Gülzire awulqanqizi: "Men turghan ayallar lagérida 18 ming kishi barliqini bashliqimizdin anglidim"

Muxbirimiz shöhret hoshur
2019-05-02
Élxet
Pikir
Share
Print
Lagér shahiti gülzire awulqanqizi yotubé torida guwahliq bayanati élan qilmaqta. 2019-Yili 29-aprél.
Lagér shahiti gülzire awulqanqizi yotubé torida guwahliq bayanati élan qilmaqta. 2019-Yili 29-aprél.
Social Media

Lagér shahiti gülzire awulqanqizi özining Uyghur rayonidiki yighiwélish lagérliri heqqide élan qilghan guwahliq bayanatida ashkarilishiche, u lagérda turghan ikki yil jeryanida lagérning bashqurulushidiki qattiq mexpiyetlik sewebidin özi qatnashqan dersxanidiki tutqunlardin peqet 50 nechche kishinila körgen. Emma u lagér mes'ulliridin bolghan bu'ayshem dégen ayalning éghizidin mezkur lagérda 18 ming kishining barliqini anglighan. Siyasiy közetküchi ilshat hesen ependi Uyghur rayonining nöwettiki weziyitidin bashqa ghuljining milliy inqilab tarixinimu nezerde tutqan halda pikir bayan qilip, gülzire ashkarilighan mezkur sanliq melumatning ishenchiliklik derijisining yuqiriliqini tilgha aldi.

Qazaqistandiki lagér shahiti gülzire ötken küni yutub qanilida élan qilghan bayanatida özi turghan lagérdiki adem sani heqqide diqqetke sazawer bir reqemni otturigha qoyghan. Bayanatta déyilishiche, gülzire lagérda 20-30 che kishi bilen bir yataqta yatqan. 50 Che kishi bilen bir sinipta "Terbiye" alghan. Emma lagér herbiyche tüzümde bashqurulghanliqi üchün u özi turghan yataq we özi ders anglighan siniptikilerdin bashqilarni körüp baqmighan. U peqet mezkur lagérning bashqurghuchi xadimliridin bu'ayshem dégen ayalning éghizidin shu lagérda 18 ming kishi barliqini anglighan. Ötken yilqi éniqlishimiz dawamida del shu gülzire yatqan lagérda wezipe ötigen bir xadim ghulja nahiyisining béysenpo dégen yéridiki, yeni döngmehelle etrapidiki bu lagérning mexsus ayallar lagéri ikenlikini ashkarilighan idi. Emma u bu yerde qanchilik ayalning tutup turuluwatqanliqidin melumat bérelmigen idi. 
Ilgiri Uyghur rayonida 19 yil yashighan we 2014 ‏-yili taylandqa qéchip chiqqan xitay armiyisining sabiq eskiri li nenféy yéqinda axbaratqa qilghan sözide u ghulja shehiridiki mezgilide partiye mektep etrapida séliniwatqan kölimi intayin chong bir türmini öz közi bilen körgenliki, ghulja shehiride mushundaq chong türmidin üchi barliqi we bulargha 150-160 ming arisida kishi sighidighanliqini ilgiri sürgen. 

Yéqindin buyan ijtima'iy taratqularda tarqalghan bezi süret we sin uchurlirida ghulja shehirining alteshu'ar qatarliq awat mehellirining quruqdilip qalghanliqi körsitilgen. Beydu uchur ambirida körsitilishiche, ghulja nahiyisining 2017‏-yildiki omumi nopusi 430 ming bolup, buning ichide Uyghur we qazaqlarning nopusi jem'iy 260 ming iken, ayallarning nopusi bolsa 125 ming etrapida iken. Amérika Uyghur birleshmisining re'isi ilshat hesen ependi shahit gülzire tilgha alghan mezkur sanliq uchurgha ishenchlik dep baha bérish bilen birlikte, nöwette ghulja nahiyiside Uyghur we qazaq ayallardinla az dégende 15pirsentining lagérda ikenliki heqqidiki perizini otturigha qoydi. 

Ilgiri bezi Uyghur pa'aliyetchiler Uyghur rayondiki tutqunlar sanining 3 yérim milyon bilen 5 milyon arisida ikenlikini ilgiri sürgen idi. Nöwettiki weziyettin bashqa ghuljining milliy inqilab tarixinimu nezerde tutqan halda pikir bayan qilghan ilshat hesen ependi gülzire otturigha qoyghan bu sanning bezi mutexessisler we bezi dölet organliri otturigha qoyghan sanlar bilen paralélliqqa ige ikenlikini, yeni zit emeslikini tekitleydu. 
Hörmetlik radi'o anglighuchilar, lagér shahiti gülzire awulqanqizi bu qétimqi bayanatida ashkarilighan tepsilatlar arqiliq ilgiriki shahitlardin ömer bék'ali, méhrigül tursun we gülbahar jélilowa ashkarilighan lagérlarning ichki tüzümi heqqidiki uchurlarning toghriliqini yene bir qétim delillidi.

Toluq bet