“Asarettiki türk yurti-sherqiy türkistan” dégen témida istanbulda yighin échildi

Istanbuldin ixtiyariy muxbirimiz arslan teyyarlidi
2024.05.13
Hamut-Kokturk-sozde-1 Asarettiki türk yurti sherqiy türkistan dégen témida échilghan yighinda sherqiy türkistan wexpining sabiq re'isi hamut köktürk ependi sözlimekte. 2024-Yili 12-may, istanbul.
RFA/Arslan

Merkizi istanbuldiki “Börü budun” (Börü Budun) namdiki pesillik zhurnal tehrirat hey'itining uyushturushi bilen 12-may küni istanbulda “Asarettiki türk yurti-sherqiy türkistan” dégen témida yighin échildi.

Yighinda börü budun zhurnilining mes'uli Uyghur turghut, piroféssor jezmi bayram, türkolog we yazghuchi ra'up küse, sha'ire nur'ela köktürk, yazghuchi barish qurt, sherqiy türkistan wexpisining sabiq re'isi hamut köktürk qatarliq kishiler söz qilip Uyghurlarning tarixi we hazirqi ehwali shundaqla, asaret we irqiy qirghinchiliqqa uchrashning sewebliri toghrisida toxtaldi.

Yighinda söz qilghan sherqiy türkistan wexpisining sabiq re'isi hamut köktürk, türkiyediki pütün siyasiy partiyelerning Uyghurlarni qollishi kéreklikini tekitlep mundaq dédi: “Sherqiy türkistan dewasi partiyelerdin üstün orunda turidighan bir dewadur, türkiye jumhuriyitining birlik we barawerlikige buzghunchiliq qilmighan we türkiye jumhuriyitining testiqi bilen qanunluq qurulghan pütün siyasiy partiyelerdin, sherqiy türkistan mesiliside bizni qollashni telep qilimiz, bu dewagha yardem bergen, qollighan partiyelerni tebrikleymiz we teshekkür éytimiz. ”

Asarettiki türk yurti sherqiy türkistan dégen témida échilghan yighinda Uyghur sha'ire nur'ela köktürk xanim shé'ir oqumaqta. 2024-Yili 12-may, istanbul.
Asarettiki türk yurti sherqiy türkistan dégen témida échilghan yighinda Uyghur sha'ire nur'ela köktürk xanim shé'ir oqumaqta. 2024-Yili 12-may, istanbul.
RFA/Arslan

Yighinda söz qilghan türkolog, yazghuchi ra'up küse ependi, bügünki künde Uyghurlarning zulumgha we irqiy qirghinchiliqqa uchrawatqanliqini tekitlep mundaq dédi: “Sherqiy türkistan 1864-yilidin bashlap 2024-yilighiche 160 yildin buyan kishilik hoquq tajawuzchiliqi yüz bériwatqan, zulum we irqiy qirghinchiliq toxtimay dawam qiliwatqan bir jughrapiyelik jayning namidur, u yerdiki xelqning sewr-taqiti tashti, biz bu zulumdin qandaq qutulimiz dep bir-biridin sorishidu, bügünki künde dunyada musteqil 7 türk jumhuriyiti bolsimu bulardin héch bir dölet héch bir lidiri jasaret bilen meydan'gha chiqip bu mesile toghrisida sözliyelmeywatidu. Yighinlarda toxtimay pexirlinip tilgha élip kéliwatqan türkiy tillar diwanining mu'ellipi mehmud qeshqirining yurti bolghan qeshqerning asaret astida qalghanliqini türk yashlirigha ögitishimiz, ige chiqishimiz kérek”.

Asarettiki türk yurti sherqiy türkistan dégen témida échilghan yighinda türkolog yazghuchi ra'up küse ependi sözlimekte. 2024-Yili 12-may, istanbul.
Asarettiki türk yurti sherqiy türkistan dégen témida échilghan yighinda türkolog yazghuchi ra'up küse ependi sözlimekte. 2024-Yili 12-may, istanbul.
RFA/Arslan

Yighinda türk sen'etchi bunyamin aqsun'gur ependi sehnige chiqip, “Uchrashqanda” namliq meshhur Uyghurche naxshini dutar bilen orunlap yighin ehlining qizghin alqishigha érishti.

Biz bu yighinni uyushturghan “Börü budun” zhurnilining mes'uli Uyghur turghut ependi bilen söhbet élip barduq. Ziyaritimizni qobul qilghan Uyghur ependi, yéqinda türk dunyasi üchün “Toy” namida bir munber qurulghanliqini, bu munberning tunji yighinini sherqiy türkistan mesilisini muzakire qilish üchün orunlashturghanliqini bildürdi.

Asarettiki türk yurti sherqiy türkistan dégen témida échilghan yighinda türk sen'etchi bunyamin aqsun'gur ependi Uyghurche naxsha teqdim qildi. 2024-Yili 12-may, istanbul.
Asarettiki türk yurti sherqiy türkistan dégen témida échilghan yighinda türk sen'etchi bunyamin aqsun'gur ependi Uyghurche naxsha teqdim qildi. 2024-Yili 12-may, istanbul.
RFA/Arslan

U bu yighinni uyushturushtiki meqsiti toghrisida toxtilip mundaq dédi: “Bizning toy munbiri yéngidin qurulghan bir munber bolup, bu munber oxshimighan üch sahe boyiche xizmet qilidu, buning biri türk dunyasigha alaqidar pa'aliyet élip bérish idi. Bügün tunji bolup, ‛asarettiki türk yurti sherqiy türkistan‚ dégen témida pa'aliyet bashliduq. Hemmimizge melum bolghinidek pelestin mesilisi küntertipte turuwatqan we sherqiy türkistan'gha köz yumulghan bir weziyette biz sherqiy türkistan mesilisini küntertipke keltürüshni meqset qilip bu pa'aliyetni uyushturduq, men sherqiy türkistandiki zulum astida yashawatqan qérindashlirimizgha salam yollaymen, biz ular üchün küresh qilimiz, her waqit ularning yénida bolimiz” .

Yighinda yene sha'ire nur'ela köktürk xanim “Öz élimde öz tilim cheklimige uchridi” dégen bir qanche parche shé'irni déklamatsiye qilip yighin qatnashquchilirining qizghin alqishigha érishti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.