Үрүмчи даирилириниң чәклимиси сәвәблик гөш баһаси йәниму өрлиши мумкин

Үрүмчидин чиқидиған гезитләргә 11-май күни, үрүмчи шәһәрлик һөкүмәтниң “үрүмчи шәһәр миқясида өз мәйличә, чарва-мал вә өй қушлирини қалаймиқан боғузлаш қилмишини чәкләш тоғрисидики уқтуруши” чапланди.

Мәзкур уқтурушқа қариғанда, буниңдин кейин иҗазәт алмай туруп, орунлар вә шәхсләр нәқ мәйданда боғузлап сетишни өз ичигә алған мал боғузлаш паалийити билән шуғуллинишқа болмайдикән, даириләр пүтүн шәһәр миқясида шәхсләрниң өй һайванлири, өй қушлирини боғузлашта, бәлгиләнгән нуқтиларда боғузлаш бәлгилимисини қаттиқ иҗра қилидикән. Хитай даирилириниң мәзкур чарини йолға қоюшидики сәвәб немә ? буниң мусулман истемалчилар вә қассаплиқ кәспи билән шуғуллиниватқанларға қандақ тәсир елип кәлмәктә ? мәзкур мәсилиләр һәққидә мухбиримиз гүлчеһрә игилигән мәлуматлар диққитиңларда болсун.

Йеқиндин буян, өй қушлирида қуш зукими тарилиши, кала вә башқа чарва малларда ақсил кесили, еғиз-туяқ яллуғи кесәлликлири тарқилиши шундақла базарда сахта зәһәрлик гөшләрниң тарқилиши билән хитай даирилири йемәклик бихәтәрликидә бир қатар җиддий вә қаттиқ чариләрни қоллинишқа мәҗбур болди. Йеқинда үрүмчи шәһәрлик һөкүмәтму чарва вә өй қушлирини өз алдиға боғузлашни чәкләш тоғрисида мәхсус бәлгилимә йолға қоюшқа башлиған.

Мәркизи шәһәр гезитиниң 11-май санида буниңға даир бесилған һөкүмәт уқтурушида, үрүмчидә чарва вә өй қушлирини өз мәйличә боғузлаш қилмиши қаттиқ чәкләнгәндин сирт, шәһәр башқуруш тармақлириниң иҗазитини алмай туруп үрүмчи шәһиридә өй қушлири вә чарва беқишқа болмайдикән.

Даириләр буниңдин кейин бәлгиләнгән нуқтиларда боғузлаш бәлгилимисини қаттиқ иҗра қилидиған болуп, һәтта мусулманларниң қанунда бәлгиләнгән байрими йәни роза һейт вә қурбан һейт мәзгилидиму хитай һөкүмәт даирилири нуқта қилип бәлгилигән сорунларда мал боғузлашқа болидикән. Даириләр бәлгилимини қаттиқ иҗра қилидиғанлиқини агаһландурған болуп, мәзкур бәлгилимигә хилаплиқ қилғучиларни паш қилиш телефон номурлириниму елан қилған.

Биз уқтурушқа чапланған бу әһвал мәлум қилиш телефонидин биригә телефон қилдуқ, әмма мәсул хадим, бу бәлгилимини чиқириштики сәвәбни чүшәндүрүшни рәт қилди.

Үрүмчидики мәлум һалал өй қушлири дукининиң хоҗайини, йеқиндин буян тоху қатарлиқ өй қушлирида қуш зукам байқилип мал баһаси өрлигәндин сирт, базарниң азлап қалғанлиқини, дуканниң зиянға меңиватқанлиқини вә бу уқтуруштин кейин базарниң йәниму касатлишидиғанлиқидин әндишә қиливатқанлиқини билдүрди.

Үрүмчидики һөкүмәт тәрипидин ечилған мусулманлар қушханисида гөш тиҗарити билән шуғуллиниватқан бир уйғур, даириләрниң бу уқтурушни чиқиришиға йеқиндин буян чарва малларда вә өй қушлирида кесәл тарқалғанлиқини сәвәб қилип көрсәткәнликини, йәнә бир тәрәптин базардики өз алдиға боғузлап сетиватқан гөшләрниң даириләрниң тәкшүрүшидин өтмигәнлики, баҗ төләнмигәнлики үчүн бихәтәрликигә капаләтлик қилиш тәсликини билдүрди.

Бу тиҗарәтчи гәрчә бу хил чәкләш зөрүр болғандиму, бир тәрәптин гөш баһасиниң өрлишигә сәвәб болса, йәнә бир тәрәптин пәқәт қассаплиқ қилип җан беқиватқан нурғун уйғурларға тәс болидиғанлиқини билдүрди.

Үрүмчи даирилириниң алақидар уқтурушида йәнә, аһалиләргә “өзини қоғдаш иқтидарини өстүрүп, йемәклик бихәтәрлики еңини күчәйтип, бәлгиси мукәммәл болмиған гөш мәһсулатлирини сетивалмаслиқ, ишләтмәслик керәк” дәп әскәрткән. Әмма үрүмчидики уйғур аһалилиридин игилишимизгә қариғанда, нөвәттә гөш базирида нурғун охшимайдиған сүпәттики гөш мәһсулатлири болуп, уйғурлар йәнила базарда қассаплар өзи боғузлиған малларға бәкрәк ишәнч қилидикән.

Зияритимизни қобул қилған гөш мәһсулатлири тиҗарәтчисиму, даириләрниң бу хил чәкләш биләнла һазирқи үрүмчи гөш мәһсулатлири базиридики қалаймиқанчилиқни түзитип болалмайдиғанлиқини, һөкүмәт истемалчиларниң мәнпәитини ойлиған болса, муһими гөш базиридики уйғур елиниң сиртидин келиватқан бихәтәрликигә капаләтлик қилишму тәс болған гөш мәһсулатлирини башқурушни күчәйтишниң зөрүр икәнликини оттуриға қойди.