“илшат” фонди қирғизистандики сахавәтлик паалийәтлирини давамлаштурмақта

Ихтиярий мухбиримиз ферузә
2020.12.29
Share on WhatsApp
Share on WhatsApp
“илшат” фонди қирғизистандики сахавәтлик паалийәтлирини давамлаштурмақта Илшат фонди совғат қилған җиддий ярдәм машиниси бири. 2020-Йили декабир, қирғизистан.
RFA/Féruze

2009-Йили қирғизистандики бир қисим уйғур тиҗарәтчилири тәрипидин асас селинған “илшат” фонди ярдәмгә моһтаҗ аилиләргә давамлиқ ярдәм қолини сунуп кәлмәктә. “илшат” фонди йәнә бир хәйр-сахавәт оргини болуш сүпити билән дөләт дәриҗилик чоң лайиһәләрни әмәлгә ашуруп кәлмәктә. “илшат” фонди йол ясаш вә ремонт қилиш, давалаш мәркәзлирини қуруш, мәсчитләрни селиш ишлири биләнму шоғулланмақта. Бу йил “илшат” фонди қирғизистан һөкүмитигә 5 данә җиддий қутқузуш машиниси вә йүздин ошуқ нәпәслинишкә ярдәм қилиш аппарати совғат қилди. Бу йил ахирида пәрзәнтлири көп, қийинчилиқи бар сәһийә саһасидики бир сестраға йеңи өй селип бәрди.

“илшат” фондиниң вәкили әзиз әпәнди өй тапшурмақта. 2020-Йили декабир, қирғизистан.

2020-Йилиниң башлирида хитайниң вухән шәһиридин тарқалған корона вируси юқуми қирғизистанға қаттиқ ямрап кетип, сәһийә системиси бу юқумниң мәмликәткә ямарап кетишиниң алдини алалмиди. Дора-дәрмәкләр қис болуп, шипахана, дохтур вә сестралар йетишмигән бир әһвалда “илшат” фонди оттуриға чиқип, бир қисим ширкәтләр бирликтә корона вирусиниң алдини елиш вә давалаш ишлириға ярдәм бериш паалийәтлирини елип барди.

Ашу җиддий пәйттә уйғурлар көп санда яшавтқан “восток” йезисидиму вирус қаттиқ ямрап кетип, бәзи бимарлар бақи дуняға сәпәр қилишти, йәнә бәзилири бу кисәлни йеңип сақайди. “восток” йезисиниң шипаханисида хизмәт көрсәткән сестра толқунай рәхмәтова корона вируси юқумиға қарши турушта пидакарлик билән ишлигән иди, лекин шу пәйттә у өз йолдишдин айрилип, төт балиси билән қийин әһвалда яшашқа мәҗбур болған иди.

“восток” йезисиниң төмүр кәпидә яшаватқан төт балилиқ сестраси тоғрисида бир қанчә телевизийә програмлири көрситилгәндин кейин, “илшат” фонди мәзкур сестраға йеңи өй селип беришни қарар қилған иди. Декабир ейиниң ахирлирида толқунай төт балиси билән төмүр кәпидин йеңи өйгә көчүп чиқти. Йеңи өйгә көчүп кириш паалийити “восток” йезисиниң турғунлири үчүн бир байрамға айланди.

“восток” йезисиниң йигит беши абдуҗелил узақоф радийомиз зияритини қобул қилип, уларниң мәһәллисидә уйғур, қирғиз, татар вә башқа милләтләр өмлүктә яшайдиғанлиқини, мәһәллә җамаитиниң қирғиз қериндишиға өй қуруп бериш ишини “илшат” фондиға мураҗиәт қилғанлиқини билдүрди.

Игилинишичә, “илшат” фондиниң тәшкиллигүчилири русийәдә тиришчанлиқ билән ишләватқан тиҗарәтчи әнвәр мәһәмәтоф вә униң уруқ-туғқанлири икән. Мәзкур фонди җәмийәтниң нами әнвәр әпәндиниң мәрһум дадисиниң исмиға беғишланған икән. 2009-Йили “восток” йезисида “илшат” мәсчити қурулған болуп, шу вақиттин тартип улар хәйр-сахавәт паалийәтлирини башлашқан икән.

“илшат” фондиниң вәкили әзиз әпәнди зияритимизни қобул қилип, фонд башқурғучилири “восток” йезисида туғулуп чоң болғачқа, бу йезиниң турғунлириға алаһидә көңүл бөлүватқанлиғини тәкитләп өтти. У мундақ деди: “фонд башқурғучилири өзлири ‛восток‚ йезисида чоң болған, шуниң үчүн бу йезидики чоң биналар, мәсилән, сақчи тармақ бинаси, җиддий қутқузуш пункти, мәсчит-мәдрәсә қатарлиқ қурулушларниң һәммиси ‛илшат‚ фонди тәрипидин қурулған. Биз һәр хил байрамларда турмуши начар болған аилиләргә давамлиқ ярдәм берип кәлмәктимиз. Фондимиз бу йезини һәр даим назарәт қилип туриду. Бу йезидики бир сестраниң тул болуп төт балиси билән төмүр кәпидә яшаватқанлиғини аңлап, фондимиз дәрһал униңға өй қуруп беришни қарар қилди.”

Әзиз әпәнди йәнә “илшат” фондиниң кәлгүсидики пиланлири һәққидә биз билән ортақлашти: “йеқинда биз ‛восток‚ йезисида бир тәнһәрикәт мәркизи қурмақчимиз, һазирчә биз һөкүмәт билән йәр тәқсимләш үстидә сөһбәт йүргүзиватимиз. Бу илтимас һәл болуши билән биз мәзкур мәркәзниң қурулушини башлаймиз.”

Мәлум болушичә, “илшат” фонди қирғизистан бойичә мейипләр мәркәзлири билән вә йетим балилар өйлиригә давамлиқ ярдәм көрсәтмәктикин. Мәзкур фонд тәрипидин қирғизистанда қурулған мәсчитләрму уларниң назаритидә җамаәт тәрипидин ишлитилмәктикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.