Türkiyede "Uyghur qaraxanli" markiliq qoghun bazargha sélindi

Ixtiyariy muxbirimiz arslan
2015-08-27
Share
Uyghur-qaraxanli-qoghun-turkiye-1.jpg Abdullah isimlik bir Uyghur bashchiliqidiki bir guruppa Uyghurlar yétishtürgen "Uyghur qaraxanli" markiliq qoghun bazargha toshulmaqta. 2015-Yili awghust, türkiye.
RFA/Arslan

26-Awghust türkiyede "Uyghur qaraxanli" markiliq qoghun bazargha sélindi. Abdullah isimlik bir Uyghur bashchiliqida bir qanche kishidin terkib tapqan bir guruppa Uyghurlar türkiyening manisa shehirige qarashliq bir rayonda 120 mo yerge qoghun térighan bolup, bu qoghunlar hazir piship bazargha sélindi.

Qoghun térighan abdullah ependidin alghan melumatlargha qarighanda bu qoghunning uruqi Uyghur rayonidin keltürülgen bolup, qoghun'gha "Uyghur qaraxanli" qoghuni dep nam bérilgen we shu nam hökümetke en'ge aldurulup patént hoquqi testiqlitilghan.

Abdullah ependi ötken yilimu bu xil qoghun térighan bolup, qoghunlar sétilishtin burun zéde bolup kétip yaxshi payda alalmighan iken. Lékin bu yil qoghunlar ötken yilidikige sélishturghanda yaxshi hosul bergen. U, ötken yili alghan tejribige asasen qoghunlarni qayta térighanliqini we yaxshi hosul élishqa ümid baghlighanliqini bildürdi.

Abdullah ependi bu yilqi qoghunlardin 150 tonnidin köprek hosul élishni texmin qilghanliqini ilgiri sürdi.

Abdullah ependi türkiyede "Uyghur qaraxanli" dégen markini saqlap qélishqa we bu markiliq qoghunni türkiyede tonutushqa tirishchanliq körsetkenlikini shuning üchün bu markini türkiyede qanunluq testiqlitip patént hoquqini alghanliqini we qoghunlarni türkiyening enqere, manisa we istanbul sheherliridiki top sétish bazarlarda sétiliwatqanliqini bildürdi.

Biz yene bu heqte ötken yili bu qoghunni térishta ortaq bolghan abbas qarim bilen söhbet élip barduq. Abbas qarim ötken yili térighan qoghun bazargha sélin'ghandin kéyin temi yaxshi bolghachqa türklerning yaqturup sétiwalghanliqini, bu yilmu qoghunni sorawatqanlarning köplükini, yeni "Uyghur qaraxanli" markiliq qoghunning kelgüside türkiyede chong bazar tapidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet