Qaghiliqtiki “Rahet” méhmanxanisining sahibi memet'éziz obul 20 aydin buyan iz-déreksiz

Uyghur élida 2017‏-yili yuqiri pellige chiqqan Uyghur soda-karxanichilirigha qaritilghan hujum we tutqun hélihem dawam qilmaqta. Ashkarilinishiche, qaghiliq nahiyeside öy-mülük sodisi bilen shughullinip kéliwatqan “Rahet” méhmanxanisining sahibi memet'éziz obul 2022-yili tutqun qilin'ghan. Aridin 20 ay ötken bolsimu, u téxiche qoyup bérilmigen. Delillinishiche, memet'éziz obul, nöwette jaza ötewatqan bir diniy zatni buningdin 10 yil ilgiri méhmanxanisida turghuzghanliqi üchün tutqun qilin'ghan.

Qeshqer qaghiliqliq muhajirlardin birining inkas qilishiche, qaghiliqta “Rahet” namidiki bir méhmanxanini mangduruwatqan memet'éziz obul 2017‏-yli lagérgha élip kétilgen. Eyni chaghda keypi-sapada bolmighanliqi üchünla “Diniy ashqunluq” gumani bilen tutqun qilin'ghan memet'éziz obul, lagérdiki so'al-soraqlar dawamida bala waqtida ata-anisidin qur'an sawatini chiqarghandin bashqa “Xata” liqliri bolmighanliqi üchün, 2 yilliq “Terbiye” din kéyin qoyup bérilgen. U lagérdin chiqip qaghiliqtiki méhmanxanisini qaytidin mangduruwatqan chaghda, yeni 2022‏-yili 10‏-ayda, méhmanxanisi ushtumtut saqchilar teripidin qorshawgha élin'ghan. Méhmanxanidiki mulazimetchilerdin méhmanlarghiche hemmisi bir-birlep soraq qilin'ghan. Memet'éziz obulning özi béshigha qara xalta kiydürülüp qamaqxanigha élip kétilgen. Bu yil 50 yashlar chamisidiki memet'éziz obulning dostliri we a'ile tawabi'atliri, u tutqun qilin'ghan künidin étibaren uningdin héchqandaq xewer alalmighan.

Tor arxipliridin tekshürginimizde, “Rahet” méhmanxanisi qaghiliq nahiyesining bazar ichidiki döngmehellige jaylashqan. Biz döngmehelle ahaliler komitétining saqchi xadimigha téléfon qilip, memet'éziz obulning nöwettiki ehwali heqqide melumat soriduq.

Mezkur xadim, memet'éziz obulning 2 yildin béri tutqunda ikenlikini delillidi. Emma tutulush sewebi heqqide melumat bermidi.

Tordiki soda-karxanichilargha a'it bir arxipta, “Rahet” méhmanxanisining 2009‏-yili tijaret bashlighanliqi qeyt qilin'ghan, shundaqla arxipqa mezkur méhmanxanining 2011-yilidin 2021-yiligha qeder yilliq tijaret doklati höjjetlik matériyal sheklide qisturulghan. Uningda bu méhmanxanining 2022‏-yildin buyan tijaret doklati teyyarlighanliqi qeyt qilin'ghan.

Téléfonimizni qobul qilghan qaghiliq bazarliq saqchi xadimining déyishiche, memet'éziz obul qolgha élinishtin 10 yilche awwal, yeni 2012‏-yilliri méhmanxanisida bir diniy zatni yatquzghan. Sulayman isimlik bu diniy zat 2014‏-yili “Bölgünchilik” bilen eyiblinip késiwétilgen. Memet'éziz obul, eyni chaghda mezkur diniy zatqa körsetken dostluqi we ipadiligen hörmiti seweblik “Jinayetchini qanat astigha élish” gumani bilen qolgha élin'ghan. Mezkur saqchi xadimning delillishiche, memet'éziz obul tutulghan 20 aydin buyan, birqanche ret üstidin mexpiy sot échilghan, emma déloning tepsilati a'ile-tawabi'atlirigha we asasi qatlam saqchilirigha resmiy shekilde bildürülmigen.

Hörmetlik radiyo anglighuchilar, yuqirida qaghiliqtiki “Rahet” méhmanxanisining sahibi memet'éziz obulning “Jinayetchini qanat astigha élish” gumani bilen tutqun qilin'ghanliqi heqqide melumat berduq.