Истанбулда уйғур мәһәллиси қурулушиниң ечилиш мурасими өткүзүлди

Ихтиярий мухбиримиз арслан
2023.03.08
Istanbul-Selimpasha-rayonida-uyghur-mehellisi-1.jpg Истанбулниң сәлимпаша районида уйғур мәһәллиси қурулуши үчүн сетивелинған земинда өткүзгән ечилиш мурасимида лента кәсмәктә. 2023-Йили 7-март, түркийә.
RFA/Arslan

7-Март күни мәркизи истанбулдики уйғур илим мәрипәт вәхписи исмини ашкарилашни халимайдиған бир җәмийәт билән һәмкарлишип истанбулниң сәлимпаша районида уйғур мәһәллиси қурулуши үчүн сетивелинған земинда ечилиш мурасими өткүзди.

Игилинишичә, истанбулниң сәлимпаша райониға дәсләпки қәдәмдә 64 өйни өз ичигә алған аилә қоруси селинидиған болуп, кейинки пиланда техиму кеңәйтилип көплигән уйғурларниң олтурақлишиши үчүн шәрт-шараит яритилидиғанлиқи илгири сүрүлди.

Ечилиши мурасимиға истанбулдики һәр қайси шәрқий түркистан иҗтимаий тәшкилатлириниң рәһбәрлири вә истанбулда яшаватқан уйғурлардин әр-аял болуп көп санда киши қатнашти.

Истанбулниң сәлимпаша районида уйғур мәһәллиси қурулуши үчүн сетивелинған земинда өткүзгән ечилиш мурасимида хатирә сүрәт. 2023-Йили 7-март, түркийә.
Истанбулниң сәлимпаша районида уйғур мәһәллиси қурулуши үчүн сетивелинған земинда өткүзгән ечилиш мурасимида хатирә сүрәт. 2023-Йили 7-март, түркийә.
RFA/Arslan

Ечилиш мурасими қуран кәрим тилавити вә истиқлал марши оқуш билән башланди. Мурасимда уйғур илим мәрипәт вәхписиниң рәиси абдуғени қутби сөз қилип, 2015-йили истанбулда уйғур мәһәллиси қуруш мәқситидә издинип сәлимпаша райониниң истанбул шәһиригә йеқин вә мунасип район икәнликини бәлгиләп, бу җайда мәһәллә қурушқа киришкәнликини, буниңдин кейинки пиланда бу мәһәллиниң техиму кеңәйтилип көплигән уйғурларниң олтурақлишиши үчүн шәрт-шараит яритилидиғанлиқини билдүрди.

Ечилиш мурасимида хәлқара шәрқий түркистан тәшкилатлири бирлики рәиси һидайәтуллаһ оғузхан сөз қилип, шәрқий түркистан хәлқиниң дини, тили, миллий өрп-адәтлириниң муһаҗирәттики һаятта сақлинип қелиши вә дәваниң давамлишиши үчүн бир йәргә топлишип олтурақлишишиниң муһим икәнликини, шуниң үчүн сәлимпашада уйғур мәһәллиси қурулушини қоллайдиғанлиқини тәкитлиди.

Истанбулниң сәлимпаша районида уйғур мәһәллиси қурулуши үчүн сетивелинған земинда өткүзгән ечилиш мурасимидин көрүнүш. 2023-Йили 7-март, түркийә.
Истанбулниң сәлимпаша районида уйғур мәһәллиси қурулуши үчүн сетивелинған земинда өткүзгән ечилиш мурасимидин көрүнүш. 2023-Йили 7-март, түркийә.
RFA/Arslan

Ечилиш мурасимида йәнә дуня уйғур қурултийи вәхписи рәиси абдурешит абдулһәмит әпәнди сөз қилип, сәлимпашада уйғур мәһәллиси қурулушиниң уйғур хәлқи үчүн хәйрлик болушиға тиләкдаш икәнликини билдүрди вә муһаҗирәттики уйғурларниң өзлири яшаватқан дөләтләрдә кәлгүсидә ассимлятсийә болуп кәтмәй өзиниң миллий мәвҗутлуқини сақлап қелиши үчүн топлишип олтурақлишишиниң муһим икәнликини тәкитлиди.

Мурасимда йәнә уйғур өсмүрләр сәһнигә чиқип шеир декламатсийә қилди вә уйғурларниң бешиға келиватқан паҗиәләр вә азадлиққа еришиши ипадиләнгән нахшини оқуп йиғин әһлиниң қизғин алқишиға еришти.

Зияритимизни қобул қилған уйғур илим мәрипәт вәхписиниң муавин рәиси шундақла сәлимпашадики уйғур оқу мәктипиниң мудири һәбибулла күсәни бу мәктәпни ечиш вә уйғур мәһәллиси қурушниң әһмийити тоғрисида тохталди.

Истанбулниң сәлимпаша районида уйғур мәһәллиси қурулуши үчүн сетивелинған земинда өткүзгән ечилиш мурасимидин көрүнүш. 2023-Йили 7-март, түркийә.

Һәбибулла күсәни әпәнди уйғур илим-мәрипәт вәхписиниң сәлимпаша районида 2015-йили бәш миң квадрат метирлиқ бир земин сетивелип бир мәктәп вә 40 йүрүш өй селишқа башлиғанлиқини, мәктәп вә өйниң 2017-йили пүтүп ишқа киришкәнликини, мәктәпниң һәм синип һәм ятақ болуп 800 оқуғучи йетип оқуялайдиған сиғимчанлиқи барлиқи, һазир мәктәптә 200 уйғур оқуғучи ятақта йетип оқуватқанлиқини билдүрди.

Һәбибулла күсәни әпәндиниң билдүрүшичә, уйғур аилә қорусини кеңәйтип икки бина селинған болуп сәлимпашадики уйғур мәһәллисидә һазир җәмий 100 уйғур аилә олтурақлашқаникән.

Һәбибулла күсәни әпәнди, бу қетим районни техиму кеңәйтип мәлум бир җәмийәт билән һәмкарлишип 6000 квадрат метирлиқ земин сетивалғанлиқини вә бу земинға дәсләпки қәдәмдә 94 өйни өз ичигә алған аилә қоруси селишни пиланлиғанлиқини вә ул селиш ечилиш мурасими өткүзгәнликини тәкитлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.