3-Қетимлиқ “шәрқий түркистан үчүн анатолийә сәпири” паалийити башланди

Ихтиярий мухбиримиз азиғ
2021-11-03
Share

1-Ноябир күни лагер тутқунлириниң түркийәдики йеқинлири тәрипидин тәшкилләнгән “шәрқи түркистан үчүн анатолийә сәпири” паалийитиниң үчинчи қетимлиқ сәпири түркийәниң чорум шәһиридә башланди.

Түрк хәлқигә уйғур елида йүз бериватқан ирқий қирғинчилиқни биринчи мәнбәдин бивастә йәткүзүш вә түркийәниң уйғур қирғинчилиқини тонуши үчүн аммивий асас яритиш мәқситидә лагер тутқунлири йеқинлири тәрипидин тәшкилләнгән “шәрқий түркистан үчүн анатолийә сәпири‌” намлиқ икки қетимлиқ паалийәт оңушлуқ тамамланған иди. Икки қетимлиқ “шәрқий түркистан үчүн анатолийә сәпири” дә паалийәтчиләр 25 шәһәр, вилайәтни айлинип, мәзкур шәһәрләрдики оқуғучиларға, аммивий тәшкилатларға вә сиясий партийәләргә уйғур елиниң нөвәттики вәзийитини аңлатқан иди.

Лагер тутқунлири йеқинлири 11-айниң 1-күни 3-қетимлиқ “шәрқи түркистан үчүн анатолийә сәпири” гә атланған болуп, мәзкур паалийәтниң тәшкиллигүчиллиридин бири болған уйғур кишилик һоқуқ паалийәтчиси җәвлан ширмәмәт зияритимизни қубул қилип, мәзкур паалийәт һәққидә тәпсилий мәлумат бәрди.

3-Қетимлиқ “шәрқи түркистан үчүн анатолийә сәпири” паалийитиниң тунҗи бекити чорумда елип берилған көргәзмә, тәшвиқат паалийити, имза қоюш паалийити вә лексийә паалийити қатарлиқлар ғәлибилик өткүзүлгән. Паалийәтчиләрни чорум шәһәр башлиқи күтүвалған болуп, паалийәтчиләр чорум хәлқиниң уйғур давасиға болған қизғинлиқидин интайин сөйүнгәнликини ейтти.

Бу қетимлиқ паалийәткә қатнашқучилардин мәдинә назими ханим зияритимизни қубул қилип, чорум вә токат шәһиридә елип берилған паалийәтләр тоғрисида тәпсилий мәлумат бәрди.

Паалийәтчиләр мәзкур шәһәрләрдики хәлқ мәйдани вә шәһәр бағчилирида ахбарат елан қилиш йиғини ечип, йәрлик тартқуларниң диққитини уйғур қирғинчилиқиға тартқан. Униңдин башқа паалийәтчиләр хәлқ мәйданлирида вә мәзкур шәһәрләрниң чоң кочилирида уйғур елида йүз бериватқан хитайниң қирғинчилиқ сиясәтлири чүшәндүрүлгән тәшвиқат варақлирини тарқатқан вә хитайниң ирқий қирғинчилиқ сияситигә қарши туруш үчүн имза топлаш паалийити орунлаштурған.

Җәвлан ширмәмәт, мәдинә назими, мирзәхмәт илясоғли вә һәбибулла көсән қатарлиқ уйғур паалийәтчилири тәрипидин тәшкиллинип келиватқан уйғур лагер тутқунлири йеқинлириниң паалийәтлири түрк хәлқи вә ахбаратида уйғур мәсилисини тонутушта интайин муһим рол ойнап кәлмәктә. Мәзкур паалийәтни түркийәдики аммивий тәшкилатлар вә һәр хил сиясий партийәләр зор күч билән қоллап-қуввәтләп кәлмәктә.

Мәзкур паалийәтниң тәшкиллигүчиллиридин бир болған уйғур кишилик һоқуқ паалийәтчиси мирзәхмәт илясоғли әпәнди зияритимизни қубул қилип, мәзкур паалийәткә ярдәм қилған пуқрави тәшкилатлар, сиясий партийәләр вә уларниң ярдәмлири һәққидә тохтилип өтти.

Мәзкур паалийәт түркийәдики һәрқайси ахбарат вастилири тәрипидин кәң хәвәр қилиниватқан болуп, көзәткүчиләр лагер тутқунлири йеқинлириниң паалийәтлирини түркийәдики уйғур давасиниң мәвҗутлуқи вә җанлиқлиқини қоғдашта муһим әһмийәткә игә дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт