Гүлзирә авулқанқизи: «мән турған аяллар лагерида 18 миң киши барлиқини башлиқимиздин аңлидим»

Мухбиримиз шөһрәт һошур
2019-05-02
Елхәт
Пикир
Share
Принт
Лагер шаһити гүлзирә авулқанқизи йотубе торида гуваһлиқ баянати елан қилмақта. 2019-Йили 29-апрел.
Лагер шаһити гүлзирә авулқанқизи йотубе торида гуваһлиқ баянати елан қилмақта. 2019-Йили 29-апрел.
Social Media

Лагер шаһити гүлзирә авулқанқизи өзиниң уйғур районидики йиғивелиш лагерлири һәққидә елан қилған гуваһлиқ баянатида ашкарилишичә, у лагерда турған икки йил җәрянида лагерниң башқурулушидики қаттиқ мәхпийәтлик сәвәбидин өзи қатнашқан дәрсханидики тутқунлардин пәқәт 50 нәччә кишинила көргән. Әмма у лагер мәсуллиридин болған буайшәм дегән аялниң еғизидин мәзкур лагерда 18 миң кишиниң барлиқини аңлиған. Сиясий көзәткүчи илшат һәсән әпәнди уйғур райониниң нөвәттики вәзийитидин башқа ғулҗиниң миллий инқилаб тарихиниму нәзәрдә тутқан һалда пикир баян қилип, гүлзирә ашкарилиған мәзкур санлиқ мәлуматниң ишәнчиликлик дәриҗисиниң юқирилиқини тилға алди.

Қазақистандики лагер шаһити гүлзирә өткән күни ютуб қанилида елан қилған баянатида өзи турған лагердики адәм сани һәққидә диққәткә сазавәр бир рәқәмни оттуриға қойған. Баянатта дейилишичә, гүлзирә лагерда 20-30 чә киши билән бир ятақта ятқан. 50 Чә киши билән бир синипта «тәрбийә» алған. Әмма лагер һәрбийчә түзүмдә башқурулғанлиқи үчүн у өзи турған ятақ вә өзи дәрс аңлиған синиптикиләрдин башқиларни көрүп бақмиған. У пәқәт мәзкур лагерниң башқурғучи хадимлиридин буайшәм дегән аялниң еғизидин шу лагерда 18 миң киши барлиқини аңлиған. Өткән йилқи ениқлишимиз давамида дәл шу гүлзирә ятқан лагерда вәзипә өтигән бир хадим ғулҗа наһийисиниң бейсәнпо дегән йеридики, йәни дөңмәһәллә әтрапидики бу лагерниң мәхсус аяллар лагери икәнликини ашкарилиған иди. Әмма у бу йәрдә қанчилик аялниң тутуп турулуватқанлиқидин мәлумат берәлмигән иди. 
Илгири уйғур районида 19 йил яшиған вә 2014 ‏-йили тайландқа қечип чиққан хитай армийисиниң сабиқ әскири ли нәнфей йеқинда ахбаратқа қилған сөзидә у ғулҗа шәһиридики мәзгилидә партийә мәктәп әтрапида селиниватқан көлими интайин чоң бир түрмини өз көзи билән көргәнлики, ғулҗа шәһиридә мушундақ чоң түрмидин үчи барлиқи вә буларға 150-160 миң арисида киши сиғидиғанлиқини илгири сүргән. 

Йеқиндин буян иҗтимаий таратқуларда тарқалған бәзи сүрәт вә син учурлирида ғулҗа шәһириниң алтәшуар қатарлиқ ават мәһәллириниң қуруқдилип қалғанлиқи көрситилгән. Бәйду учур амбирида көрситилишичә, ғулҗа наһийисиниң 2017‏-йилдики омуми нопуси 430 миң болуп, буниң ичидә уйғур вә қазақларниң нопуси җәмий 260 миң икән, аялларниң нопуси болса 125 миң әтрапида икән. Америка уйғур бирләшмисиниң рәиси илшат һәсән әпәнди шаһит гүлзирә тилға алған мәзкур санлиқ учурға ишәнчлик дәп баһа бериш билән бирликтә, нөвәттә ғулҗа наһийисидә уйғур вә қазақ аяллардинла аз дегәндә 15пирсәнтиниң лагерда икәнлики һәққидики пәризини оттуриға қойди. 

Илгири бәзи уйғур паалийәтчиләр уйғур райондики тутқунлар саниниң 3 йерим милйон билән 5 милйон арисида икәнликини илгири сүргән иди. Нөвәттики вәзийәттин башқа ғулҗиниң миллий инқилаб тарихиниму нәзәрдә тутқан һалда пикир баян қилған илшат һәсән әпәнди гүлзирә оттуриға қойған бу санниң бәзи мутәхәссисләр вә бәзи дөләт органлири оттуриға қойған санлар билән паралеллиққа игә икәнликини, йәни зит әмәсликини тәкитләйду. 
Һөрмәтлик радио аңлиғучилар, лагер шаһити гүлзирә авулқанқизи бу қетимқи баянатида ашкарилиған тәпсилатлар арқилиқ илгирики шаһитлардин өмәр бекали, меһригүл турсун вә гүлбаһар җелилова ашкарилиған лагерларниң ички түзүми һәққидики учурларниң тоғрилиқини йәнә бир қетим дәлиллиди.

Пикирләр (0)
Share
Толуқ бәт