Kanadada ötküzülgen xongkongni qollash birleshme namayishida Uyghur mesilisimu otturigha qoyulghan
2019.09.24
Kanada sherqiy türkistan birleshmisining orunlashturushida 22-séntebir, yeni yekshenbe küni kanadaning toronto, kalgari sheherliride xongkongluqlarni qollash birleshme namayishi ötküzüldi.
Melum bolushiche, namayishni kanadadiki xongkongni qollash jem'iyiti, “Bir erkin dunya” teshkilati, tibet teshkilatliri xitay démokratchiliri qatarliqlarni öz ichige alghan 10 teshkilat birlikte orunlashturghan.
Kanada sherqiy türkistan birleshmisining re'isi tuyghunjan ependining bildürüshiche, mezkur namayish gerche nöwette xongkongdiki démokratiyini qoghdash namayishigha awaz qoshush üchün orunlashturulghan bolsimu, emma namayish meydanidiki sherqiy türkistanning ay-yultuzluq kök bayriqi we Uyghur namayishchilar muxbirlarning diqqet nuqtisi bolghan.
Tuyghunjan ependining bildürüshiche, namayish meydanida kanada sherqiy türkistan birleshmisining Uyghurlar uchrawatqan siyasiy, diniy, medeniyet jehettiki basturulush weziyitige da'ir teshwiqat waraqliri we taxtaylar shundaqla 3 milyon'gha qeder Uyghurning lagérlargha qamilish weziyiti heqqidiki bayanatlar muxbirlarning diqqitini tartqan. Kanadadiki Uyghur pa'aliyetchiliridin memet toxti, ruqiye turdush qatarliqlarning nöwettiki Uyghur weziyiti heqqidiki analizliri kanada dölet téléwiziyisi qatarliq birqanche taratqularning xewerliridin orun alghan.
Kanadadiki “Xongkongni qollash jem'iyiti” ning bashliqi gloriye fang xanimmu ziyaritimizni qobul qilip, kanadada yéngi bir nöwetlik bash ministir saylimidin ilgiri “Xongkongni qollash” namida bir qanche qétimliq naraziliq pa'aliyetliri orunlashturulghanliqini bildürdi.
Gloriye fang xanim yene xitay hökümitige qarshi élip bériliwatqan naraziliq pa'aliyetlirining meqsiti we ehmiyiti heqqide toxtaldi.
U bayanida sherqiy türkistandiki Uyghurlarning basturulush weziyitining kanada we gherb démokratik döletliri taratqulirida diqqet nuqtisigha aylan'ghanliqi, xongkongluqlardimu Uyghurlarning bügünki weziyitining xongkongning etisi bolup qélishidin ensiresh keypiyati kücheygenlikini otturigha qoydi. U yene xongkongda we dunyaning herqaysi jaylirida xongkong yashlirining xitay hökümitige qarshi démokratiye telep qilish herikitini qollash namayishlirining keng-kölemde élip bériliwatqanliqi we köp xil mezmunlar boyiche dawamlishiwatqanliqini bildürdi.
Tuyghunjan ependi kanada sherqiy türkistan birleshmisi, “Bir erkin dunya teshkilati”, “Xongkongni qollash jem'iyiti”, tibet we xitay démokratliri qatarliq 10 teshkilat bilen birlikte, 9-ayning axirqi heptiside xitay hökümitige qarshi birqanche qétimliq naraziliq pa'aliyiti élip bérishni qarar qilghanliqini bildürdi.
Tuyghunjan ependi yene yéqinqi üch aydin buyan xongkongda dawamlishiwatqan naraziliq namayishi seweblik kanada qatarliq gherb démokratik döletliridiki musteqil taratqularda xongkong weziyiti diqqet nuqtisigha ayliniwatqanliqini, Uyghurlarningmu xongkongni qollash namayishlirigha ishtirak qilishining xongkong mesilisi bilen birlikte Uyghurlar weziyitining qaytidin diqqet nuqtisigha aylinishida muhim ehmiyetke ige ikenlikini bildürdi.
Ziyaritimiz axirida tuyghunjan ependi yene kanada sherqiy türkistan birleshmisining dunya Uyghur qurultiyining chaqiriqi we orunlashturushida 1-öktebir xitayning dölet bayrimi künide kanadada xitaygha qarshi zor kölemlik naraziliq namayishi élip bérishni qarar qilghanliqini bildürdi. Nöwette féysbuk qatarliq ijtima'iy taratqularda kanadaning herqaysi sheherliridiki Uyghurlarni namayishqa seperwer qilishning bashlan'ghanliqini bildürdi.
Yuqiriqi awaz ulinishidin programmining tepsilatini anglaysiler.