Lagér qurbanliri yéqinlirining iltimasi yene qobul qilinmidi

Ixtiyariy muxbirimiz azigh
2020.12.03
Lagér qurbanliri yéqinlirining iltimasi yene qobul qilinmidi Türkiye saqchiliri pa'aliyetchilerning söz qilmaqta. 2020-Yili dékabir, istanbul.
RFA/Azigh

2-Dékabir küni istanbuldiki lagér qurbanliri yéqinliri tekrar a'ilisining iz-dérikini qilish üchün xitayning istanbuldiki konsulxanisigha bardi. Izchil xitay lagérliri we türmilirige solan'ghan a'ile tawabi'atlirining erkinliki üchün pa'aliyet orunlashturup kéliwatqan lagér qurbanliri yéqinliri xitay konsulxanisidin yighiwélish lagérlirigha solan'ghan a'ile ezaliri heqqide melumat bérishni telep qildi.

Pa'aliyetni uyushturghan yashlardin jewlan shirmemet ependim bu heqte ziyaritimizni qobul qilip, pa'aliyetning meqsiti we ehmiyiti heqqide tepsiliy toxtaldi.

Türkiye saqchiliri pa'aliyetchilerning kimlikini tekshürmekte. 2020-Yili dékabir, istanbul.

Xitay konsulxanisi yighiwélish lagéri qurbanliri yéqinlirining konsulxanidiki munasiwetlik xadimlar bilen körüshüsh telipini ret qildi we munasiwetlik iltimaslarni konsulxana xadimlirining tapshuruwélishigha ruxset qilmidi. Konsulxanining amanliq saqlighuchiliri lagér qurbanliri yéqinlirining iltimaslirini özlirining qobul qilip, munasiwetlik xadimlargha yetküzüp béridighanliqini éytqan bolsimu, emma amanliq saqlighuchilarning konsulxanigha tapshuridighan matériyallarni tapshuruwélish hoquqining barliqigha munasiwetlik héchqandaq höjjet körsitip bérelmidi. Hetta lagér qurbanliri yéqinlirining matériyal tapshuruwalghanliqigha a'it höjjet chiqirip bérish telipi konsulxana teripidin ret qilindi.

Lagér qurbanliri yéqinlirining aldigha chiqqan türkiye saqchilirimu konsulxana xadimlirining munasiwetlik iltimaslarni tapshuruwélishni ret qilghanliqini éytip, mundaq dédi: “Iltimasinglar qolimizda, lékin iltimasni almaywatidu. Bu heqte silerge melumat bérildi. Silerning bu yerde toplinishinglar waba seweblik toghra emes.”

Neq meydanda ziyaritimizni qobul qilghan lagér qurbanliri yéqinliridin mirzexmet ilyas'oghli ependim konsulxanining pozitsiyisi heqqide toxtilip mundaq dédi: “Mining qérindishim we töt dostum 4 yildin buyan xitayning yighiwélish lagérlirida turuwatidu. Bügün ötken qétimgha oxshash xitay konsulxanisigha munasiwetlik iltimasni tapshurup bérish üchün kelduq. Men pütün dunyagha we türkiye tashqi ishlar ministirliqigha xitab qilimen. Bizning iltimasimiz her qétimqigha oxshash konsulxana teripidin ret qilindi. Iltimasni tapshurup bersenglar bolidu, lékin tapshuriwalghinimizgha a'it héchqandaq höjjet chiqirip bermeymiz dewatidu. Xitay konsulxana xadimliri munasiwetlik iltimasni qet'iy tapshuriwalmaydighanliqini éytti.”

Xitay konsulxanisining pozitsiyisining munasiwetlik qanunlirigha xilap ikenlikini éytqan lagér qurbanliri yéqinliridin melike mexmut ziyaritimizni qobul qilip, mundaq dédi: “Bizning tughqanlirimiz xitay puqrasi bolghanliqi üchün biz tughqanlirimizning iz-dérikini we heq-hoquqini xitay konsulxanisidin sorash hoquqimiz bar. Xitay konsulxanisining özining qanunliri we xelq'araliq qanunlargha uyghun halda delil-ispat bilen jawab bérish mejburiyiti bar. Lékin xitay konsulxanisi bizning xitayche yézilghan iltimasimizni tapshuruwalmidi. Xitay hökümiti ochuq-ashkara hem özining dölet qanunigha hem xelq'araliq qanunlarning xilap ish qiliwatidu.”

Lagér qurbanliri yéqinliridin dadisining erkinliki üchün küresh qiliwatqan shemsiye éli xanim öyidikiliri erkinlikke chiqmighuche, hergiz toxtap qalmaydighanliqini éytti.

14-Awghust küni lagér shahitliri we jaza lagéri qurbanlirining yéqinliri teshkillinip xitayning istanbuldiki konsulxanisigha iltimas sunmaqchi bolghan bolsimu, biraq xitay konsulxanisi yashlarning a'ilisidikilerni qoyup bérishini telep qilip yazghan iltimasini qobul qilmighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.