Barin inqilabining 31-yilliqi xatirilendi

• Ixtiyariy muxbirimiz azigh
  2021-04-05

18-Dékabir küni xitayning istanbul konsulxanisining aldida bashlan'ghan, lagér qurbanliri yéqinliri teripidin teshkillen'gen “Millet nöwette” pa'aliyitining 109-künide barin inqilabining 31-yilliqini xatirilesh munasiwiti bilen axbarat élan qilish pa'aliyiti ötküzüldi.

Xitayning istanbul konsulxanisining aldida élip bérilghan pa'aliyetke türkiyediki Uyghur jama'iti, yerlik we chet'ellik zhurnalistlar, siyasiy partiye wekilliri we puqrawi teshkilat mes'ulliri qatnashti.

Lagér qurbanliri yéqinliri erebche, in'glizche, xitayche we türkche qatarliq tillarda xitayning Uyghur ilida élip barghan keng kölemlik qetli'amliri heqqide chüshenche berdi we qetli'amda wapat bolghan Uyghurlarni xatirilidi.

Pa'aliyetke “Iyi” partiyesining merkizi komitéti ezasi doktor serwer hali xanim qatnashti we mundaq dédi: “Uyghurlar qandashliri we qérindashliridin yuqiri awazda xitayda boluwatqan qirghinchiliqqa toxta déyishini kütüwatidu. Lékin 2017-yilida xitay bilen türkiye otturisida imzalan'ghan jinayetchilerni qayturup bérish kélishimnamsi Uyghurlarni endishilendürdi. Türk millitining wijdani buninggha hergiz ruxset qilmaydu. Amérika, kanada we gollandiye qatarliq döletler Uyghur qirghinchiliqini qobul qilghan bügünkidek waqitta türkiye we bashqa türk jumhuriyetlirning buninggha süküt qilishi qobul qilghini bolidighan ish emes”.

Jumhuriyet xelq partiyesi ichide iwme herikiti namida siyasiy pa'aliyetlirini yürgüzüwatqan sosyal démokratlar fondi ijra komitétining ezasi éli tirali ependim söz qilip mundaq dédi:

“Pütün dunyaning közining aldida qirghinchiliq yüz bériwatidu. Buninggha qarshi küresh qilish dewrimizdiki eng chong kishilik hoquq kürishidur. Eng chong fashizmgha qarshi küreshtur.”

Uyghur siyasiy dawasining küchiyishi seweblik Uyghurlar bilen munasiwetlik xatirilesh pa'aliyetliri türkiyede küchlük tesir qozghawatqan bolup, türkiyediki dangliq siyasetchilerdin meral akshener, mensur yawash qatarliqlar tiwittirda ipade bildürüp barin inqilabining 31-yilini xatiriligen.

Biz pa'aliyet heqqide melumat igilesh üchün doktor burhan ulughyol we alimjan turdi ependimlerni ziyaret qilduq. Burhan we alimjan ependim pa'aliyetning jeryani we meqsiti toghrisida tepsiliy toxtaldi.

1990-Yili 5-aprélda Uyghur éli aqtu nahiyesi tewesidiki barin yézisida zeydin yüsüp rehberlikide xitay hökümitige qarshi partlighan naraziliq namayishi we qarshiliq herikiti xitay hökümiti teripidin qanliq basturulghan.

Bari inqilabi Uyghur serxilliri teripidin erkinlik we hörlük üchün kötürülgen shanliq bir inqilab dep teriplenmekte. Shuning bilen birlikte muhajirettiki Uyghurlar teripidin her yili Uyghur musteqilliq herikitining ilham menbesi süpitide xatirilinip kelmekte.