Xitay wirusshunas korona wirusining laboratoriyede yasalghanliqini ilgiri sürgen
2020.09.13
Xitay wirusshunas doxtur li méngyen korona wirusining laboratoriyede yasalghan wirus ikenlikini ispatlaydighan penniy pakitliri barliqini ilgiri sürgen.
“Nyu-york pochtisi” gézitining xewer qilishiche, doxtur li méngyen öz bixeterlikidin ensirep yoshurunup yürgen bolup, u yéqidin buyan yene otturigha chiqip korona wirusining xitayda yasalghanliqni otturigha qoyghan.
U jüme küni en'gliyedin tarqitilidighan “ITV” qanilining söhbet programmisida öziningmu ötken yili korona wirusining deslepki basquchluq tetqiqatigha qatnashqanliqini éytqan.
U, bu wirusning qeyerde yasalghanliqi heqqidiki so'allargha jawab bérip: “U wuxendiki bir laboratoriyedin tarqalghan. Bu bir xitay hökümiti kontrolluqidiki laboratoriye” dégen.
U yene mezkur wirusning wuxendiki bir déngiz mehsulatliri baziridin tarqaldi, dégen sözlerning bir köz boyamchiliq ikenlikini bildürgen we mundaq dégen: “Bu wirus tebi'ettin kelgen emes. Men bu axbaratlarni yerlik doxturlar we xitay yuqumluq késelliklerning aldini élish organliridin igilidim.”
Doxtur li méngyen esli xongkong ammiwi saghlamliq uniwérsitétidiki bir laboratoriyede ishligen bolup, u 2019-yili dékabirdila bu wirusning ademdin ademge yuqidighanliqi heqqide agahlandurush bergende uning bashliqi uni aghzini yumushqa buyrughan.
Uning éytishiche, u mezkur wirusning mahiyitini dunyagha ashkarilash üchün bu yil aprélda amérikigha qéchip kelgen iken.
Halbuki xitay da'iriliri bu wirusning tebi'ettin kelgenlikini ilgiri surup, chet'ellik mutexessisler we xelq'ara organlarning wirusning menbesini tekshürüsh telipini ret qilip kelmekte.
Mezkur wirus bayqilip hazirgha kelgüche dunya miqyasida 900 mingdin artuq ademning jénigha zamin bolghan idi.