Jewher ilham: "Ottura hésab bilen her besh kiyim-kéchek shirkitining biri Uyghur mejburiy emgikige chétishliq"

Muxbirimiz nur'iman
2021-09-06
Share
Jewher ilham: "Luyis shin kiyim-kéchek layiheliri" ning bash layiheligüchisi luyish shin xanim "Uyghurlargha erkinlik" lozunkisini ishlewatmaqta. 2021-Yili 31-awghust.
Luyis Shin xanim teminligen

"Luyis shin kiyim-kéchek layiheliri" ning bash layiheligüchisi luyish shin xanim yéqinda achqan "Luyis shin kiyim-kéchek layiheliri" ning 2021-yilliq kiyim-kéchek körgermiside "Uyghurlargha erkinlik" dégen pilakatni öz qoli bilen achti. U radiyomizning ziyaritini qobul qilghanda, etrapidikilerning uninggha bu körgezmini bu xil shekilde achsa moda kiyim dunyasidiki nurghun pursetlerdin quruq qalidighanliqini iytqanliqini, emma u insanliqni tallaydighanliqini éytqanidi.

Körgezmidin kéyin luyis shin xanim muhajirettiki Uyghur baliliri üchün "I'ane toplash muraji'iti" chiqarghan, bu arqiliq muhajirettiki Uyghur balilarning arzulirini emelge ashurushqa yardem qilishni ümid qilghan. U yene özi eng tonushluq bolghan moda dunyasi arqiliq Uyghurlargha qaysi tereptin yardem qilalaydighanliqi heqqide izden'gen.

Luyis shin bash shitabi amérikada bolghan ishchilar hoquqi birleshmisining pirogramma yardemchisi we shundaqla birleshmining "Uyghur mejburiy emgikni toxtitish" programmisining bayanatchisi jewher ilham bilen alaqiliship, kiyim-kéchek sahesidiki Uyghur mejburiy emgek mesilsige diqqet tartish üchün pa'aliyet bashlighan.

Luyis shin xanim we jewher ilham 2-séntebir küni instégramda Uyghur mejburiy emgiki mesilisi heqqide neq meydan söhbet orunlashturghan. Neq meydan söhbitige dunyaning herqaysi jayliridiki her sahe kishiliri qatnashqan.

Jewher ilham aldi bilen ömürlük qamaqqa höküm qilin'ghan dadisi ilham toxti we nöwettiki Uyghurlarning weziyiti heqqide melumat bergen. Luyis shin xanim Uyghurlarning weziyitini bilgendin kéyin özining hayatining pütünley özgergenlikini, bu dunyadiki kishilerning meyli qaysiy din'gha étiqad qilishi yaki qaysiy irqqa tewe bolushisin qet'iynezer, aldi bilen insan bolushining eng muhim ikenlikini, kishilerning öz-ara ittipaqliship, kéchik özgertishler arqiliq chong özgirshlerni meydan'gha keltürüshini chaqirghan.

Jewher ilham moda dunyasining Uyghur mejburiy emgek mesiliside sükütte turuwélishing sewebliri heqqide toxtilip mundaq dégen: "Kiyim-kichek sahesi Uyghur mejburiy emgikige eng chitishliqi bolghan bir sahe. Chünki birinchidin, xitayda ishlepchiqirilghan paxta mehsulatlirigha ishletken paxtining 84 pirsenti Uyghur rayonida ishlepchiqirilidu. Bu dunyadiki 22 pirsent paxta mehsulatliri Uyghur rayonida ishlepchiqirilghan paxtidin yasalghan, dunyadiki besh kiyim-kéchek shirkitining birisi Uyghur rayonida ishlepchiqirilghan paxta mehsulatini ishiltidu dégenlik bolidu. Ikkinchidin, xitayning özining élan qilghan istatsitikisgha qarighanda, her yili bir milyon 270 ming kishi atalmish 'terbiyelesh merkezliri' de terbiyelinidiken. Ashkarilan'ghan höjjetlerge qarighanda, ular bu kishlerni zawut-karxanilarda mejburiy emgekke salidu. Ularning ichide proféssorlar, artistlar, sodigerler bar."

U yene peqet Uyghur rayonida ishlepchiqirilghan mallarni bayqut qilish arqiliq mejburiy emgektin saqlan'ghili bolmaydighanliqini, chünki xitay hakimiyitining Uyghurlarni xitayning ichidiki bashqa ölke-sheherlerge yötkep ishlitiwatqanliqni eskertken. Shundaqla peqet kéyim-kéchek sahesi emes, belki yéza-igilik mehsulatliri, éliktiron-téxinika mehsulatliri, quyash énirgiyesi, yéghip éytqanda xitayda yasalghan herqandaq mehsulatni sétiwalmasliqqa, bu arqiliq mejburiy emgekke séliniwatqan Uyghurlarni zulumdin qutulushigha yardem qilalaydighanliqni bildürgen.

Söhbet jeryanida luyis shin xanim we jewher ilham oxshashla moda dunyasidiki dangliq markilarning Uyghur mejburiy emgek mesilisini bilsimu, heqiqeten xitay bilen soda qilishni dawam qilishni tallawatqanliqni tekitlidi. Jewher ilham söhbetni körüwatqanlar eger qaysi markilarni bayqut qilishni bilelmey qalghan bolsa, ishchilar hoquqi birleshmisi achqan mejburiy emgekni toxtitish tor bétige kérip, mejburi emgekke chétishliq markilar heqqide tepsiliy melumatqa irishleydighanliqini eskertken.

Luyis shin xanim söhbetke qatnashquchilarning mushteri bolush süpiti bilen shirket-karxanilarning qararigha tesir kösiteleydighanliqini tekitligen.

Söhbetning axirida jewher ilham özi béshidin kechürgen heqiqiy weqelerge asasan yazghan "Chünki men qilishim kérek: hayat qélish yoli we Uyghurlarning kürishi" namliq ikkinchi kitabining 18-noyabir neshirdin chiqidighanliq xosh xewirini bergen. Bu kitabning élktironluq nusxisimu jewher ilhamning özining awaz bérishi bilen neshir qilinidiken.

Oxshash bir dölet chégrasi ichide tughulghan, emma teqdiri pütünley oxshimaydighan bu ikki yashning nöwettiki eng jiddi mesile-Uyghur mejburiy emgek mesilisi üstide teng tirishchanliq körsitishi, söhbetke qatnashquchilarni qattiq tesirlendürgen. Ular téximu köp kishilerning Uyghur mejburiy emgek mesilsige diqqet qilishni ümid qilishqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet