Илшат һәсән: "тутқундики сиңиллиримниң лагердики әһвалини мухбирниң хәвиридин билдим"

Мухбиримиз меһрибан
2021-04-14
Share
Илшат һәсән: Уйғур паалийәтчиси, д у қ ниң хитай ишлири мудири илшат һәсән әпәндиниң үч сиңлиси. (Солдин оңға: зулпийә, 2017-йили тутқун қилинған, илнур, 2014-йили тутқун қилинған вә үнзирә, әһвали ениқ әмәс.)
Ilshat Hesen teminligen

Хитайниң уйғур дияридики лагерларда йүз бериватқан қийин-қистақлар вә чәтәлләрдики уйғурларниң тутқундики туғқанлириниң әһваллири лагерлардин қутулуп чиққан шаһитларниң гуваһлиқ бериши билән америка вә явропа дөләтлиридики хәлқара таратқуларда көпләп ашкариланмақта.

Өткән һәптә америкадики "ню-йорклуқлар" журнилида елан қилинған "шинҗаңдики зәрбидин қутулуш" намлиқ зиярәт хатирисидә, хитайниң уйғур дияридики биңтуәнгә қарашлиқ күйтун шәһиридики җаза лагеридин қутулуп чиққан анар сабит исимлик бир қазақ қизиниң гуваһлиқ баянлири берилди.

Икки саәттин артуқ давамлашқан зиярәт хатирисидә баян қилинишичә, лагерда көргән әһваллар вә у йәрдики тутқунлар һәққидә гуваһлиқ бәргән қазақ қизи анар сабит, баянида йәнә америкадики уйғур паалийәтчилиридин дуня уйғур қурултийиниң хитай ишлири мудири илшат һәсән әпәндиниң күйтундики лагерға қамалған икки сиңлиси һәққидиму өзи билгән әһвалларни аңлатқан.

Илшат һәсән әпәндиниң бүгүн радийомизға билдүрүшичә, у мәзкур хәвәрдин, униң 2014-йили тутқун қилинған чоң сиңлиси елнур вә 2016-йили ахиридин буян алақиси үзүлүп қалған иккинчи сиңлиси зулпийә, униң ери алимҗан вә чоң қизи зумурай қатарлиқларниң аилә бойичә күйтун лагериға қамалғанлиқидин хәвәр тапқан.

Илшат һәсән әпәнди күйтун төмүрйол дохтурханисида сестралиқ хизмитини ишләйдиған чоң сиңлиси елнур һәсәнниң өзиниң америкадики паалийәтлири сәвәблик 2014-йили 8-айниң 15-күни тутқун қилинғанлиқини билдүрди.

Илшат һәсән әпәнди әйни чағда бу әһвални әркин асия радийоси қатарлиқ бирқанчә таратқулар зияритини қобул қилғанда ашкарилиғаниди.

Илшат һәсән әпәндиниң билдүрүшичә, чоң сиңлиси тутқун қилинғандин кейин, йәни 2016-йили 8-ай мәзгилидә аписи билән телефонда ахирқи қетим көрүшкәндин кейин, аилә әзалири билән болған алақиси пүтүнләй үзүлгән.

Униң билдүрүшичә, шуңа у иккинчи сиңлиси зулпийә қатарлиқларниң 2017-йили тутқун қилинғанлиқи һәққидики учурни, аридин 4 йил өткәндин кейин "ню-йорклуқлар" журнилида елан қилинған "шинҗаңдики зәрбидин қутулуш" намлиқ зиярәт хатирисидин билгәникән.

Илшат һәсән әпәнди йәнә "ню-йорклуқлар" журнилида елан қилинған зиярәт хатирисидин өзи сәвәблик сиңиллириниң күйтун лагерида тәһдиткә учраш, қийин-қистаққа елиниш, иккинчи сиңлиси зулпийәниң қийин-қистақ сәвәбидин һошидин кетиш, чоң сиңлиси елнурниң лагердин бирқанчә ай ғайиб қилинғандин кейин еғир роһий зәрбигә учраштәк әһвалларни билгәнликини ейтти.

У йәнә, мәйли чәтәлләрдә паалийәт қиливатқан уйғурлар болсун, яки өзиниң нормал оқуш хизмәт һаятини давамлаштуруватқан уйғурлар болсун, уларниң вәтәндики уруқ-туғқанлириниң хитай даирилири тәрипидин һәр хил тәһдит, һәтта қанунсиз тутқун қилиниш қисмәтлиригә учраватқанлиқини тәкитлиди. Униң билдүрүшичә хитай һөкүмити муһаҗирәттики уйғурларниң вәтәндики уруқ-туғқанлириға зәрбә бериш арқилиқ уйғурларға қаритилған роһи җәһәттики бесимниму һәссиләп күчәйтмәктикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт