Istanbuldin yolgha chiqqan Uyghur anilar enqerege yétip keldi

Ixtiyariy muxbirimiz azigh
2021.03.18
Istanbuldin yolgha chiqqan Uyghur anilar enqerege yétip keldi Istanbuldin yolgha chiqip enqerege kétip barghan Uyghur anilar
RFA/ Azigh

Yillardin buyan xitayda qalghan baliliridin xewer alalmaywatqan türkiyediki Uyghur anilar 8-mart ayallar bayrimi küni istanbuldin enqerege qarap yolgha chiqqanidi.

Istanbuldin enqerege piyade méngish arqiliq türkiyege we dunyagha awazini anglitishni meqset qilghan Uyghur anilar 8-mart küni gebzige kelginide, türkiye xewpsizlik xadimliri teripidin tosuwélinip istanbulgha qayturuwétilgen idi.

Pa'aliyetchiler 9-mart küni yene yolgha chiqqan bolup, 10-mart küni izmit rayonigha kelginide, xewpsizlik xadimliri teripidin tekrar istanbulgha apiriwétilgen.

Pa'aliyetchilerning éytishiche, 3-qétimliq enqere sepiride xewpsizlik xadimliri pa'aliyetchilerni pendiktiki saqchi idarisige élip barghan. Xewpsizlik xadimliri pa'aliyet üchün ruxset almighanliqini seweb körsitip, pa'aliyetchilerni tekrar mangmasliq toghrisida qattiq agahlandurghan.

Qelbinur xanim ziyaritimizni qobul qilip bu heqte tepsiliy toxtaldi.

Yillardin buyan xitay hökmitining Uyghur rayonda élip bériwatqan qirghinchiliq siyasiti we yighiwélish lagérliri tüzülmisi seweblik baliliri heqqide uchur alalmaywatqan Uyghur anilar pa'aliyet jeryanida qayta-qayta tosqunluqqa uchrighan we qayturuwétilgen bolsimu, emma enqerege méngishtin waz kechmigen.

8-Mart küni istanbuldin enqerege qarap yolgha chiqqan Uyghur anilar pa'aliyitining qayta-qayta tosqunluqqa uchrishigha qarimay 18-mart küni enqerege yitip kelgen.

Yillardin buyan perzentidin xewer alalmaywatqan we perzenti bilen jem bolush üchün mezkur pa'aliyetke qatnashqan amine xanim ziyaritimizni qobul qilip pa'aliyetning jeryani heqqide tepsiliy melumat berdi.

Türkiye hökümitidin perzentlirining iz-dérikini qélip bérishini we özlirige yardem qilishini telep qilip enqerege méngip kelgen anilar bayanat élan qilip mundaq dédi: “Biz aniliq mejburiyitimizni ada qilishqa tirishiwatimiz. Silermu insanliq mejburiyitinglarni ada qilinglar! bu nareside balilirimiz pütün dunyadin we insaniyettini yardem telep qiliwatidu. Balilirimiz qachan anilirimiz bilen jem bolimiz dep sorawatidu.”

Xitay hökmitining irqiy qirghinchiliq siyasiti we lagér tüzülmisi tüpeyli a'ile ezaliridin ayrilghan Uyghurlar xitay hökümitidin uruq-tughqanliri heqqide éniq uchur bérishini we özlirining yénigha kélishige ruxset qilishini telep qilmaqta. Biraq, xitay hökümiti we türkiyediki xitay diplomatik organliri türkiyediki Uyghurlarning a'ililiri heqqidiki teleplirini qobul qilishni we ulargha éniq jawab bérishni ret qilip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.