Дохтур җүрәт обул: «шаһимәрданниң өлүмигә токтин зәхимлиниш сәвәб болған болуши мумкин»

Мухбиримиз шөһрәт һошур
2019-09-04
Елхәт
Пикир
Share
Принт
Лагердин чиқипла туюқсиз җан үзгән 38 яшлиқ шаһимәрданниң лагердики иниси ширәли пәрһат.
Лагердин чиқипла туюқсиз җан үзгән 38 яшлиқ шаһимәрданниң лагердики иниси ширәли пәрһат.
RFA/Shöhret Hoshur

38 яшлиқ шаһимәрдан лагердин чиқипла үрүмчидә туюқсиз җан үзгән. Шаһимәрданниң муһаҗирәттики уруқ-туғқанлири униң өлүмигә дохтурханида «меңисигә су чүшүш» диягнози қоюлғанлиқини уққан. Шундин кейин улар «меңигә су чүшүш» ниң сәвәби һәққидә теббий саһәдики мутәхәссисләрдин мәлумат сориған. Мутәхәссисләр шаһимәрданниң токлуқ әсваблар билән қейин-қистаққа учриғанлиқ еһтималлиқини баян қилған. Бу һәқтә зияритимизни қобул қилған үрүмчи өсмә кесәлликләр дохтурханисиниң сабиқ ташқи кесәлләр дохтури, һазир америкада яшаватқан җүрәт обул әпәндиму «меңигә су чүшүш» ниң сәвәблирини чүшәндүрүп, шаһимәрданниң өлүмигә токлуқ әсвабтин зәхимлинишниң сәвәб болған болуши мумкинликини билдүрди.

Лагердин чиқип җан үзгән шаһимәрдан пәрһатниң муһаҗирәттики тағиси һаҗи қутлуқ қадириниң баян қилишичә, шаһимәрдан бир терә-бир устихан һалитидә аилисигә қайтурулған вә аилисидә меңиси ағрип қаттиқ қийналғандин кейин дохтурханиға апирилған. Дохтурханида униңға «меңисигә су чүшүш» диягнози қоюлған. Шаһимәрдан давалаш үнүм бәрмәй дохтурханида җан үзгәндин кейин, униң аилиси сақчилар тәрипидин назарәт астиға елинған. Мәрһумниң нәзирни пәқәт уруқ-туғқанлири биләнла өткүзүш вә өлүм сәвәбини «рак кесили» дәп чүшәндүрүш һәққидә көрсәтмә берилгән.

Бу агаһландуруштин гуманланған доктор һаҗи қутлуқ қадири японийәдики алақидар мутәхәссисләрдин «меңигә су чүшүш» ниң сәвәби һәққидә мәлумат сориған. Мутәхәссисләр униңға шаһимәрданниң токлуқ әсваблар билән қейин-қистаққа учриғанлиқ еһтималлиқини баян қилған.

Нөвәттә америкада яшаватқан ташқи кесәлләр дохтури вә теббий ген илми тәтқиқатчиси, доктор җүрәт обул әпәнди бүгүн у һәқтә зияритимизни қобул қилип, «меңигә су чүшүш» ниң сәвәби, җәряни вә ақивәтлири һәққидә қисқичә мәлумат бәрди. Шаһимәрданниң бәдән сапаси вә нөвәттики лагер вәзийитини көздә тутқан һалда хуласә чиқарған җүрәт обул әпәнди шаһимәрданниң өлүмигә токлуқ әсвабтин зәхимлинишниң сәвәб болғанлиқини асаслиқ еһтималлиқ дәп қарайдиғанлиқини оттуриға қойди. У йәнә америкадики меһригүл турсун қатарлиқ лагер шаһитлириниң гуваһлиқ баянатлириниму нәзәрдә тутқан һалда хитайниң лагердикиләргә қарита йеңичә қийин-қистақ әсваблирини синақ қиливатқанлиқ еһтималлиқиниму тәкитлиди.

Доктор һаҗи қутлуқ қадири хитай тәрәпниң шаһимәрданни қоюп бәргән чағда униң саламәтлик сәвәбидин қоюп берилгәнликини тилға алған болсиму, әмма кесәллик әһвалини ениқ билип туруп аилисигә билдүрмигәнликини вә шу арқилиқ шаһимәрданниң қийин-қистақта намәлум токлуқ әсвабларниң зәрбисидин меңисигә су чүшүп өлгәнликини йошурғанлиқини илгири сүрди.

Пикирләр (0)
Share
Толуқ бәт