Istanbulda ottura mektepni ela netije bilen püttürgen 41 neper Uyghur oqughuchi mukapatlandi

Merkizi istanbuldiki sutuq bughraxan ilim we medeniyet weqfi, sherqiy türkistan tetqiqat weqfi we enqerediki Uyghur ilim we medeniyet tetqiqat weqfi qatarliq jem'iyetlerning birlikte uyushturushi bilen, türkiyediki toluq otturigha köchüsh imtihani-LGS da yuqiri nomur alghan 41 neper Uyghur oqughuchi mukapatlandi.

16‏-Iyul yekshenbe küni istanbulning sefaköy rayonida ötküzülgen mukapatlash murasimida, enqerediki Uyghur ilim we medeniyet tetqiqat wexpining re'isi shundaqla dunya Uyghur qurultiyining mu'awin re'isi doktor erkin ekrem söz qilip, ottura mektepni elachi bolup püttürgen Uyghur oqughuchilarni tebriklidi.

 U chet elde yashawatqan Uyghur yashlirining bilim igileshning muhimliqini tekitlep mundaq dédi: “Chet elde yashawatqan Uyghurlar üchün ikki nerse muhim, birsi sana'etlishish؛ yene birsi ilim élish. Sana'etlishish we ilim öginish, chet ellerdiki sherqiy türkistanliqlarning milliy kimlikini qoghdap qélish hem özini kücheytishining muhim asasidur. Shuning üchün yashlar qanchilik yaxshi oquyalisa we qanchilik ilgirilep mangalisa, millitimizni shunchilik tonushturalaydu, bumu bir hésabta dewagha xizmet qilghanliq bolidu. Bizdek zulum körüwatqan bir millet choqum oqushqa ehmiyet bérishi lazim. Özimiz yaxshi oquyalmighan teqdirdimu balilirimizni yaxshi oqutushimiz lazim. Yaxshi oqughan balilarni mukapatlash we ulargha ilham bérish, balilarning oqush qizghinliqini ashurushigha türtke bolidu. Shunga biz perzentlirimizni yaxshi oqutup yétishtürüp chiqishimiz kérek” .

Mukapatlash murasimida söz qilghan xelq'ara sherqiy türkistan teshkilatlar birlikining re'isi hidayetullah oghuzxan, ottura mektepni ela netije bilen püttürgen Uyghur oqughuchilarni tebriklidi shundaqla oqughuchilarning yaxshi oqushi üchün maddiy-meniwiy jehette küch chiqarghan ata-ana we ustazlargha, shundaqla meripetperwer sodigerlerge rehmet éytidighanliqini bildürdi.

Selchuq uniwérsitétining tarix penliri doktoranti abduréhim dölet, “Ümid ghunchiliri” namliq bu mukapatni tesis qilishtiki meqsetler toghrisida toxtilip mundaq dédi: “Biz türkiyede toluq ottura mektepke köchüshte yuqiri nomurgha érishken Uyghur oqughuchilarni mukapatlashning bu yil 3-qétimliqini tebriklewatimiz. Yuqiri nomur alghan Uyghur oqughuchilarni ilhamlandurush, ulargha özlirining Uyghur jem'iyitining ezasi ikenlikini her da'im hés qildurush, ularning kimlik tuyghusini küchlendürüsh meqsitide biz bu pa'aliyetni bashliduq. Bu pa'aliyet yildin yilgha yaxshi bolup kétiwatidu, kéler yili téximu chong zalda téximu daghdughiliq ötküzüshimiz mumkin, kéler yildin bashlap toluq ottura mektepni ela netije bilen püttürüp aliy mektepke ötken Uyghur oqughuchilarnimu mukapatlashni pilanlawatimiz, bu pilan elwette qérindashlarning maddiy-meniwi jehette qollap-quwwetlishi bilen emelge ashidu” .

Doktorant abduréhim dölet sözining axirida, Uyghur ata-anilarning balilirining mektepte yaxshi netije bilen oqushi üchün a'ilidimu ching tutup yétekchilik qilishning muhimliqini tekitlidi.

Murasimda yene jama'et erbabi abduqadir yapchan, sutuq bughraxan ilim we medeniyet weqfining mu'awin re'isi ömer qariyhajim, Uyghur ilim we medeniyet tetqiqat weqfi re'isi abdul'ehed uchqun, Uyghur herikiti re'isi roshen abbas xanim, Uyghur tetqiqat merkizi mudiri abdulhekim idris, türkiyening tokyoda turushluq ijtima'iy ishlar meslihetchisi muhemmed reshid alaz, amérikaliq tetqiqatchi xalid beydun qatarliqlarmu qatnashti hemde ayrim-ayrim söz qildi.

Murasim axirida “Ümid ghunchiliri” mukapatigha érishken Uyghur oqughuchilargha mukapatlar tarqitilip bérildi.

 Bu yil türkiyde toluq otturigha köchüsh imtihanida 488 nomur alghan abdulhekim xelpem we yaqup eli'oghli qatarliq ikki Uyghur oqughuchi birinchi derijilik mukapatqa érishken bolup, ikkisige birdin “Alma” markiliq xatire kompyutéri؛ ikkinchi derijilik mukapatqa érishken munire emin, leyle chayan qatarliq ikki oqughuchigha birdin HP markiliq xatire kompyutéri؛ üchinchi derijilik mukapatqa érishken nurulla emin we ghoji abdulla qatarliq ikki oqughuchigha birdin “Samsung” taxta kompyutéri mukapat bérildi. Undin bashqa, imtihanda 400 din yuqiri nomur alghan 35 oqughuchining herbirige ming liradin neq pul mukapat bérildi.