor maqalilirini élan qilghan.

Ilshat hesen ependimu 29-aprél küni radiyomiz ziyaritini qobul qilip, aldi bilen "Ilham toxti guruppisi" ning "Ilham toxti instituti" gha kéngeytilip qurulghanliqini tebriklidi. U bu institutning ilham toxtini dunyagha tonutush we xitayning Uyghurlargha qaratqan basturush siyasitini dunyagha téximu ashkarilashta muhim ehmiyetke ige ikenlikini bildürdi.

Ilshat hesen ependi eyni chaghda ilham toxtining "Uyghurbiz" torida we öz nutuqlirida otturigha qoyghan Uyghurlarning qanuniy heqlirining kapaletke ige qilinishidek eng töwen telepler sewebidin muddetsiz qamaqqa höküm qilin'ghanliqini bayan qildi. U ilham toxtining xitay hökümitining siyasitini aktipliq bilen ijra qilghan nur bekridek Uyghur emeldarlirigha sélishturghanda uning "Uyghur xelqi üchün hemmini pida qilghan bir qehriman" ikenlikini tekitlidi.

Ilshat hesen ependi yene bizning "Eger xitay hökümiti ilham tohti otturigha qoyghan teleplirini qobul qilip uni qoyuwetse, sizningche bügünki künde Uyghur xelqi xitay bilen yene normal yashap kételishi mumkinmu?" dégen so'alimizgha jawab bérip: "3 Milyondek Uyghur xitay da'iriliri teripidin lagérgha qamalghan, Uyghurlarning tili, medeniyiti pütünley weyran qilin'ghan, Uyghurlar erzan emgek küchige aylandurulghan mushundaq pewqul'adde tarixiy shara'itta Uyghurlarning xitay hökümitidin herqandaq shekilde ümid kütüshining imkani qalmighanliqini tekitlidi.

Yuqiriqi awaz ulinishidin söhbetning tepsilatini anglighaysiler.

Toluq bet