Лондондики хитай әлчиханиси алдида наразилиқ намайиши өткүзүлди

Ихтиярий мухбиримиз әркин тарим
2020-01-06
Елхәт
Пикир
Share
Принт
Әнглийә әмгәк партийәси қурған «уйғурларни қоллаш гурупписи» ниң уюштурған намайиштин көрүнүш. 2020-Йили 5-январ, лондон.
Әнглийә әмгәк партийәси қурған «уйғурларни қоллаш гурупписи» ниң уюштурған намайиштин көрүнүш. 2020-Йили 5-январ, лондон.
RFA/Erkin Tarim

Әнглийә әмгәк партийәси қурған «уйғурларни қоллаш гурупписи» ниң уюштуруши билән 1-айниң 5-күни кәч саәт алтидин йәттигичә хитайниң лондонда турушлуқ әлчиханиси алдида намайиш өткүзүлгән.

Үч айдин буян һәр айниң 5-күни өткүзүлүватқан намайишниң тунҗи қетимлиқиға аз санда киши қатнашқан. Әмма бу қетимқисиға уйғур, хитай, тибәт вә инглизлардин болуп, 200 әтрапида киши иштирак қилған. Улар қоллирида ай-юлтузлуқ көк байрақ вә лозункиларни көтүргән һалда «уйғурларға әркинлик, хитай җаза лагерлирини тақисун, хитайлар шәрқий түркистандин чиқип кәтсун, шәрқий түркистанға мустәқиллиқ» дегәндәк шоарларни товлашқан.

Бу һәқтә телефон зияритимизни қобул қилған әнглийәдики уйғур паалийәтчи, дуня уйғур қурултийиниң лондонда турушлуқ вәкили рәһимә мәхмут ханим 1-айниң 5-күни лондондики хитай әлчиханиси алдида өткүзүлгән намайиш тоғрисида мәлумат бәрди. У хитайға қарши тунҗи қетимлиқ намайишниң 9-айниң 5-күни 30 әтрапида кишиниң қатнишиши билән башланғанлиқини, бу қетимқи намайишқа болса 200 әтрапида кишиниң қатнашқанлиқини баян қилди.

5-январ күни лондондики хитай әлчиханиси алдида өткүзүлгән намайишқа твиттерда 90 миң әгәшкүчиси бар әнглийәдики даңлиқ кишилик һоқуқи қоғдиғучиси пәтәр татчел әпәндиму қатнашқан вә хитайни әйибләп сөзлигән. Рәһимә мәхмут ханим бу һәқтә бизгә тәпсилий мәлумат бәрди.

Мәзкур намайишта кишилик һоқуқи паалийәтчилири сөзлигәндин сирт рәһимә мәхмут ханимму сөзлигән. У сөзидә әнглийә хәлқини уйғурларға ярдәм қилишқа чақирған.

Мәлум болушичә, лондонда бурундин тартип хитайға наразилиқ билдүрүш паалийәтлири, болупму намайишлар изчил һалда өткүзүлүп келинмәктә. Лекин өткән йилиниң оттурилиридин тартип әнглийә парламентидиму бәзи паалийәтләр елип берилишқа башлиди. Болупму әнглийәниң әмгәк партийәси өткән йили 9-айда «уйғурларни қоллаш һәрикити» намида тәшкилат қуруп, һәр айниң 5-күни хитайға қарши наразилиқ намайиши өткүзүшни қарарлаштурған иди. Уйғур қәләмкәшләр җәмийитиниң баш катипи әзиз әйса әлкүн әпәнди бу һәқтә бизгә мәлумат бәрди.

Әзиз әйса әлкүн әпәнди әнглийәдә уйғурларни қоллайдиған партийәләр, аммиви тәшкилатлар, парламент әзалириниң саниниң күнсайин көпийиватқанлиқини, әнглийәниң җәнвәдики бирләшкән дөләтләр тәшкилатида уйғурларни қоллишиниң буниң бир мисали болалайдиғанлиқини тәкитләп өтти.

Әзиз әйса әлкүн әпәнди уйғур дәвасиниң әнглийәдә тез сүрәттә тонулуватқанлиқини, бундин кейин техиму яхши тонулушини үмид қилидиғанлиқини баян қилди.

Дуня уйғур қурултийиниң рәиси долқун әйса әпәнди 24-июл әнглийә парламентида уюштурулған «уйғурларниң диний вәзийити вә җаза лагерлири тоғрисида гуваһлиқ бериш йиғини» ға қатнашқан иди. Долқун әйса әпәндиниң билдүрүшичә, 24-июл күни әнглийә парламентида гуваһлиқ бериш йиғини уюштурулуш билән бир вақитта йәнә йиғин хатимисидә «барлиқ партийә вәкиллириниң аваз қошуши» билән «уйғур достлуқ гурупписи» қурулған икән.

Пикирләр (0)
Share
Толуқ бәт