Истанбулда 3 миңдин артуқ уйғур җәм болуп роза һейтни бирликтә өткүзди

Ихтиярий мухбиримиз арслан
2019-06-06
Елхәт
Пикир
Share
Принт

5-Айниң 6-күни, йәни роза һейтниң иккинчи күни истанбулдики уйғурлардин 3 миңдин артуқ уйғур деңиз бойидики чимлиқ мәйданға җәм болуп, роза һейтлиқ һәр хил паалийәтләр өткүзди.

Бу қетимлиқ һейтлишиш паалийитини шәрқий түркистан маарип вә һәмкарлиқ җәмийити тәрипидин уюштурулған болуп, паалийәткә истанбулдики уйғур тәшкилатларниң мәсуллири, җамаәт әрбаблири, юрт мөтивәрлири, диний алимлар вә әр-аял, балилар болуп, 3 миңдин артуқ киши қатнашти.

Паалийәттә алди билән шәрқий түркистан маарип вә һәмкарлиқ җәмийити шундақла шәрқий түркистан тәшкилатлар бирликиниң рәиси һидайәтулла оғузхан сөз қилди.

Һидайәтулла оғузхан сөзидә алди билән уйғурларниң роза һейтини тәбриклиди вә җәм болуп бирликтә һейтлишишниң әһмийити вә мәқсити тоғрисида тохталди.

У бу қетимқи йиғилишниң мәқсити тоғрисида тохтилип, мундақ деди: «бизниң бу йәргә йиғилишимизниң мәқсити бир күн болсиму муһаҗирәт вә ғурбәттики бу һаятимизни көңүлләрдин су ичидиған нуқтиға кәлтүрүштур. Өз-ара учришиш, сөһбәтлишиш вә тонушуш бүгүнки бу байрамниң хусусийәтлиридин болғанлиқи үчүн мана бүгүн җәм болуп бирликтә өткүзүватимиз. Биз достлуқ-қериндашлиқимизни, ача-сиңил вә ака-укилиқ риштимизни, муһаҗирәттики қериндашлиқ карванимизни техиму җанландуруш мәқситидә бүгүн бу йәргә җәм болдуқ. Бизниң бу бирликимиз мәнивийитимизни бейитипла қалмастин, бәлки дүшмәнлиримизниң қәлбигә зәрбә бериду. Бизниң чоңлиримиз вә ата-анилиримизму мушундақ җәм болуп мәшрәпләрни шәкилләндүргән. Шуңа бу мәдәнийитимиз дүшмәнлиримизниң йүрикигә хәнҗәр болуп санҗилғандәк қорқунучни һес қилдурған.»

Кейин җамаәт әрбаби абдуқадир япчан сөз қилип, паалийәт иштиракчилириниң роза һейтни тәбриклиди вә бирлик-баравәрликкә чақириқ қилди.

Йиғинда йәнә дини алим нияз дамоллам сөз қилип, роза һейтниң әһмийити тоғрисида тохталди вә муһаҗирәттики мусапирлиқ һаятида бунчә көп кишиниң бир йәргә йиғилип бирликтә һейт өткүзгәнликидин тәсирләнгәнликини баян қилди.

Кейин шәрқий түркистан өлималар бирликиниң рәиси доктор атавулла шәһяр сөз қилип уйғурларниң бирлик-баравәрликиниң әһмийити тоғрисида тохталди. Паалийәттә йәнә мустәқил тәтқиқатчи абдурахман қәшқәрий әпәнди сөз қилип, уйғурларниң ғәлибигә еришишниң бирдин бир йолиниң һессиятқа берилмәстин әқил-тәпәккур билән пилан түзүп, әмәлий хизмәткә атлинип, тиришчанлиқ билән һәрикәт қилиш керәкликини тәкитлиди.

Паалийәт җәрянида өсмүрләр «ана тилим» дегәндәк һәр хил темиларда шеирлар оқуди. Ахирида челишиш мусабиқиси өткүзүлди, паалийәт иштиракчилири челишиш мусабиқисини қизғин кәйпият ичидә көрди.

Игилинишичә, шәрқий түркистан маарип вә һәмкарлиқ җәмийити уйғурлар арисида бирлик-баравәрлик һасил қилиш үчүн һейт-байрам күнлиридә мушу хилдики һәр хил йиғилиш паалийәтләрни уюштуруп кәлмәктә икән. Өткән йилидики роза һейттиму маарип җәмийитиниң уюштуруши билән 2000 дин артуқ уйғур истанбулда җәм болуп бирликтә һейтлишиш паалийити елип барған иди.

Пикирләр (0)
Share
Толуқ бәт