Истанбулда “шәрқий түркистанлиқлар қериндашлиқ иптар паалийити” өткүзүлди

Истанбулдин ихтиярий мухбиримиз арслан тәйярлиди
2024.03.27
istanbulda-iptar-1 Истанбулниң күчүкчәкмәҗә сәфакөй райониға җайлашқан османли мәрикә залида өткүзүлгән “шәрқий түркистанлиқлар қериндашлиқ иптар паалийити” дин көрүнүш. 2024-Йили 23-март, түркийә.
RFA/Arslan

23-Март истанбулниң күчүкчәкмәҗә сәфакөй райониға җайлашқан османли мәрикә залида “шәрқий түркистанлиқлар қериндашлиқ иптар паалийити” өткүзүлди.

Бу қетимлиқ иптар пирограммисиға тәклип бойичә қатнашқан түркийәниң сиясий партийә рәһбәрлири уйғурларни қоллайдиғанлиқини вә зулумға қарши күрәшни давамлаштуридиғанлиқини тәкитлиди.

Иптар пирограммисида сөз қилған түркийә җумһурийитиниң сабиқ ички ишлар министири вә парламент әзаси сулайман сойлу алди билән уйғур җамаитиниң рамизан ейини тәбриклиди. У, мундақ деди: “шәрқий түркистанлиқларни өз ичигә алған мусулман қериндашлиримизниң қенини төкүшни вә уларға зулум қилишни рава көргәнләргә қарши һаятимизниң ахириғичә күрәш қилишни давам қилимиз”. 

Истанбулниң күчүкчәкмәҗә сәфакөй райониға җайлашқан османли мәрикә залида өткүзүлгән “шәрқий түркистанлиқлар қериндашлиқ иптар паалийити” дин көрүнүш. 2024-Йили 23-март, түркийә.

Тәклип бойичә бу қетимлиқ иптар паалийитигә қатнашқан “ийи” )яхши) партийәсиниң муавин рәиси, истанбул шәһәр башлиқи намзати буғра кавунҗи әпәнди мундақ деди: “әлвәттә, биз шәрқий түркистанда давамлишиватқан зулумни һәр вақит күнтәртиптә тутушқа тириштуқ, биз бу дәваға игә чиқишни һелиһәм давам қилимиз, чүнки шәрқий түркистан бизниң җенимиз; шәрқий түркистан мәһмуд қәшқәриниң, осман батурниң, муһәммәд әмин буғраниң, әйса йүсүп алптекинниң вәтини; шуниң үчүн бизләрниң униңдин ваз кечишимиз әсла мумкин әмәс! шәрқий түркистандики бесим вә зулум ахирлашқанға қәдәр, биз бу мәсилини көзитиштин ваз кәчмәймиз, у қәлбимиздики бир яридур. Мениң әҗдадлирим буниңдин 200 йил илгири силәргә охшашла пәрғанә вадисидин чиқип бу йәргә кәлгән икән, биз һеч вақит өзбек, қазақ, уйғур демидуқ, башқилар сориса, биз түркистанлиқ дедуқ. Биз һәр вақит һәр йәрдә силәр билән биргә болимиз, аллаһ қисқа вақит ичидә у йәрдики зулумни йоқ қилсун!”

Истанбулниң күчүкчәкмәҗә сәфакөй райониға җайлашқан османли мәрикә залида өткүзүлгән “шәрқий түркистанлиқлар қериндашлиқ иптар паалийити” дин көрүнүш. 2024-Йили 23-март, түркийә.

Иптарлиқ паалийәт абдуҗелил қаримниң қуран тилавити билән башланғандин кейин, хәлқара шәрқий түркистан тәшкилатлар бирликиниң рәиси һидайәтуллаһ оғузхан ечилиш сөзи қилди. У алди билән түркийә һөкүмити вә хәлқиниң уйғурларға көрсәткән саһибханлиқи үчүн тәшәккүр ейтидиғанлиқини билдүрди. У, “муһаҗирәттики шәрқий түркистанлиқлар истанбулда әркин йиғилип иптарлишиватқан мушу пәйттә, хитай шәрқий түркистанда роза тутуш вә башқа барлиқ дини ибадәтләрни чәкләп, системилиқ ирқий қирғинчилиқ йүргүзүватиду” деди.

Арқидин шәрқий түркистан өлималар бирликиниң рәиси доктор алимҗан буғда сөз қилип, хитайниң шәрқий түркистан хәлқниң роза тутуш қатарлиқ барлиқ ибадәтлирини чәклигәнликини, өзиниң ирқий қирғинчилиқ җинайитини йошурушқа, башқа дөләт вә хәлқләрниң көзини бояшқа урунуватқанлиқини тәкитләп өтти.

Истанбулниң күчүкчәкмәҗә сәфакөй райониға җайлашқан османли мәрикә залида өткүзүлгән “шәрқий түркистанлиқлар қериндашлиқ иптар паалийити” дин көрүнүш. 2024-Йили 23-март, түркийә.

Арқидин ислам дуняси аммиви тәшкилатлар бирликиниң баш катипи әйюб ақбал әпәнди сөз қилди. У, “зулум дуняниң һәр йеридә давамлашмақта. Түркийә ислам дунясиниң чоң қәләси болуп, түркийәни күчләндүрүш толиму муһим. Хитай шәрқий түркистан хәлқини бастурушни давам қиливатиду. Хитайниң бу җинайәтлирини тосуш үчүн биз күчлүк болушимиз керәк” деди.

Бүгүнки иптарлиқ пирограмма хәлқара шәрқий түркистан тәшкилатлар бирликиниң уюштуруши билән өткүзүлгән болуп, түркийәниң һөкүмәт, парламент вә аммиви тәшкилатлириға вакалитән көп санда әзиз меһманлар иштирак қилди. Шуниң билән бир вақитта иптарлиқ паалийитигә истанбулдики һәр саһә уйғур җамаити қатнашти.  Иптарлиқ паалийәт мәззилик уйғур таамлиридин кейин шәрқий түркистан һәққидики тәсирлик дуа билән ахирлашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.