Qaramaydiki meschitlerge qaritilghan teqiblesh kücheygenliki melum
2015.12.22

Igiligen uchurlirimizgha qarighanda, da'iriler nöwette qaramaydiki meschitlerge qaritilghan teqibleshni kücheytken bolup, bu xildiki teqibleshler meschitlerning iqtisadiy menbesini kontrol qilish bilenla cheklinip qalmighan.
Qaramaydiki diniy zatlarning éytishiche, meschitlerdiki teblighlermu xitay qanuni boyiche élip bérilidighandin sirt, yéqinqi yillardin buyan meschitlerdimu siyasiy öginish yolgha qoyulghan. Ular munasiwetlik da'irilerning orunlashturushi boyiche, her heptide bir nechche sa'et, qanun we aptonom rayonning höjjetliri qatarliqlarni öginidiken.
Biz qaramay shehiridin ehwal igilesh jeryanida, yerlik da'irilerning qaramay shehirige qarashliq 9 meschitning ijare dukanlirining pulini, sediqe-zakat, ikki héyt namizida chüshken iqtisadini, qaramay sheherlik islam dini jem'iyitining qarmiqidiki “Maliye ishxanisi” bir tutash bashquruwatqanliqi, ularning ishxanisi qaramay sheherlik shimaliy qurulush meschitining ijare öyide tesis qilin'ghanliqi, qaramay shehiridiki meschitler kirgen kirimlirini waqtida maliye ishxanisigha tapshuridighanliqi, chiqim qilmaqchi bolsa, qaramay rayonluq diniy ishlar idarisige iltimas yézip testiqlighandin kéyin, andin pulini maliye ishxanisidin alalaydighanliqi qatarliqlardin xewer taptuq.
Qaramay sheherlik algha yoli mehellisi meschiti “1-Zawut meschiti” idare hey'etler guruppa bashliqidin ehwal igilesh jeryanida, u, da'irilerning orunlashturuwatqan öginishliri we meschitning iqtisadi ehwali heqqide sorighan so'allirimizgha qarita jawab bérip mundaq dédi: “ Qaramay rayonluq diniy ishlar idarisining orunlashturushida ayda nechche qétim siyasiy öginish élip bériwatimiz. Merkezning diniy siyasetlirini oqup bériwatidu, uni muzakire qiliwatimiz.”
Biz meschit iqtisadini qaysi orun we kimlerning bashquruwatqanliqi heqqide tepsiliy melumat élish üchün, qaramay sheherlik shimaliy qurulush meschiti imami haji ekberdin bu ehwallarni sorighinimizda, u, meschitlerning iqtisadini qaramay sheherlik islam dini jem'iyitining qarmiqidiki “Maliye ishxanisi” bir tutash bashquruwatqanliqini bildürdi.