Германийә таратқулирида җаза лагерлири мәсилиси йәнила қизиқ тема болмақта

Ихтиярий мухбиримиз әкрәм
2019-05-07
Елхәт
Пикир
Share
Принт
23-Май германийәниң карлсруһә шәһиридә өткүзүлидиған җаза лагерлири тоғрисида мәхсус доклат бериш йиғини һәққидики тәшвиқат логоси.
23-Май германийәниң карлсруһә шәһиридә өткүзүлидиған җаза лагерлири тоғрисида мәхсус доклат бериш йиғини һәққидики тәшвиқат логоси.
RFA/Ekrem

Германийәдики мәшһур ахбарат қаналлири җаза лагерлири мәсилисини давамлиқ қизиқ тема сүпитидә тәшвиқ қилмақта.

2-Май күни кишилик һоқуқни көзитиш тәшкилати хитайниң уйғур дияридики назарәт системиси тоғрисида «хитайниң зулум һесаблири» намлиқ 68 бәтлик доклатини елан қилғандин кейин, германийә таратқулири бу һәқтә бәс-бәстә учурлар тарқатти.

Германийәдики дөләтлик 1-телевизийә қанили болған ARD «сақчи әп милйонлиған хитайлиқларни назарәт қилмақта» дәп учур бәрди. «Германийә радийоси» болса «мусулманларни назарәт қилишқа қарита етираз» намлиқ хәвәр елан қилди. Даңлиқ телевизийә қаналлиридин бири болған R T L «хитай мусулманларни сақчи әп билән назарәт қилмақта» дәп хәвәр тарқатти. «Қиззиқ линийә қанили» «кишилик һоқуқни көзитиш тәшкилати бир гәвдиләшкән бирләшмә уруш суписини ашкарилиди» дәп язди. Германийә авази радийоси «хитайниң назарәт системиси паш қилинди» дәп баян бәрди. «Баслер гезити» болса, «бу әп инсанларни тутқун қилиду» дәп мақалә елан қилди. «Business Insider» Қанили «ғәлитә җасуслуқ һәрикити: хитай бир әп билән уйғурларни назарәт қилмақта» дәп мәлумат бәрди. Бундин башқа шиветсарийәдә чиқидиған «йеңи зурүкликләр гезити» : «хитай һакимийити бир әп арқилиқ шинҗаңдики инсанларниң басқан һәрбир қәдәм изини назарәт қилмақта» дәп мәхсус мақалә язди. «T-Online» Қанили болса «хитай уйғурларни җаза лагерлирида тутмақта» дәп учур тарқатти.

Юқирида исми аталған қаналларниң һәммиси германийәдики әң даңлиқ ахбарат васитилири болуп, бу бир һәптә «үсти очуқ түрмә» дә яшаватқан уйғурларниң нөвәттики еғир вәзийити һәмдә җаза лагерлири мәсилиси германийәдә йәнә бир қетим кәң тәшвиқ қилинған бир һәптә болди.

Д у қ муавин рәиси пәрһат муһәммиди әпәндиниң баян қилишичә, америкадин қалса уйғурлар вә җаза лагерлири мәсилисигә әң җиддий көңүл бөлүватқан дөләт германийә болуп, германийә 2018-йили 8-айда б д т да җаза лагерлири мәсилисини тунҗи болуп оттуриға қойған һәм уни тақашни тәләп қилған дөләтләрниң бири санилидикән. Германийә президенти франк валтәр стайин майәр вә баш министир анҗила меркелму алдинқи йилидики хитай зияритидә уйғурлар мәсилисини оттуриға қойған. Германийә йәнә 2018-йили 11-айда җаза лагерлири мәсилисини парламентта 2 қетим мәхсус музакирә қилған. Германийә ташқи ишлар министири маас вә германийә парламенти кишилик һоқуқ комитетиниң рәиси көфлер ханим өткән йили 12-айда елип барған хитай зиярити мәзгилидә җаза лагерлири мәсилисини оттуриға қойған вә лагерларни зиярәт қилиш пикридә чиң турған, әмма уларниң тәлипи рәт қилинған. Бу йил 5-айниң 8-күни, чаршәнбә күни германийә парламенти җаза лагерлири тоғрулуқ мәхсус гуваһлиқ бериш йиғини уюштуриду.

Д у қ тәтқиқат комитетиниң мудири әнвәр әһмәт әпәндиниң баян қилишичә, уйғурлар вә җаза лагерлири мәсилисигә ялғуз германийә ахбарат васитилири җиддий көңүл бөлүпла қалмай, германийә дөлити вә бу әлдики һәр саһә кишилик һоқуқ органлириму җиддий көңүл бөлмәктикән. Хәтәр астидики хәлқләр тәшкилати мушу айниң 23-күни германийәниң карлсруһә шәһиридә мәхсус җаза лагерлири тоғрисида доклат бериш йиғини өткүзидикән.

Игилишимизчә, д у қ уйғурлар вә җаза лагерлири мәсилисини германийә парламентида даима күнтәртиптә тутуп туруш үчүн мушу айниң оттурилиридин башлап германийә пайтәхти берлинда мәхсус бир ишхана тәсис қилип, парламент билән д у қ оттурисида көврүклүк рол ойнайдиған бир система бәрпа қилидикән.

Пикирләр (0)
Share
Толуқ бәт