Сәми нияз акиниң йерини җүнкун ширкити мәҗбурий тартивалғандин кейинки еғир қисмәтләр

Мухбиримиз қутлан
2013.12.02
Share on WhatsApp
Share on WhatsApp
baykol-dehqan-yer-qoghdash.jpg Байкөлдә етиз бешида йерини қоғдап ятқан деһқан турсун турған. 2013-Йили июн. Ғулҗа.
RFA

Атуш шәһириниң шоруқ кәнтидә олтурушлуқ сәми нияз ака йәрдин ибарәт алтун қозуқидин айрилғандин кейин еғир қисмәтләргә дуч кәлди.

Терилғу йәр вә қору-җайлири қошулуп 25 мо келидиған йәр-мүлүк аран 8 мо һесаблинип төвән баһада мәҗбурий тартивелинған. Илгири ата-бовилиридин мирас қалған бағ-варанлиқ чоң өйләрдә яшап кәлгән сәми нияз акиниң аилиси аран 40 квадрат метир келидиған төвән иҗарилик өйгә көчүп киришкә мәҗбур болған. Йеридин айрилиши биләнла уларниң пүткүл һаяти өзгәргән. Нәччә йиллардин буян атуш шәһәрлик һөкүмәттин тартип таки аптоном район вә мәркәзгичә болған әрз-дәвадин һечқандақ нәтиҗә чиқмиған.

Сәми нияз ака радиомиз зияритини қобул қилип нөвәттә өзиниң интайин қийин һаләттә туруватқанлиқини, қолида йәр хети вә башқа барлиқ дәлил һөҗҗәтлири бар турупму дәвасини һеч йәргә аңлиталмиғанлиқини баян қилди. Униң дейишичә, 2010-йили у йәрлик даириләрниң йәр сетиш қәғизигә имза қоюшни рәт қилғанлиқи үчүн 10 күн қамап қоюлған. У қамақтин бошап чиққучә хитайниң өй-мүлүк ширкити тракторлар билән келип униң қору-җайлирини түртүп түзливәткән вә қурулуш башлиған. Шуниңдин башлап униң аилиси өй-макансиз қалған. Сәми нияз акиниң йәрдин айрилған балилири қәшқәр шәһиригә кирип таксичилиқ вә киракәшлик қилип җан беқишқа мәҗбур болған.

Сәми нияз ака зияритимиз җәрянида бу дәвадин һәргиз ваз кәчмәйдиғанлиқини, таки гепини аңлайдиған бир адәм чиққучә давамлаштуридиғанлиқини билдүрди. У йәнә “мумкин болса бу әһвални әркин асия радиоси арқилиқ пүтүн дуняға аңлитишни халайдиғанлиқи, қолида барлиқ дәлил-испатлар толуқ туруп увалчилиққа қалғанлиқидәк бу реаллиқни дуня хәлқиму билсә дәп арзу қилидиғанлиқи” ни баян қилди.

Мәлум болушичә, сәми нияз акиниң бу қисмити әмәлийәттә уйғур елидики йеридин айрилип қеливатқан миңлиған уйғур деһқанлириниң пәқәт бири икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.