Merhum küresh küsen tughulghanliqigha 60 yil tolghanda

Muxbirimiz qutlan
2019-08-14
Élxet
Pikir
Share
Print
Merhum küresh kösen ependining meqberisi.
Merhum küresh kösen ependining meqberisi.
Photo: RFA

Küresh küsen zamanimizdiki ot yürek sen'etkar, Uyghur milliy herikitidiki közge körün'gen pa'aliyetchi we skandinawiye elliride Uyghur teshkilatlirining qurulushi hem rawajlinishi üchün asas salghan shexslerning biridur.

U 2006-yili 47 yéshida bu dunyadin ketti. Xuddi sha'ir adil tuniyazning "Qeshqerdiki yer shari" namliq dastanidiki "Yat tupraqqa kömülgende sen, kömülidu qelbingge weten" dégen misralirida éytilghinidek, küresh küsenning jismi yat tupraqqa kömülgen bolsimu, emma otluq qelbi wetinige kömüldi. 

U hayat waqtida yiraqtiki wetini heqqide ajayip yalqunluq xitablarni we jenggiwar küylerni yangratqan idi.

Shundaq, merhumning jismi bu dunyadin ketken bolsimu, emma uning ismi bilen qoyulghan küresh iradisi hélihem uning yalqunluq misralirida, weten ishqida urulghan dutarlirining tarlirida yangrimaqta. 

Merhumning wapatidin kéyinki shunche uzun yillarda uning qaldurghan izliri we otluq nidaliri tarim oymanliqidin yawropa qirghaqlirighiche bolghan uzaq yerlerde yangrap turdi. Xuddi u özining "Küresh ölmeydu" dégen naxshisida éytqinidek, "Küresh ölmidi hem ölmeydu! . . ." 

2006-Yili 10-ayning 30-küni merhum küresh küsen 47 yéshida shiwétsiyede qaza qilghanda uning ayali bextigül radi'omiz ziyaritini qobul qilip, merhumning hayat waqtida nurghun arzu-armanlirining barliqini, tuyuqsiz kelgen ejelning uni waqitsiz u dunyagha élip ketkenlikini, Uyghur xelqi yéqin kelgüside uning yoqluqidin shekillen'gen bir boshluqni haman hés qilidighanliqini bildürgen idi.

Merhumning ölümidin kéyin uning yoqluqi muhajirettiki Uyghur jama'iti arisida, bolupmu shiwétsiyediki Uyghurlar arisida resmiy bilindi. Küresh küsen hayat waqtida uning bilen bille küresh qilghan meslekdashliridin shiwétsiye Uyghur komitétining sabiq re'isi mahinur hesenowa radi'omiz ziyaritini qobul qilip, merhumni chongqur séghin'ghanliqini, uning qisqighine ömride qaldurghan shunche köp meniwi miraslirining muhajirettiki Uyghur jama'itini küreshke, birlikke we kelgüsige bolghan ümidke yéteklep kelgenlikini bildürdi. 

Merhum küresh özining "Shéhitlar ölmeydu" namliq naxshisida wetini, milliti we hörlüki üchün janlirini pida qilghan shéhitlarning jismi ölsimu, emma rohining el qelbide menggü ölmeydighanliqini tekitlep ötken idi.

Toluq bet