Istanbulda 3 mingdin artuq Uyghur jem bolup roza héytni birlikte ötküzdi

Ixtiyariy muxbirimiz arslan
2019-06-06
Share

5-Ayning 6-küni, yeni roza héytning ikkinchi küni istanbuldiki Uyghurlardin 3 mingdin artuq Uyghur déngiz boyidiki chimliq meydan'gha jem bolup, roza héytliq her xil pa'aliyetler ötküzdi.

Bu qétimliq héytlishish pa'aliyitini sherqiy türkistan ma'arip we hemkarliq jem'iyiti teripidin uyushturulghan bolup, pa'aliyetke istanbuldiki Uyghur teshkilatlarning mes'ulliri, jama'et erbabliri, yurt mötiwerliri, diniy alimlar we er-ayal, balilar bolup, 3 mingdin artuq kishi qatnashti.

Pa'aliyette aldi bilen sherqiy türkistan ma'arip we hemkarliq jem'iyiti shundaqla sherqiy türkistan teshkilatlar birlikining re'isi hidayetulla oghuzxan söz qildi.

Hidayetulla oghuzxan sözide aldi bilen Uyghurlarning roza héytini tebriklidi we jem bolup birlikte héytlishishning ehmiyiti we meqsiti toghrisida toxtaldi.

U bu qétimqi yighilishning meqsiti toghrisida toxtilip, mundaq dédi: "Bizning bu yerge yighilishimizning meqsiti bir kün bolsimu muhajiret we ghurbettiki bu hayatimizni köngüllerdin su ichidighan nuqtigha keltürüshtur. Öz-ara uchrishish, söhbetlishish we tonushush bügünki bu bayramning xususiyetliridin bolghanliqi üchün mana bügün jem bolup birlikte ötküzüwatimiz. Biz dostluq-qérindashliqimizni, acha-singil we aka-ukiliq rishtimizni, muhajirettiki qérindashliq karwanimizni téximu janlandurush meqsitide bügün bu yerge jem bolduq. Bizning bu birlikimiz meniwiyitimizni béyitipla qalmastin, belki düshmenlirimizning qelbige zerbe béridu. Bizning chonglirimiz we ata-anilirimizmu mushundaq jem bolup meshreplerni shekillendürgen. Shunga bu medeniyitimiz düshmenlirimizning yürikige xenjer bolup sanjilghandek qorqunuchni hés qildurghan."

Kéyin jama'et erbabi abduqadir yapchan söz qilip, pa'aliyet ishtirakchilirining roza héytni tebriklidi we birlik-barawerlikke chaqiriq qildi.

Yighinda yene dini alim niyaz damollam söz qilip, roza héytning ehmiyiti toghrisida toxtaldi we muhajirettiki musapirliq hayatida bunche köp kishining bir yerge yighilip birlikte héyt ötküzgenlikidin tesirlen'genlikini bayan qildi.

Kéyin sherqiy türkistan ölimalar birlikining re'isi doktor atawulla shehyar söz qilip Uyghurlarning birlik-barawerlikining ehmiyiti toghrisida toxtaldi. Pa'aliyette yene musteqil tetqiqatchi abduraxman qeshqeriy ependi söz qilip, Uyghurlarning ghelibige érishishning birdin bir yolining héssiyatqa bérilmestin eqil-tepekkur bilen pilan tüzüp, emeliy xizmetke atlinip, tirishchanliq bilen heriket qilish kéreklikini tekitlidi.

Pa'aliyet jeryanida ösmürler "Ana tilim" dégendek her xil témilarda shé'irlar oqudi. Axirida chélishish musabiqisi ötküzüldi, pa'aliyet ishtirakchiliri chélishish musabiqisini qizghin keypiyat ichide kördi.

Igilinishiche, sherqiy türkistan ma'arip we hemkarliq jem'iyiti Uyghurlar arisida birlik-barawerlik hasil qilish üchün héyt-bayram künliride mushu xildiki her xil yighilish pa'aliyetlerni uyushturup kelmekte iken. Ötken yilidiki roza héyttimu ma'arip jem'iyitining uyushturushi bilen 2000 din artuq Uyghur istanbulda jem bolup birlikte héytlishish pa'aliyiti élip barghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet