Amérikaning "Bayraq küni" de Uyghurlarmu kommunizm qurbanlirini xatirilesh murasimigha qatnashti

Muxbirimiz méhriban
2019-06-14
Élxet
Pikir
Share
Print
Washin'gtonda ötküzülgen kommunizm qurbanlirini xatirilesh murasimidin bir körünüsh. 2019-Yili 14-iyun. Washin'gton, amérika.
Washin'gtonda ötküzülgen kommunizm qurbanlirini xatirilesh murasimidin bir körünüsh. 2019-Yili 14-iyun. Washin'gton, amérika.
RFA/Mehriban

14-Iyun küni amérikaning "Bayraq küni" bolup, bu kün herbiyler bayrimi hésablinidu. Bu künde dunyaning herqaysi jayliridiki erkinlik üchün qilin'ghan jenglerde qurban bolghan amérika eskerliri xatirilinip, ulargha gülchembirekler teqdim qilinidu. Bu künde yene amérikadiki kommunizm qurbanlirini xatire fondi teripidin amérika paytexti washin'gtonda dunyaning herqaysi jaylirida kommunizm réjimining ziyankeshlikige uchrighan qurbanlarni xatirilesh pa'aliyitimu ötküzülüp kélinmekte.

Bu yilliq kommunizm qurbanlirini xatirilesh murasimi bundin 12 yil ilgiri amérika prézidénti jorj boz dewride amérika paytexti washin'gtonning néw-jérsi kochisi bilen massachuséts kochisining késishken jayigha ornitilghan erkinlik heykili meydanida 14-iyun küni etigen sa'et 9 da ötküzülgen.

Bu yilliq pa'aliyetke ilgiri kommunistik réjimning ziyankeshlikige uchrighan sherqiy yawropa, asiya we latin amérikisidiki 20 din artuq döletning washin'gtondiki elchixanisida ishleydighan diplomatlar, kishilik hoquq teshkilatliri, washin'gtonda pa'aliyet élip bériwatqan Uyghur teshkilatliri we bir qisim Uyghur pa'aliyetchilirimu teklip bilen qatnashqan.

Murasimgha qatnashqan Uyghur pa'aliyetchiliridin amérikadiki "Uyghur herikiti" teshkilatining bashliqi roshen abbas xanim ziyaritimizni qobul qildi. U mezkur pa'aliyette kommunizm qurbanliri qatarida xitay kommunist hakimiyitining ziyankeshlikige uchrighan tyen'enmin qurbanliri, Uyghurlar we tibetlerningmu tilgha élin'ghanliqini, pa'aliyet dawamida kommunizm qurbanlirigha atap xatire munarigha gülchembireklerning qoyulghanliqini bayan qildi.

Mezkur pa'aliyetke riyasetchilik qilghan kommunizm qurbanliri xatire fondining bashliqi mariyon smit ependi we mezkur fondning mes'ulliridin doktor léé édward qatarliqlarmu söz qildi. Ular bayanlirida sabiq sowét ittipaqi, sherqiy gérmaniye, polsha, albaniye, chéxislowakiye, ruminiye, wén'giriye qatarliq döletler, asiyadiki xitay, shimaliy koréye, wiyétnam qatarliq döletler we jenubiy amérikadiki kuba qatarliq döletlerdiki kommunizmning ziyankeshlikige uchrighan qurbanlarni untup qalmasliqqa chaqirghan. 

Amérikadiki Uyghur kishilik hoquq qurulushining tetqiqatchisi zubeyre shemsidin xanimu ziyaritimizni qobul qilip, mezkur pa'aliyette xitay kommunist hakimiyiti astida hélihem ziyankeshlikke uchrawatqan xelqler heqqidiki bayanlarning özige intayin chongqur tesir qilghanliqini bildürdi.

Murasimda yene 2019-yilliq "Troman-régan erkinlik mukapati" ning soghuq munasiwetler urushi mezgilide wezipe ötep, 1974-yili pénsiyige chiqqan sabiq uchquchi kolga'il xalwérson'gha bérilgenliki élan qilin'ghan. 

Roshen xanim bu heqte toxtalghinida bundin birqanche yillar ilgiri mezkur mukapatning dunya Uyghur qurultiyining re'isi dolqun eysa ependigimu bérilgenlikini eskertip ötti.

Toluq bet