Amérikaning dangliq karton filimi "Jenubiy baghche" da xitaydiki lagér we pikir erkinliki mesilisi téma qilindi

Muxbirimiz irade
2019-10-08
Élxet
Pikir
Share
Print
"Jenubiy baghche" karton filimning 2-öktebir küni tarqitilghan 23-pesillik 2-qismidin süretke élin'ghan.
"Jenubiy baghche" karton filimning 2-öktebir küni tarqitilghan 23-pesillik 2-qismidin süretke élin'ghan.
southpark.cc.com

"South Park" yeni "Jenubiy baghche" amérikada 1997-yili qoyulushqa bashlighandin béri kündilik ijtima'iy we siyasiy mesililerni téma qilghan özgiche uslubi bilen yuqiri körülüsh nisbitige ériship shöhret qazan'ghan chonglar karton filimidur. U "Émmiy téléwiziye mukapati" qatarliq nopuzluq mukapatlargha érishish bilen birge yene "Oskar filim mukapati" gha namzat körsitilgen.

Amérikadiki keng ammigha xitab qilidighan mushundaq bir karton filimning 2-öktebir küni tarqitilghan 23-Pesillik 2-qismida xitaydiki siyasiy weziyet we u keltürüp chiqiriwatqan aqiwetler bash téma qilindi. Mezkur karton filimi amérikining kolorado shtatida yashaydighan stan marsh, kayli broflowiski, érik kartmen, kénniy makkormék qatarliq 4 oghul bala pérsonazhning hékayiliri asasida dawam qilidu. Kolorado shtati amérikida kendir térish we sétish qanunluq qilin'ghan az sandiki shitatlarning biri bolup, karton filimning 2-öktebir künidiki sani bash pérsonazh stan marshning kendir étizliqi bolghan déhqan dadisi randiyning bir küni tuyuqsizla bay bolush üchün xitaygha oxshash köp nopusluq bir döletke bérip tijaret qilishtin ibaret bir oy-pikirge kélishi bilen bashlaydu. Dada randiy xitaygha qarap yolgha chiqqan bilen oxshash waqitta yene uning oghli stanmu bir muzika guruppisi quridu we shöhret qazinish koyigha chüshidu.

Randiy xitaygha neshe apirip sétip bay bolushtin ibaret addiy bir xiyal bilen bir chamadanni kendir bilen tolduridu-de, ayropilan'gha chiqidu. U ayropilan'gha chiqqanda bay bolush xiyali bilen xitaygha qarap yolgha chiqqan gugil shirkiti, NBA waskitbolchiliri we kiyim-kéchek sodigerliri bilen bir qatarda yene holliwud filimliridiki "Tömür adem", "Qar melike" qatarliq dangliq pérsonazhlarni köridu we özige "Xitayda adem jiq bolghandin kéyin hemmimizge yétidu," dep özini teselli béridu.

U xitaygha yétip kelgendin kéyin chamadanida kendir bolghanliqtin ayrudorumda tutqun qilinip lagérgha qamilidu. "Jenubiy baghche" karton filimining bu qismida Uyghur élide nöwette 2 milyondin artuq kishi qamilip, kündilik ménge yuyush herikitige uchrawatqanliqi we shundaqla ularning lagér etrapida qurulghan zawutlarda mejburiy emgekke séliniwatqanliqidek weziyetni obrazliq halda yorutup bergen. Randiy lagérda kishenlinidu, tayaq yeydu we bir zawutta mejburiy emgekke sélinidu. U bu jeryanda bashqilarning qéyin-qistaqqa élin'ghanliqini köridu. Bir küni saqchi uning qoligha bir parche qeghezni tutquzup, uni qiynap turup qolidiki qeghezni oqushqa buyruq qilidu. Buning bilen u qeghezge yézilghan "Men xitay kompartiyesining ezasi bolghanliqimdin tolimu pexirlinimen. Partiye shexistinmu muhim orunda turidu" dégen sözlerni oquydu. U yene birining lagérdiki saqchi teripidin neq meydanda étip öltürülgenlikini köridu.

Mezkur karton filimda yene lagér kamérlirining adem bilen tolup-tashqanliqi we tutqunlarning hajet ishliriningmu yene shu kamérda bolidighanliqimu yorutup bérilgen. Randiy yene bashqa bir kamérda amérikadiki qonchaq filim obrazi bolghan winni namliq éyiqchaqning we uning sepdishiningmu qamalghanliqini bayqaydu.

Winni xitay dölet re'isi shi jinping hakimiyetke chiqqan yillarda xitay intérnét torlirida keng tor ammisi teripidin shi jinpingge simowl qilinip, ishlitilgenliktin xitayda cheklen'gen bir karton obrazi idi. Randiy uningdin némishqa bu yerdilikini sorighanda éyiqning sepdishi randiygha "Bezi xitay tordashlar uni shi jinpingge oxshitiptiken, shunga biz xitayda qanunsiz bolup qalduq," deydu.

Kéyin randiy sotqa chiqirilidu. Uning aldida jaza mudditi toshqan bir xitay tutqun "Men emdi hergizmu xitay kompartiyesige qarshi chiqmaymen" dep shunche yalwursimu, sotchi uni yene on yil qoshup jazalashni höküm qilidu.

Arqidin randiy meydan'gha élip kirilidu. Randiy sot meydanigha kirgendin kéyin töwendikilerni deydu: "Hörmetlik sotchi, men peqet adettiki bir déhqan we men burun xitaygha kélip baqmighan. Emma men epsuslinish ichide shuni démekchimenki, men silerdin bek ümidsizlendim. Siler öz xelqinglargha ular xuddi bir exlettek mu'amile qilidikensiler. Siler kishilik erkinlik dégen'ge ishenmeydikensiler, siler hetta éyiq winninimu qamap qoyupsiler. Silerge shuni dep qoyay, bir dölette heqqaniyliq we adilliq bolmaydiken, u dölet héchnémige barawer emes."

Mezkur karton filim yazghuchiliri amérikaliq tijaretchilerning axiri bérip pul tépish bedilige xitayda yüz bériwatqan kishilik hoquq depsendichiliklirige köz yumushni tallash we hetta uninggha yantayaq bolushtek bir weziyetnimu yorutup bergen. Chünki filimning dawamida randiy axiri xitayda kendir satidighan, emma buning üchün aldi bilen xitay re'is shi jinpingning oghisini qaynitiwatqan éyiqchaqni közdin yoqutushqa yardem qilidighan bolidu. U bir küni türmidin chiqqan winni éyiqchaqni boghup ölturidu-de, axiri xitaydiki sodisi yürüshüp, pulgha kömülidu.

Mezkur karton filimdiki ikkinchi weqelik bolsa randiyning oghli sitanning muzika guruppisi qurup, shöhret qazinish arzusi idi. Karton filim bu arqiliq amérika filim sahesi bolghan holliwudning xitayning cheklimisi astida qalghanliqidek bir weziyetni yorutqan. Mesilen, stanning muzika guruppisi bir küni melum bir filim ishligüchining diqqitini tartidu. U kishi guruppini tonutush meqsitide aldi bilen ularni tonushturidighan filim ishlesh kéreklikini éytidu we bu muzika guruppa ezaliridin bu guruppining qachan we néme meqsette qurulghanliqidek so'allarni soraydu. Aridin biri, özining dangliq naxshichi jon léninning dalay lama bilen körüshken waqtidiki widiyoliridin tesirlinip muzikigha bashlighanliqini éytsa, yene biri özining winni éyqchaqni yaxshi köridighanliqini éytidu. Buning bilen filim ishligüchi derhal ulargha "Dalay lamani we éyiqchaqni tilgha élishqa bolmaydighanliqini, bolmisa xitaylarning narazi bolidighanliqi" ni éytidu. Ular buningdin tolimu heyranliq hés qilidu. Filim ishligüchi chüshendürüp, "Xitay körgüchiler bolmay turup, pul tapqili bolmaydighanliqini, shunga xitaylarni xapa qilip qoyushqa bolmaydighanliqi" ni eskertip: "Eger sen xitayning puraqliq chéyini ichmekchi bolsang, erkinlik ölchimingni töwenlitishing kérek" deydu.

Cheklimiler buning bilenla tügep qalmaydu. Filim ishligüchi yene ulardin xitay hökümiti organ tijariti bilen shughullandi, dep eyibliniwatqanliqi üchün organ yaki ichki eza dégen sözni tilgha almasliqi, oxshash jinsliqlar mesilisi dégenlernimu tilgha almasliq heqqide agahlanduridu. Axiri xitay saqchiliri özi kélip sitan yazghan tonushturushni tüzitishke, özige yaqmighan qisimlirini öchürüshke bashlaydu. Buninggha chidimighan sitan axiri bérip, shöhret qazinish arzusidinmu waz kéchidu we "Men pul tépish bedilige rohumni silerge satalmaymen. Men u étizliqtin qutulup kétishni shunchilik arzu qilimen. Emma buni dep men dölitimning sen'itini xitay hökümiti kontrol qilidighan bir dunyada yashashni xalimaymen. . . Men özümning kimlikimdin pexirlinimen we herqandaq bir kishi pul bedilige özining idiyeliridin waz kéchidiken, u halda u bir tükürükchilikmu qimmiti yoq" deydu.

Yuqiriqi bu filim axiri sitanning dadisi randiyning xitaygha masliship, winni éyiqchaqni öltürüsh bedilige bay bolghanliqini bilip, bu heqte bir muzika ishlimekchi bolushi we xitayda kendirning keng omumlishishidek bir menzire bilen ayaghlishidu.

Mezkur karton filimi körsitilgendin kéyin ijtima'iy taratqularda küchlük ghulghula qozghidi. Bolupmu lagérlar mesilisining tilgha élinishi Uyghurlarning küchlük alqishigha érishti. Bügün "Holliwud xewerliri" gézitining xewer qilishiche, "Jenubiy baghche" ning 2-öktebir künidiki qismida xitay we uning kontorolida qalghan holliwod qattiq tenqidlen'genliktin xitay hökümiti mezkur karton filimni xitayda chekligen. Uning pütün qisimliri we hetta u heqtiki munazirilermu xitaydiki torlardin pütünley öchürülgen iken.

Bügün yene mezkur karton filimni ishligüchiliri tréy parkér we met ston ikkisi nahayiti qiziqarliq bir bayanat élan qilish arqiliq xitayning cheklimisige inkas qayturdi. Ular bayanatida " Bizmu xuddi NBA ge oxshashla xitayning cheklimilirini qarshi alimiz we uni öylirimizge, yürikimizge ornitimiz. Bizmu pulni erkinlik we démokratiyedin bekrek yaxshi körimiz. Shi jinping hergizmu winni éyqchaqqa oxshimaydu. Aldimizdiki charshenbe küni sa'et onda qoyulidighan 300 - qisimni körünglar. Ulugh xitay kompartiyesi uzun yashighayla! küz pesili mol hosulluq bolghusi! emdi boldimu,  biz yariship  qalduqmu, xitay?" dégen.

Pikirler (0)
Share
Toluq bet