"Ilshat" fondi qirghizistandiki saxawetlik pa'aliyetlirini dawamlashturmaqta

Ixtiyariy muxbirimiz féruze
2020-12-29
Share
Ilshat fondi sowghat qilghan jiddiy yardem mashinisi biri. 2020-Yili dékabir, qirghizistan.
RFA/Féruze

2009-Yili qirghizistandiki bir qisim Uyghur tijaretchiliri teripidin asas sélin'ghan "Ilshat" fondi yardemge mohtaj a'ililerge dawamliq yardem qolini sunup kelmekte. "Ilshat" fondi yene bir xeyr-saxawet orgini bolush süpiti bilen dölet derijilik chong layihelerni emelge ashurup kelmekte. "Ilshat" fondi yol yasash we rémont qilish, dawalash merkezlirini qurush, meschitlerni sélish ishliri bilenmu shoghullanmaqta. Bu yil "Ilshat" fondi qirghizistan hökümitige 5 dane jiddiy qutquzush mashinisi we yüzdin oshuq nepeslinishke yardem qilish apparati sowghat qildi. Bu yil axirida perzentliri köp, qiyinchiliqi bar sehiye sahasidiki bir séstragha yéngi öy sélip berdi.

2020-Yilining bashlirida xitayning wuxen shehiridin tarqalghan korona wirusi yuqumi qirghizistan'gha qattiq yamrap kétip, sehiye sistémisi bu yuqumning memliketke yamarap kétishining aldini alalmidi. Dora-dermekler qis bolup, shipaxana, doxtur we séstralar yétishmigen bir ehwalda "Ilshat" fondi otturigha chiqip, bir qisim shirketler birlikte korona wirusining aldini élish we dawalash ishlirigha yardem bérish pa'aliyetlirini élip bardi.

Ashu jiddiy peytte Uyghurlar köp sanda yashawtqan "Wostok" yézisidimu wirus qattiq yamrap kétip, bezi bimarlar baqi dunyagha seper qilishti, yene beziliri bu kiselni yéngip saqaydi. "Wostok" yézisining shipaxanisida xizmet körsetken séstra tolqun'ay rexmetowa korona wirusi yuqumigha qarshi turushta pidakarlik bilen ishligen idi, lékin shu peytte u öz yoldishdin ayrilip, töt balisi bilen qiyin ehwalda yashashqa mejbur bolghan idi.

"Wostok" yézisining tömür kepide yashawatqan töt baliliq séstrasi toghrisida bir qanche téléwiziye programliri körsitilgendin kéyin, "Ilshat" fondi mezkur séstragha yéngi öy sélip bérishni qarar qilghan idi. Dékabir éyining axirlirida tolqun'ay töt balisi bilen tömür kepidin yéngi öyge köchüp chiqti. Yéngi öyge köchüp kirish pa'aliyiti "Wostok" yézisining turghunliri üchün bir bayramgha aylandi.

"Wostok" yézisining yigit béshi abdujélil uzaqof radiyomiz ziyaritini qobul qilip, ularning mehelliside Uyghur, qirghiz, tatar we bashqa milletler ömlükte yashaydighanliqini, mehelle jama'itining qirghiz qérindishigha öy qurup bérish ishini "Ilshat" fondigha muraji'et qilghanliqini bildürdi.

Igilinishiche, "Ilshat" fondining teshkilligüchiliri rusiyede tirishchanliq bilen ishlewatqan tijaretchi enwer mehemetof we uning uruq-tughqanliri iken. Mezkur fondi jem'iyetning nami enwer ependining merhum dadisining ismigha béghishlan'ghan iken. 2009-Yili "Wostok" yézisida "Ilshat" meschiti qurulghan bolup, shu waqittin tartip ular xeyr-saxawet pa'aliyetlirini bashlashqan iken.

"Ilshat" fondining wekili eziz ependi ziyaritimizni qobul qilip, fond bashqurghuchiliri "Wostok" yézisida tughulup chong bolghachqa, bu yézining turghunlirigha alahide köngül bölüwatqanlighini tekitlep ötti. U mundaq dédi: "Fond bashqurghuchiliri özliri 'wostok' yézisida chong bolghan, shuning üchün bu yézidiki chong binalar, mesilen, saqchi tarmaq binasi, jiddiy qutquzush punkti, meschit-medrese qatarliq qurulushlarning hemmisi 'ilshat' fondi teripidin qurulghan. Biz her xil bayramlarda turmushi nachar bolghan a'ililerge dawamliq yardem bérip kelmektimiz. Fondimiz bu yézini her da'im nazaret qilip turidu. Bu yézidiki bir séstraning tul bolup töt balisi bilen tömür kepide yashawatqanlighini anglap, fondimiz derhal uninggha öy qurup bérishni qarar qildi."

Eziz ependi yene "Ilshat" fondining kelgüsidiki pilanliri heqqide biz bilen ortaqlashti: "Yéqinda biz 'wostok' yézisida bir tenheriket merkizi qurmaqchimiz, hazirche biz hökümet bilen yer teqsimlesh üstide söhbet yürgüziwatimiz. Bu iltimas hel bolushi bilen biz mezkur merkezning qurulushini bashlaymiz."

Melum bolushiche, "Ilshat" fondi qirghizistan boyiche méyipler merkezliri bilen we yétim balilar öylirige dawamliq yardem körsetmektikin. Mezkur fond teripidin qirghizistanda qurulghan meschitlermu ularning nazaritide jama'et teripidin ishlitilmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet