“едмонтон мираслар фестивали” да 4 уйғур чедири тикилгән

Канаданиң алберта өлкисиниң едмонтон шәһиридә 51- нөвәтлик “едмонтон мираслар фестивали” (Edmonton Heritage Festival) бу йил 3-авғусттин 5-авғустқичә өткүзүлгән

Канаданиң алберта өлкисиниң едмонтон шәһиридә йерим әсирдин буян өткүзүлүп келиватқан “едмонтон мираслар фестивали” (Edmonton Heritage Festival) 51- нөвәтлики бу йил 3-авғусттин 5-авғустқичә өткүзүлгән.

 Бу байрамда бу йил дуняниң һәр қайси җайлиридики 60 тәк дөләтниң охшимиған мәдәнийәт мираслиридин миллий музикиси, уссуллири, қол һүнәр-сәнити вә йемәк-ичмәккичә болған барлиқ мәдәнийәт-сәнәт өрнәклирини намаян қилинған. “уйғур дегән мушундақ” дегән нахшилар яңриған уйғур чедирлири, тамашибинлири әң көп чедирларға айланған.

Mukerrem Qurban

Мәзкур фестивалға уйғурларни тәшкиллигән алберта уйғур җәмийитиниң рәиси мукәррәм қурбан ханим, албертадики уйғур җамаитиниң бу фестивалға 3-қетим қатнишиши икәнлики, охшимиған дөләт вә милләтләрниң пүтүнләй мәдәнийәт-сәнәтләрни тонуштуруш түсини алған бу байрамда 4 чедир тикип, уйғурларниң мәдәнийәт вә сәнитини интайин зор пәхирлик вә иптихарлиқ илкидә тонуштурғанлиқини билдүрди.

Мукәррәм ханим бу нөвәт техиму көп уйғурларниң күч қетиши билән йәниму яхши үнүм һасил болғанлиқини билдүрди. Бу фестивалға қатнишишниң өзи вә уйғурлар үчүн әң әһмийәтлик тәрипи һәққидә гәп болғанда у: “ирқи қирғинчилиқ қиливатқан хитайму алаһидә чоң чедир тиккән бу байрамда, биз уйғурларниңму мустәқил һалда, шәрқий түркистан байриқи рәңгидә, шундақла дөләт герби чүшүрүлгән ‛уйғур‚ дәп йезилған чедирларни тикәлишимиз зор мәниви әһмийәткә игә утуқ” дәйду.

Mukerrem Qurban

Мукәррәм ханим йәнә, уйғурларниң башқа мустәқил дөләтләр билән тәң қатарда, өз миллитиниң мәдәнийитини тонуштурғанлиқи вә бу арқилиқ уйғурларниң һәргизму йоқап кәтмәйдиғанлиқини, уйғурларниң өз мәдәнийәт мираслириға игә чиқидиғанлиқи, уни есил вә илғар мәдәнийәтләр қатарида давамлиқ мәвҗутлуқини сақлап қелиш ирадисини намайәндә қилғанлиқидин бәкму хушал икәнликини билдүрди.

Уйғурлар “едмонтон мираслар фестивали” (Edmonton Heritage Festival) ға тунҗи қатнишиши биләнла, байрам уюштурғучилириниң яхши баһасиға, әһмийәт беришигә вә йүз миңлиған байрам иштиракчилириниң алаһидә қизиқиши һәм алқишиға еришип кәлмәктә. Бултур өткүзүлгән “едмонтон мираслар фестивали” да уйғурлар есил мәдәнийәт-сәнәт номурлири вә тамақлири билән 1-орунни алғаниди. Шу қетимда уйғур ләғмини даң чиқарған вә фестивалдики ‛әң ләззәтлик тамақ‚ дәп баһаланғаниди.

Мәзкур байрамда актип хизмәт қилғучи вә уйғур чедирини тәшкиллигүчиләрниң бири болған мукәррәм ханимниң қизи мәһлияниң тонуштурушичә, уйғур чедирлири уйғур гиләмлири, музика әсваблири, һәр түрлүк рәңдар доппилар билән безәлгән вә уйғур яшлири вә балилири уйғур нахша-музикилирини орунлиған. Уйғур нахша музикилири яңрап турған, мәззилик уйғур таамлириниң хуш пурақлири билән толған уйғур чедири кишиләрни тохтимай өзигә җәлп қилған. Айиғи үзүлмигән тамашибинлар уйғур усуллирини өгинип биллә сама ойниған. Бу мәнзирә фестивалға күч қатқан, вақтини сәрп қилған уйғурларни бәкму хушал қилғаникән.

Mukerrem Qurban

 Едмонтон мирас фестивали канададики әң көп адәм иштирак қилидиған байрамларниң бири, бу чоң фестивалда һәр қайси дөләтләрниң исимлири билән чедирлар тикилидиған болуп, чедирларда һәр хил дөләтләрниң миллий йемәклик, миллий кийим вә өзлиригә хас миллий мәдәнийәт хатирә буюмлири көргәзмә қилиниду. Уйғурлар йеқинқи 3 йилдин буян мустәқил бир айрим милләт сүпитидә өз мәдәнийәт мираслирини көрситип кәлмәктә. Шундақла һәр хил васитиләрдин пайдилинип уйғурларниң вәзийитини вә уларниң әркинлик арзулириниму намайәндә қилип кәлмәктә.

Мәһлия йәнә, уйғур җамаитиниң бу хәлқаралиқ фестивалға қатнишишни бара-бара өзиниң бир әнәнисигә айландуруватқанлиқини билдүрди.