3-Qétimliq “Sherqiy türkistan üchün anatoliye sepiri” pa'aliyiti bashlandi

Ixtiyariy muxbirimiz azigh
2021-11-03
Share

1-Noyabir küni lagér tutqunlirining türkiyediki yéqinliri teripidin teshkillen'gen “Sherqi türkistan üchün anatoliye sepiri” pa'aliyitining üchinchi qétimliq sepiri türkiyening chorum shehiride bashlandi.

Türk xelqige Uyghur élida yüz bériwatqan irqiy qirghinchiliqni birinchi menbedin biwaste yetküzüsh we türkiyening Uyghur qirghinchiliqini tonushi üchün ammiwiy asas yaritish meqsitide lagér tutqunliri yéqinliri teripidin teshkillen'gen “Sherqiy türkistan üchün anatoliye sepiri‌” namliq ikki qétimliq pa'aliyet ongushluq tamamlan'ghan idi. Ikki qétimliq “Sherqiy türkistan üchün anatoliye sepiri” de pa'aliyetchiler 25 sheher, wilayetni aylinip, mezkur sheherlerdiki oqughuchilargha, ammiwiy teshkilatlargha we siyasiy partiyelerge Uyghur élining nöwettiki weziyitini anglatqan idi.

Lagér tutqunliri yéqinliri 11-ayning 1-küni 3-qétimliq “Sherqi türkistan üchün anatoliye sepiri” ge atlan'ghan bolup, mezkur pa'aliyetning teshkilligüchilliridin biri bolghan Uyghur kishilik hoquq pa'aliyetchisi jewlan shirmemet ziyaritimizni qubul qilip, mezkur pa'aliyet heqqide tepsiliy melumat berdi.

3-Qétimliq “Sherqi türkistan üchün anatoliye sepiri” pa'aliyitining tunji békiti chorumda élip bérilghan körgezme, teshwiqat pa'aliyiti, imza qoyush pa'aliyiti we léksiye pa'aliyiti qatarliqlar ghelibilik ötküzülgen. Pa'aliyetchilerni chorum sheher bashliqi kütüwalghan bolup, pa'aliyetchiler chorum xelqining Uyghur dawasigha bolghan qizghinliqidin intayin söyün'genlikini éytti.

Bu qétimliq pa'aliyetke qatnashquchilardin medine nazimi xanim ziyaritimizni qubul qilip, chorum we tokat shehiride élip bérilghan pa'aliyetler toghrisida tepsiliy melumat berdi.

Pa'aliyetchiler mezkur sheherlerdiki xelq meydani we sheher baghchilirida axbarat élan qilish yighini échip, yerlik tartqularning diqqitini Uyghur qirghinchiliqigha tartqan. Uningdin bashqa pa'aliyetchiler xelq meydanlirida we mezkur sheherlerning chong kochilirida Uyghur élida yüz bériwatqan xitayning qirghinchiliq siyasetliri chüshendürülgen teshwiqat waraqlirini tarqatqan we xitayning irqiy qirghinchiliq siyasitige qarshi turush üchün imza toplash pa'aliyiti orunlashturghan.

Jewlan shirmemet, medine nazimi, mirzexmet ilyas'oghli we hebibulla kösen qatarliq Uyghur pa'aliyetchiliri teripidin teshkillinip kéliwatqan Uyghur lagér tutqunliri yéqinlirining pa'aliyetliri türk xelqi we axbaratida Uyghur mesilisini tonutushta intayin muhim rol oynap kelmekte. Mezkur pa'aliyetni türkiyediki ammiwiy teshkilatlar we her xil siyasiy partiyeler zor küch bilen qollap-quwwetlep kelmekte.

Mezkur pa'aliyetning teshkilligüchilliridin bir bolghan Uyghur kishilik hoquq pa'aliyetchisi mirzexmet ilyas'oghli ependi ziyaritimizni qubul qilip, mezkur pa'aliyetke yardem qilghan puqrawi teshkilatlar, siyasiy partiyeler we ularning yardemliri heqqide toxtilip ötti.

Mezkur pa'aliyet türkiyediki herqaysi axbarat wastiliri teripidin keng xewer qiliniwatqan bolup, közetküchiler lagér tutqunliri yéqinlirining pa'aliyetlirini türkiyediki Uyghur dawasining mewjutluqi we janliqliqini qoghdashta muhim ehmiyetke ige dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet