Д у қ “уйғур ирқий қирғинчилиқи” ни шиветсийә һөкүмитигә аңлатмақта

Ихтиярий мухбиримиз әкрәм
2022-05-19
Share
Д у қ “уйғур ирқий қирғинчилиқи” ни шиветсийә һөкүмитигә аңлатмақта Д у қ рәиси долқун әйса башчилиқидики вәкилләр шиветсийә һөкүмәт вә парламент хадимлиридин “уйғур ирқий қирғинчилиқи” ни етирап қилишни тәләп қилди. 2022-Йили 18-май, шиветсийә.
RFA/Ekrem

18-Майдин башлап шиветсийә пайтәхти стокһолимда 3 күнлүк зияритини башлиған д у қ рәиси долқун әйса, д у қ программа йетәкчиси зумрәтай қатарлиқлар д у қ ниң шиветсийәдә турушлуқ баянатчиси дилшат решит вә шиветсийәдики уйғур тәшкилатлириниң мәсуллири билән бирликтә икки күндин буян шиветсийә һөкүмәт вә парламент хадимлири билән учришишлар елип берип, уйғурларниң нөвәттики еғир вәзийитини аңлатқан.

Сөһбәтләр әснасида улар шиветсийә һөкүмәт хадимлириға шәрқий түркистандики хитай зулумини аңлитиш билән биргә, “уйғур сот коллегийәси” ниң өткән йили қобул қилған “уйғур ирқий қирғинчилиқи” вә “инсанийәткә қарши җинайәт” қарарини етирап қилғузушқа тиришқан һәмдә уйғурларниң тәләп-истәклирини билдүрүп өткән.

Д у қ рәиси долқун әйса башчилиқидики вәкилләр шиветсийә һөкүмәт вә парламент хадимлиридин “уйғур ирқий қирғинчилиқи” ни етирап қилишни тәләп қилиш паалийитидә хатирә сүрәт. 2022-Йили 18-май, шиветсийә.
Д у қ рәиси долқун әйса башчилиқидики вәкилләр шиветсийә һөкүмәт вә парламент хадимлиридин “уйғур ирқий қирғинчилиқи” ни етирап қилишни тәләп қилиш паалийитидә хатирә сүрәт. 2022-Йили 18-май, шиветсийә.
RFA/Ekrem

Стокһолимдин зияритимизни қобул қилған д у қ рәиси долқун әйса әпәнди шиветсийәдики паалийәтләр һәққидә тохталғанда, “уйғур сот коллегийәси” ниң “уйғур ирқий қирғинчилиқи” вә “инсанийәткә қарши җинайәт” қарарини явропа дөләтлиригә етирап қилдуруш үчүн, д у қ ниң хелидин буян һәрикәткә өткәнликини, шиветсийәдики паалийәтниң шу пиланниң бир тәркибий қисми икәнликини тәкитлиди.

Д у қ программа йитәкчиси зумрәтай бу һәқтә пикир баян қилғанда, явропадики башқа дөләтләргә қариғанда уйғурларни яхширақ билидиған шиветсийәликләргә “уйғур ирқий қирғинчилиқи” ни тонутуш арқилиқ, шиветсийә парламентида уйғурларға мунасивәтлик қарарларни алғузуш вә илгирики йилларда қурулған шиветсийә парламентидики “уйғур достлуқ горупписи” ни қайтидин җанландуруш, җиддий һәрикәткә өткүзүшниң бу қетимқи паалийәтләрниң асаслиқ мәқсәтлиридин бири болғанлиқини әскәртти.

Д у қ рәһбәрлириниң стокһолимдики паалийәтлиригә һәмраһ болған қурултай баянатчиси дилшат решитму бу хусуста ипадә билдүрүп, шиветсийә һөкүмәт вә парламент хадимлири билән елип барған бу учришишларниң наһайити әһмийәтлик болғанлиқини тилға алди.

Д у қ рәһбәрлириниң билдүришичә, шиветсийә һөкүмәт вә парламент хадимлири билән болған учришуштин сирт, улар 20-майғичә йәнә шиветсийәдики һәрсаһә кишилик һоқуқ тәшкилатлири биләнму сөһбәтләр өткүзүп, уйғурлар мәсилисини тонутидикән һәмдә өзара һәмкарлиқлар үстидә издинидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт