Lagér qurbanliri yéqinlirining iltimasi rejep tayip erdoghan'gha yetküzüp bérilgen

Ixtiyariy muxbirimiz azigh
2021-05-28
Share
Lagér qurbanliri yéqinlirining iltimasi rejep tayip erdoghan'gha yetküzüp bérilgen Lagér qurbanliri yéqinliridin medine nazimi xanim saqchilargha iltimasini tapshurup bermekte. 2021-Yili may, istanbul.
RFA/Azigh

Lagér qurbanliri yéqinliri xitayning Uyghurlargha yürgüzüwatqan qirghinchiliq siyasitini türk xelqige anglitishta awan'gartliq rolini oynimaqta.

Közetküchiler bir qanche yildin buyan türkiyede turghun halitini saqlighan Uyghur siyasiy pa'aliyetlirining lagér qurbanliri yéqinlirining tirishchanliqi bilen qayta janliniwatqanliqini éytmaqta.

Bügün lagér qurbanliri yéqinliri xitayning istanbul konsulxanisining aldida bashlighan “Millet nöwette” herikitining 162-küni bolup, a'ilisi we uruq-tughqanliri xitayning yighiwélish lagérliri we türmilirige solan'ghan yüzlerche Uyghur bir qanche aydin buyan xitay hökümitidin ochuq bir jawab bérishini telep qilmaqta.

Lagér qurbanliri yéqinliri konsulxana aldidiki pa'aliyetlerdin bashqa her xil ammiwi teshwiqat pa'aliyetlirinimu teshkillep kéliwatqan bolup, bügün lagér qurbanliri yéqinliri taksim meydanida türkiye jumhur re'isige derdini anglitishqa tirishqan.

28-May küni taksim meschitining ichilish murasimida tunji namaz oqulghan bolup, namazgha jumhur re'isi rejep tayip erdoghan qatnashqan we söz qilghan. Namazgha diyanet ishliri idarisining bashliqi éli erbash imamliq qilghan.

Lagér qurbanliri yéqinliri taksim meydanida ay yultuzluq kök bayraqni kötürüp taksim meschitining tunji namazgha qatnashmaqta.  2021-Yili may, istanbul.

Bu pursettin paydilan'ghan lagér qurbanliri yéqinliri nöwettiki Uyghur mesilisini we ziyankeshlikke uchrawatqan Uyghurlarning ehwali yézilghan mektupni erdoghanning shexsiy qoghdighuchiliri teripidin erdoghan'gha yetküzüp bergen.

Singlisi mewlude hilal üchün küresh qiliwatqan lagér qurbanliri yéqinliridin medine nazimi xanim ziyaritimizni qobul qilip, pa'aliyetchilerning rejep tayip erdoghan bilen körüshüsh niyitining barliqini, biraq bu pursetning özlirige nésip bolmighanliqini, lékin mektup tapshurup bérish pursitige ige bolghanliqini éytti.

Lagér qurbanliri yéqinliridin mirzexmet ilyas oghli ependim ziyaritimizni qobul qildi we ay yultuzluq kök bayraqni körgen xelqining qizghin pozitsiyesidin intayin tesirlen'genlikini, biraq bu yaxshi pursettin qatnashquchilar sanining az bolghanliqi seweblik ünümlük paydilinish imkaniyitining bolmighanliqini we buningdin qattiq epsuslan'ghanliqini éytti.

Jumhur re'isi rejep tayip erdoghanning ichilish murasimidiki sözi tügigendin kiyin, medine nazimi xanim yuqiri awazda jumhur re'isidin yardem telep qilghan, saqchilar derhal yitip kélip qandaq telipi barliqini sorighan. Medine xanim neq meydanda yazghan qisqa iltimasni erdoghan'gha yetküzüp bérishini telep qilghan. Saqchilar iltimasni élip, jumhur re'islik ishxanisining mexsus qoghdighuchilirigha yetküzüp bergen.

Medine xanim ziyaritimiz dawamida mundaq dédi:

“Men bu qisqa iltimasimning jumhur re'isining qoligha tégishini ümid qilimen. Héchqandaq gunahi bolmay turup, töt yilning yaqi erkinlikidin mehrum qilin'ghan singlim mewlude hilalning yighiwélish lagérliridin qutulup erkinlikige érishishi üchün a'ilimizge we türkiyege qaytip kélishige seweb bölüshini, shundaqla millitimizning béshigha kelgen bu azabliq künlerning tézrek tügishige seweb bolushini ümid qilimen”.

Türkiyede turushluq kishilik hoquq pa'aliyetchisi jewlan shirmemet ependim ziyaritimizni qobul qilip xitayning türkiyediki lobichiliq pa'aliyetlirining küchlük ikenlikini, lagér qurbanliri yéqinliri teshkillep kéliwatqan pa'aliyetler we “Millet nöwette” herikitining xitayning türkiyediki lobiychiliq pa'aliyetlirige qarshi ünümlük rol oynawatqanliqini, türkiyediki xitay diplomatik organlirining teshwiqatlirigha qarshi pa'aliyetlirini her waqit, herqandaq qiyinchiliqqa qarimay dawamlashturup kéliwatqanliqini éytti.

Xitay bilen türkiye munasiwetlirining yéqinlishishigha egiship türkiye hökümitining Uyghur mesilisidiki pozitsiyesi barghanséri yumshawatqan bolup, adalet we tereqqiyat partiyesi we milletchi heriket partiyesi ittipaqidiki hökümetning Uyghur mesiliside passip qilishi öktichi “Iyi”, “Kélechek” qatarliqlar partiyeler we kishilik hoquq pa'aliyetchiliri teripidin qattiq eyiblinip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet