“Édmonton miraslar féstiwali” da 4 Uyghur chédiri tikilgen

Kanadaning albérta ölkisining édmonton shehiride 51- nöwetlik “Édmonton miraslar féstiwali” (Edmonton Heritage Festival) bu yil 3-awghusttin 5-awghustqiche ötküzülgen

Kanadaning albérta ölkisining édmonton shehiride yérim esirdin buyan ötküzülüp kéliwatqan “Édmonton miraslar féstiwali” (Edmonton Heritage Festival) 51- nöwetliki bu yil 3-awghusttin 5-awghustqiche ötküzülgen.

 Bu bayramda bu yil dunyaning her qaysi jayliridiki 60 tek döletning oxshimighan medeniyet mirasliridin milliy muzikisi, ussulliri, qol hüner-sen'iti we yémek-ichmekkiche bolghan barliq medeniyet-sen'et örneklirini namayan qilin'ghan. “Uyghur dégen mushundaq” dégen naxshilar yangrighan Uyghur chédirliri, tamashibinliri eng köp chédirlargha aylan'ghan.

Mukerrem Qurban

Mezkur féstiwalgha Uyghurlarni teshkilligen albérta Uyghur jem'iyitining re'isi mukerrem qurban xanim, albértadiki Uyghur jama'itining bu féstiwalgha 3-qétim qatnishishi ikenliki, oxshimighan dölet we milletlerning pütünley medeniyet-sen'etlerni tonushturush tüsini alghan bu bayramda 4 chédir tikip, Uyghurlarning medeniyet we sen'itini intayin zor pexirlik we iptixarliq ilkide tonushturghanliqini bildürdi.

Mukerrem xanim bu nöwet téximu köp Uyghurlarning küch qétishi bilen yenimu yaxshi ünüm hasil bolghanliqini bildürdi. Bu féstiwalgha qatnishishning özi we Uyghurlar üchün eng ehmiyetlik teripi heqqide gep bolghanda u: “Irqi qirghinchiliq qiliwatqan xitaymu alahide chong chédir tikken bu bayramda, biz Uyghurlarningmu musteqil halda, sherqiy türkistan bayriqi renggide, shundaqla dölet gérbi chüshürülgen ‛Uyghur‚ dep yézilghan chédirlarni tikelishimiz zor meniwi ehmiyetke ige utuq” deydu.

Mukerrem Qurban

Mukerrem xanim yene, Uyghurlarning bashqa musteqil döletler bilen teng qatarda, öz millitining medeniyitini tonushturghanliqi we bu arqiliq Uyghurlarning hergizmu yoqap ketmeydighanliqini, Uyghurlarning öz medeniyet miraslirigha ige chiqidighanliqi, uni ésil we ilghar medeniyetler qatarida dawamliq mewjutluqini saqlap qélish iradisini namayende qilghanliqidin bekmu xushal ikenlikini bildürdi.

Uyghurlar “Édmonton miraslar féstiwali” (Edmonton Heritage Festival) gha tunji qatnishishi bilenla, bayram uyushturghuchilirining yaxshi bahasigha, ehmiyet bérishige we yüz minglighan bayram ishtirakchilirining alahide qiziqishi hem alqishigha ériship kelmekte. Bultur ötküzülgen “Édmonton miraslar féstiwali” da Uyghurlar ésil medeniyet-sen'et nomurliri we tamaqliri bilen 1-orunni alghanidi. Shu qétimda Uyghur leghmini dang chiqarghan we féstiwaldiki ‛eng lezzetlik tamaq‚ dep bahalan'ghanidi.

Mezkur bayramda aktip xizmet qilghuchi we Uyghur chédirini teshkilligüchilerning biri bolghan mukerrem xanimning qizi mehliyaning tonushturushiche, Uyghur chédirliri Uyghur gilemliri, muzika eswabliri, her türlük rengdar doppilar bilen bézelgen we Uyghur yashliri we baliliri Uyghur naxsha-muzikilirini orunlighan. Uyghur naxsha muzikiliri yangrap turghan, mezzilik Uyghur ta'amlirining xush puraqliri bilen tolghan Uyghur chédiri kishilerni toxtimay özige jelp qilghan. Ayighi üzülmigen tamashibinlar Uyghur usullirini öginip bille sama oynighan. Bu menzire féstiwalgha küch qatqan, waqtini serp qilghan Uyghurlarni bekmu xushal qilghaniken.

Mukerrem Qurban

 Édmonton miras féstiwali kanadadiki eng köp adem ishtirak qilidighan bayramlarning biri, bu chong féstiwalda her qaysi döletlerning isimliri bilen chédirlar tikilidighan bolup, chédirlarda her xil döletlerning milliy yémeklik, milliy kiyim we özlirige xas milliy medeniyet xatire buyumliri körgezme qilinidu. Uyghurlar yéqinqi 3 yildin buyan musteqil bir ayrim millet süpitide öz medeniyet miraslirini körsitip kelmekte. Shundaqla her xil wasitilerdin paydilinip Uyghurlarning weziyitini we ularning erkinlik arzulirinimu namayende qilip kelmekte.

Mehliya yene, Uyghur jama'itining bu xelq'araliq féstiwalgha qatnishishni bara-bara özining bir en'enisige aylanduruwatqanliqini bildürdi.