Istanbuldiki Uyghurlar roza héytni qandaq ötküzüwatidu?

Ixtiyariy muxbirimiz arslan
2020-05-25
Share
roza-heyt-istanbul.jpg Istanbuldiki roza héytta jem bolup pa'aliyet ötküzüwatqan körünüsh. 2019-Yili may, türkiye.
RFA/Arslan


5-Ayning 24-küni türkiyede roza héyt bayrimi bashlan'ghanliqi élan qilindi, biraq koruna wirusidin yuqumlinishtin saqlinish üchün türkiye hökümiti teripidin meschitlerde roza héyt namizi oqulmaydighanliqi toghrisida uqturush qilindi we 5-ayning 23-künidin 26-künigiche kishilerning sirtqa chiqishigha cheklime qoyuldi.

Roza héyt munasiwiti bilen istanbuldiki sherqiy türkistan ma'arip we hemkarliq jem'iyiti, sherqiy türkistan ölimalar birliki qatarliq teshkilatlar Uyghurlarning roza héytini tebriklep tebrikname élan qildi.

Sherqiy türkistan ma'arip we hemkarliq jem'iyitining resmiy tor bétide hidayetulla oghuzxan teripidin élan qilin'ghan tebriknamide mundaq déyilgen: "Hemminglarning roza héytigha mubarek bolsun! , shundaqla pütkül islam alimi we zulum astida ingrawatqan sherqiy türkistan xelqimizning roza héytigha mubarek bolsun. Ramzan éyida élip barghan pütkül emel-ibadetler janabiy allaning nezlide qobul bolsun".

Tebriknamide Uyghurlarning wirus sewebidin bu héytta gerche bir-biri bilen qol éliship, quchaqliship héyt-bayramni tebrikliyelmigen bolsimu, lékin rohi we meniwi jehettin öz-ara bir-birige köngül izhar qilip dostluq, qérindashliq, sepdashliq rishtisini kücheytish üchün bir-biri bilen téléfon we widéyoluq körüshüsh arqiliq roza héytni xushal keypiyat ichide ötküzüshke tirishchanliq körsitishke chaqirilghan. Sherqiy türkistan ma'arip we hemkarliq jem'iyiti re'isi hidayetulla oghuzxan mezkur tebriknamisining axirida "Yene bir qétim pütkül qérindashlirimizning roza héytini tebrikleymiz. Héytni a'ile-perzentler bilen xushal-xuram ötküzüshke tilekdashliq bildürimiz" dep xitab qilghan.

Adette Uyghurlar bashqa musulmanlargha oxshash roza héytta bir-biri bilen qol éliship, quchaqliship körüshüp roza héytni tebriklishetti. Bu yil istanbuldiki Uyghurlar roza héytni qandaq ötküzüwatidu? ötken yildikige qarighanda qandaq oxshashmasliq perqler mewjut bu so'allarning jawabigha érishish üchün biz sherqiy türkistan teshkilatlar birliki re'isi hidayetulla oghuzxan, Uyghur akadémiyesi bash katipi doktor perhat qurban tengritaghli bilen söhbet élip barduq.

Igilinishiche, bu yil koruna wirusi sewebidin insanlar öz-ara munasiwette qol éliship körüshmeslik, bir-biridin yiraq turush toghrisida doxturlarning tewsiyeliri we hökümet tereptin sirtqa chiqish cheklen'genliki üchün roza héytni öyde olturup ötküzüshke mejbur bolmaqta.

Bu heqte pikir bayan qilghan sherqiy türkistan teshkilatlar birliki shundaqla sherqiy türkistan ma'arip we hemkarliq jem'iyitining re'isi hidayetulla oghuzxan her yili istanbuldiki Uyghurlar roza héytta öz-ara bir-birlirining öylirige bérip petilep, yaki bir yerge jem bolup héytni tebrikliship kéliwatqanliqini, bu arqiliq Uyghurlarning en'eniwi örp-adetlirini janlandurushta yaxshi rol oynap kelgenlikini, emma bu yil korona wirusi sewebidin Uyghurlarning roza héytni öyde ötküzüwatqanliqini, roza héyt harpisida türkiyede töt künlük sirtqa chiqish cheklen'gen bir weziyette bolsimu yenila öz-ara téléfon we intérnét arqiliq körüshüp héytni tebriklesh téximu jushqun bir shekilde ötküzülgenlikini bildürdi.

Doktor perhat qurban tengritaghli bu heqte pikir bayan qilip, bu yil roza héytni asasliqi öyde olturup tebrikleshke mejbur bolghanliqini, buninggha xitaydin chiqqan korona wirusining seweb bolghanliqini, pütkül dunyaning hazir xitay wirusigha esir bolup uning tesirge uchrawatqanliqini we wirusning jawabkarliqi xitay ikenlikini bildürdi. U: "Insanlarning roza héytta meschitke bérip namaz oquyalmasliqning sewebining xitay ikenlikini tekitlishimiz kérek", dédi.

Roza héyt toghrisida pikir bayan qilghan sherqiy türkistan ölimalar birlikining mu'awin re'isi abdusalam alim bu heqte toxtilip, roza héytning zulumgha uchrawatqan Uyghurlar üchün neqeder muhim ehmiyetke ige ikenlikini tekitlidi.

Istanbulda yashawatqan jama'et erbabi abduqadir yapchan dunyaning her qaysi jayliridiki Uyghurlarning roza héytini tebriklep widéyoluq tebrikname élan qildi.

Sherqiy türkistan ölimalar birlikining roza héyt tebriknamiside mundaq déyilgen: "Bu künlerde sherqiy türkistanda xelqimiz éghir musibet ichide, ramzanda roza ibaditidin mehrum, barliq insaniy heq-hoquqliridin mehrum yashimaqta. Chet'ellerdimu xitay wirusi sewebidin öylerde karantin'gha kirip qalduq, namazlarnimu öylirimizde oqushqa mejbur bolduq. Wirus sewebidin alemdin ötkenlerge alla rehmet qilsun, yuqumlan'ghanlargha shifa ata qilsun. Bizler üchün héyt-bayramlarmu yoq, shundaqtimu allaning merhemiti bolghan roza héyt bayriminglargha mubarek bolsun. Alla xelqimiz üstidiki zulumlarni tiz pursette kötürüwetsun, erkinlikke érishtürsun, barchimizni wirus balasidin saqlisun, wirus bilen yuqumlan'ghanlar bolup qalsa téz shipaliq bersun, amin"

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet