Londondiki xitay elchixanisi aldida naraziliq namayishi ötküzüldi

Ixtiyariy muxbirimiz erkin tarim
2020-01-06
Élxet
Pikir
Share
Print
En'gliye emgek partiyesi qurghan "Uyghurlarni qollash guruppisi" ning uyushturghan namayishtin körünüsh. 2020-Yili 5-yanwar, london.
En'gliye emgek partiyesi qurghan "Uyghurlarni qollash guruppisi" ning uyushturghan namayishtin körünüsh. 2020-Yili 5-yanwar, london.
RFA/Erkin Tarim

En'gliye emgek partiyesi qurghan "Uyghurlarni qollash guruppisi" ning uyushturushi bilen 1-ayning 5-küni kech sa'et altidin yettigiche xitayning londonda turushluq elchixanisi aldida namayish ötküzülgen.

Üch aydin buyan her ayning 5-küni ötküzülüwatqan namayishning tunji qétimliqigha az sanda kishi qatnashqan. Emma bu qétimqisigha Uyghur, xitay, tibet we in'glizlardin bolup, 200 etrapida kishi ishtirak qilghan. Ular qollirida ay-yultuzluq kök bayraq we lozunkilarni kötürgen halda "Uyghurlargha erkinlik, xitay jaza lagérlirini taqisun, xitaylar sherqiy türkistandin chiqip ketsun, sherqiy türkistan'gha musteqilliq" dégendek sho'arlarni towlashqan.

Bu heqte téléfon ziyaritimizni qobul qilghan en'gliyediki Uyghur pa'aliyetchi, dunya Uyghur qurultiyining londonda turushluq wekili rehime mexmut xanim 1-ayning 5-küni londondiki xitay elchixanisi aldida ötküzülgen namayish toghrisida melumat berdi. U xitaygha qarshi tunji qétimliq namayishning 9-ayning 5-küni 30 etrapida kishining qatnishishi bilen bashlan'ghanliqini, bu qétimqi namayishqa bolsa 200 etrapida kishining qatnashqanliqini bayan qildi.

5-Yanwar küni londondiki xitay elchixanisi aldida ötküzülgen namayishqa twittérda 90 ming egeshküchisi bar en'gliyediki dangliq kishilik hoquqi qoghdighuchisi peter tatchél ependimu qatnashqan we xitayni eyiblep sözligen. Rehime mexmut xanim bu heqte bizge tepsiliy melumat berdi.

Mezkur namayishta kishilik hoquqi pa'aliyetchiliri sözligendin sirt rehime mexmut xanimmu sözligen. U sözide en'gliye xelqini Uyghurlargha yardem qilishqa chaqirghan.

Melum bolushiche, londonda burundin tartip xitaygha naraziliq bildürüsh pa'aliyetliri, bolupmu namayishlar izchil halda ötküzülüp kélinmekte. Lékin ötken yilining otturiliridin tartip en'gliye parlaméntidimu bezi pa'aliyetler élip bérilishqa bashlidi. Bolupmu en'gliyening emgek partiyesi ötken yili 9-ayda "Uyghurlarni qollash herikiti" namida teshkilat qurup, her ayning 5-küni xitaygha qarshi naraziliq namayishi ötküzüshni qararlashturghan idi. Uyghur qelemkeshler jem'iyitining bash katipi eziz eysa elkün ependi bu heqte bizge melumat berdi.

Eziz eysa elkün ependi en'gliyede Uyghurlarni qollaydighan partiyeler, ammiwi teshkilatlar, parlamént ezalirining sanining künsayin köpiyiwatqanliqini, en'gliyening jenwediki birleshken döletler teshkilatida Uyghurlarni qollishining buning bir misali bolalaydighanliqini tekitlep ötti.

Eziz eysa elkün ependi Uyghur dewasining en'gliyede téz sür'ette tonuluwatqanliqini, bundin kéyin téximu yaxshi tonulushini ümid qilidighanliqini bayan qildi.

Dunya Uyghur qurultiyining re'isi dolqun eysa ependi 24-iyul en'gliye parlaméntida uyushturulghan "Uyghurlarning diniy weziyiti we jaza lagérliri toghrisida guwahliq bérish yighini" gha qatnashqan idi. Dolqun eysa ependining bildürüshiche, 24-iyul küni en'gliye parlaméntida guwahliq bérish yighini uyushturulush bilen bir waqitta yene yighin xatimiside "Barliq partiye wekillirining awaz qoshushi" bilen "Uyghur dostluq guruppisi" qurulghan iken.

Toluq bet