Канада баш министири трудо уйғур мәсилисидә хитайға қарши қаттиқ тәдбир қоллинишқа чақирилди

Мухбиримиз меһрибан
2020-12-14
Share
Канада баш министири трудо уйғур мәсилисидә хитайға қарши қаттиқ тәдбир қоллинишқа чақирилди Канада баш министири җастин трудо ахбарат елан қилиш йиғинида. 2020-Йили 11-декабир, канада.
REUTERS

10-Декабирдики "хәлқара кишилик һоқуқ күни" дә канада парламентида муһакимә йиғини ечилип, трудо һөкүмитиниң уйғурлар мәсилисидә хитайға қарши қаттиқ тәдбир қолланмиғанлиқи тәнқидләнди.

Мәлум болушичә 10-декабир күни канада парламентида ечилған муһакимә йиғинида уйғурлар мәсилиси сәвәбидин талаш-тартиш болған.

Йиғинда канада парламент әзалиридин өктичи партийәниң вәкили кларик флаймәнт 10-декабир кишилик һоқуқ күнидә уйғурлар мәсилисини алаһидә оттуриға қойған. У канада трудо һөкүмитиниң уйғурларниң бастурулуш вәзийитигә нисбәтән, хитай һөкүмитигә қарита, һазирға қәдәр әмәлий болған қаттиқ тәдбир қолланмиғанлиқини тәнқидлигән. У сөзидә йәнә канада һөкүмитиниң хитай һөкүмитиниң милйонлиған уйғурни лагерларға қамап инсаний қирғинчилиқ йүргүзүшигә сүкүттә туруватқанлиқини қаттиқ тәнқидлигән. У сөзидә трудо һөкүмитигә соал қоюп, хитай коммунист һөкүмитиниң уйғурларни бастурушиға васитилик ярдәмдә болидиған қилмишларда болуватқанлиқиниң нәқили сүпитидә, канаданиң хитайниң хәлқ азадлиқ армийәсиниң канадада һәрбий тәлим елиши вә мәшиқ қилишиға йол қоюштәк һәмкарлиқларда болуватқанлиқини тилға елип, буни "қобул қилғили болмайдиған қилмиш" дәп әйиблигән.

10-Декабир йәнә канаданиң онтарийо өлкисидики "шәрқий түркистан җәмийити" башлиқи туйғун абдувәли әпәнди, "тибәт яшлар һәрикити" ниң муавин рәиси сүнний сонам әпәнди вә хитай демократлиридин хоңкоңлуқ пеггй леуң ханим бирликтә 8-декабир күни башлиған ачлиқ елан қилиш намайишиниң ахирқи күни.

Туйғун абдувәли әпәнди зияритимизни қобул қилип, бу үч күнлүк ачлиқ елан қилиш намайишиниң әһвали вә намайишниң мәқсити һәққидә тохталди.

Униң билдүрүшичә, 8-9-декабир күнлири әтигән саәт 8 дин чүштин кейин саәт 6 гичә давамлашқан ачлиқ елан қилиш намайиши онтарийо парламент бинаси алдида елип берилған.

Туйғун әпәндиниң билдүрүшичә, улар ачлиқ елан қилиш намайишида, канада һөкүмитиниң уйғур, тибәт вә хоңкуңлуқларниң бастурулуш вәзийитигә қарита, хитай һөкүмитигә техиму әмәлий болған қаттиқ тәдбирләрни қоллинишини тәләп қилип трудо һөкүмитигә мәктуп тапшурған.

10-Декабир хәлқара кишилик һоқуқ күнидики ачлиқ елан қилиш паалийити болса, онтарийодики хитай консулханиси алдида елип берилған. Шу күни чүш саәт 1 дә хитай консулханисиға наразилиқ мәктупи тапшурулуп, хитай һөкүмитидин уйғурлар, тибәтләр вә хоңкуңлуқларға йүргүзүватқан бастурушини тохтитиши, хитай һөкүмити тәрипидин икки йилдин буян тутуп турулуватқан канада пуқраси ту майколни қоюп бериши тәләп қилинған.

Туйғун әпәндиниң билдүрүшичә, 10-декабир канаданиң һаваси нөлдин төвән 15 градус болған болсиму, әтигән саәт 8 дин башлап, хитай консулханиси алдида ачлиқ елан қилишни башлиған. Ачлиқ елан қилған үч нәпәр паалийәтчидин башқа йәнә уларға мәдәт бериш үчүн бу тәшкилатларниң әзалиридин 20 дин 30 қичә адәм намайиш мәйданиға топланған.

3 Күндин буян ачлиқ елан қилишни давамлаштуруватқан канада тибәт яшлар һәрикитиниң муавин рәиси сүнний сонам әпәндиму намайиш нәқ мәйданидин радийомиз зияритини қобул қилди.

У баянида, нөвәттә хитайдин тарқалған корона вируси юқуми сәвәблик канадада нурғун кишиләрниң ишсиз қелип, иқтисадий қийинлашқанлиқи, иҗарә пулини тапшуралмайватқанлиқи вә канадада хитайға қарши наразилиқ күчийиватқанлиқини билдүрди.

У хитай һөкүмранлиқи астидики шәрқий түркистан, тибәт вә хоңкоңда һечқандақ инсан һәқлири болмиғанлиқи, уйғурлар, тибәтләр вә хоңкуңлуқлар учраватқан бастурулуш вәзийитигә дуняниң йәнила етибарсиз қараватқанлиқини билдүрүп, бу хил зулумни канада хәлқигә аңлитиш, болупму канада һөкүмитини хитайға қарши қаттиқ тәдбир қоллинишқа чақиришниң муһимлиқини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт