Misirdin qaytqan 7 ashpez "Térrorluq" jinayiti artilip 10 yilliqtin yuqiri késiwétilgen

Muxbirimiz shöhret hoshur
2019-07-15
Élxet
Pikir
Share
Print
Misirdiki eslem ashxanisining xizmetchiliridin abduzayir.
Misirdiki eslem ashxanisining xizmetchiliridin abduzayir.
RFA/Shöhret Hoshur

Sabiq mehbus memettursun osmanning xotende qamaqxanida körgen we anglighanlirigha asasen bayan qilishiche, uning bilen misirdiki eslem Uyghur ashxanisida ishligen 7 kishi, yurtigha qaytqandin kéyin bir jinayetchiler guruhi dep qarilinip 10 yilliqtin yuqiri oxshimighan muddette késiwétilgen. Memettursun bu 7 ashpezning xoten xan'ériqning bir kentidiki kishiler ikenlikini bayan qilghanidi.

Muxbirimizning téléfonini qobul qilghan xan'ériq yézisidiki bir kent xadimi misirdin qaytip kelgendin kéyin késiwétilgen kishilerning xan'ériq 10-kent, yeni töwen xan'ériq kentining kishiliri ikenlikini delillidi.

Ilgiri misirda 6 ay ashpezlik qilghanliqi üchün xotende 1 yildin artuq qamaqxanida yatqan sabiq mehbus memettursun osman, misirda özi bilen bir ashxanida yeni eslem ashxanisida ishligen 7 ashpezning 2016 ‏-yili yurtigha qaytqandin kéyin, 2017‏-yilning ottura-axirliri 10 yilliqtin yuqiri késiwétilgenlikini ashkarilidi. Uning déyishiche, misirdiki eslem ashxanisining xizmetchiliridin abduzayir we abduwajid 20 yilliqtin, qahar 18 yilliq, abduwaris, enes abdusalamlar 15 yilliqtin késilgen. Ashxanigha ishlirigha yardemleshken 70 yashliq abdusalam dégen kishimu 12 yilliq késilgen.

Memettursunning déyishiche, bular éghir qéyin-qistaqning netijiside özliri sadir qilmighan qilmishni boynigha élishqa, yeni "Misirgha ashpezlik üchün kelgen emes, bölgünchilik we térrorluq üchün purset izdep kelgen" dep iqrarname yézishqa mejbur bolghan. Hetta beziliri misirdin wezipe bilen qayta kelgenliki heqqide iqrarname yazghan.

Ilgiri misirda oqughan bireylenning bayan qilishiche, eslem ashxanisi misirdiki 6-7 Uyghur ashxanisidin biri yeni nisbeten tonulghini bolup, misirdiki Uyghurlargha qarita tutqun bashlan'ghanda, eng awwal mana mushu ashxanigha péchet sélin'ghan we tutqun mana mushu ashxanidin bashlan'ghan.

Memettursun osman eslide bu ashpezlerningmu özige oxshashla tirikchilik koyidiki kishiler ikenlikini, emma soraqchilar, jinayetchiler guruhini pash qilsa, mukapati katta bolidighanliqi üchün eslem ashxanisidiki bu yette ashpezni bir-birige chétip jinayetchiler guruhi qilip délo turghuzghanliqini ilgiri sürdi.

Melum bolushiche bu yette ashpez xotenning xan'ériq yéza, töwen xan'ériq kentidindur. Téléfonimizni qobul qilghan xan'ériq yéziliq hökümet xadimliri misirdin qaytqan bu 7 ashpezning qanche yilliqtin késilgenliki heqqidiki so'alimizgha jawaben, bu heqte nahiyelik hökümettin jawab élishimizni tewsiye qildi. Xan'ériq kent kadirliridin biri, misirdin qaytip késiwétilgen ashpezlerning xan'ériq 10 ‏-kent yeni töwen xan'ériq kentidin ikenlikini delillidi.

Hörmetlik radi'o anglighuchilar, yuqirida, misirdin yurtigha qaytqan 7 ashpezning jinayetchiler guruhi dep qarilinip 10 nechche yilliqtin késiwétilgenliki heqqide anglitish berduq.

Toluq bet