2-Qétimliq "Sherqiy türkistan üchün anatoliye sepiri" pa'aliyiti ghelibilik axirlashti

Ixtiyariy muxbirimiz azigh
2021-10-15
Share
2-Qétimliq "Sherqi türkistan üchün anatoliye sepiri" pa'aliyetchiliri qara déngiz we ichki anatoliye rayonliridiki pa'aliyetlirini ghelibilik ayaghlashturup, istanbulgha qaytip keldi. 2021-Yili 15-öktebir, türkiye.
RFA/Azigh

Xitayning Uyghurlargha qaratqan qirghinchiliq siyasitini türk xelqige anglitishni meqset qilghan lagér tutqunliri yéqinliri türkiyening herqaysi sheher, wilayetlirige biwasite bérip, teshwiqat pa'aliyitini qanat yaydurghanidi.

"Sherqi türkistan üchün anatoliye sepiri" nami bilen qanat yaydurulghan mezkur pa'aliyetning tunji qétimliqi 2-awghust küni bashlinip, 23-awghust küni axirlashqanidi. 2-Qétimliq sherqiy türkistan üchün anatoliye sepiri 17-séntebir küni siwasta bashlan'ghan bolup, pa'aliyetchiler 15-öktebir küni qara déngiz we ichki anatoliye rayonliridiki pa'aliyetlirini ghelibilik ayaghlashturup, istanbulgha qaytip keldi.

Pa'aliyetchiler ikki qétimliq "Anatoliye sepiri" pa'aliyitide türkiyining herqaysi sheherliride muxbirlarni kütüwélish yighini, körgezme we namayish pa'aliyetlirini uyushturup, türk xelqige birinchi menbedin qirghinchiliqqa uchrawatqan Uyghurlarning nöwettiki weziyitini anglitishqa tirishqan.

Lagér tutqunliri yéqinliri
Lagér tutqunliri yéqinliri "Sherqiy türkistan üchün anatoliye sepiri" pa'aliyitining eng axirqi békiti bolghan izmir shehiride sheherlik hökümet binasigha sherqiy türkistan jumhuriyitining dölet bayriqimu ésilghan. 2021-Yili öktebir, türkiye.

"Anatoliye sepiri" pa'aliyiti jeryanida, mezkur pa'aliyetni teshkilligen lagér tutqunlirining yéqinliri her qaysi sheherlerde her xil siyasiy partiyiler, puqrawi teshkilatlar, oqughuchilar we hökümet xadimliri teripidin qizghin kütüwélin'ghan we qollap quwwetleshke érishken.

Mezkur pa'aliyetning teshkilligüchilliridin Uyghur kishilik hoquq pa'aliyetchisi medine nazimi xanim ziyaritimizni qobul qilip, bu jeryanda özlirini qollap quwwetligen siyasiy partiyiler we puqrawi teshkilatlarning yardemliri toghrisida tepsiliy toxbtilip ötti.

Lagér tutqunliri yéqinliri "Sherqiy türkistan üchün anatoliye sepiri" pa'aliyitining eng axirqi békiti bolghan izmit shehiride her qaysi siyasiy partiyilerning rehberliri we sheherlik hökümet xadimliri teripidin qizghin kütüwélin'ghan. Izmit sheherlik hökümetning xizmet binasigha sherqiy türkistan jumhuriyitining dölet bayriqi ésilghan bolup, izmit xelqi we sheherlik hökümet xadimliri lagér tutqunliri yiqinlirining pa'aliyetlirini izchil qollaydighanliqini, herqandaq shekilde yardem bérishqa teyyar ikenlikini bildürgen.

Mezkur pa'aliyetni teshkilligen kishilik hoquq pa'aliyetchilliridin mirzexmet ilyas'oghli ependi ziyaritimizni qubul qilip, mezkur pa'aliyetning intayin ünümlük bolghanliqini, türk xelqning Uyghur dawasigha bolghan qizghinliqidin intayin söyün'genlikini éytti.

Pa'aliyet jeryanida lagér tutqunliri yéqinliri bir aygha yéqin a'ilisidin uzaq qilishqa mejbur bolghan bolup, pa'aliyetchiler her xil maddi we meniwiy qiyinchiliqlargha uchrighan bolsimu, pa'aliyetni axirighiche dawamlashturghan. Ili meshripi Uyghur wexpining re'isi qudret ghulja ependim ziyaritimizni qubul qilip, mezkur pa'aliyet jeryanida yoluqqan qiyinchiliqlar heqqide köz qarashlirini biz bilen ortaqlashti.

2016-Yilidin kiyin xitayning Uyghur élidiki yerlik milletlerge qaritilghan assimiliyatsiye siyasiti irqiy qirghinchiliqqa qarap tereqqiy qilghan bolup, muhajirettiki Uyghurlar bir qanche yildin buyan xitay teripidin ziyankeshlikke uchrighan a'ile tawabi'atlirining iz-dérikini qilip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet