Litwa xitayning sherqiy yawropada qurghan 17 +1 topidin chékinip chiqqan

Litwa tashqi ishlar ministirining “POLITICO” gézitige éytishiche, litwa xitayning sherqiy yawropadiki 17 +1 topidin chékinip chiqqan we mezkur topqa eza bashqa yawropa ittipaqi ellirinimu shundaq qilishqa dewet qilghan.

Litwa tashqi ishlar ministiri gabri'éli'us landsbérgis “POLITICO” gha yollighan élxétide: “Emeliy éhtiyaj tüpeyli litwaning xitayning 17 + 1 topidin chiqip ketken” likini éytqan.

Xewerge qarighanda landsbérgis, yawropa ittipaqidiki bashqa döletlernimu béyjingning bu teshebbusidin waz kéchishke chaqirghan. U mundaq dégen: “Bizning qarishimizche, hazir yawropa ittipaqining bölün'gen 16 + 1 endizisidin waz kéchip, téximu ittipaqlishidighan hemde téximu ünümlük 27 + 1 ge qarap siljiydighan peyt keldi. Eza döletlerning hemmisi yawropa ittipaqining bashqa organliri bilen birlikte heriket qilghandila, yawropa ittipaqi téximu küchiyidu.”

Xitayning yawropa elliri ittipaqidiki bayanatchisi litwa bu herikitidin xewersiz ikenlikini bildürgen.

Melum bolushiche, litwa bu herikiti xitay bilen yawropa ittipaqi munasiwetlirining künséri yamanlishiwatqanliqini namayan qilidiken.

Peyshenbe küni, yawropa parlaménti bélet tashlap, xitayning Uyghurlargha qaratqan basturush siyasiti seweblik yawropa ittipaqining xitay bilen bolghan meblegh sélish kélishimini tonglatqan.

Uningdin bashqa, litwa parlaménti 20-may xitay hökümitining Uyghurlargha qaratqan basturush siyasetlirining xaraktérini resmiy halda “Insaniyetke qarshi jinayet” we “Uyghur qirghinchiliqi” dep békitkenidi.