Лондонда хитайға қарши намайиш өткүзүлди

Ихтиярий мухбиримиз әркин тарим
2020-08-31
Елхәт
Пикир
Share
Принт

28-Авғуст күни сабиқ тибәт аптоном райони коммунистик партийә секретари чен чүәнгониң уйғур райониниң коммунистик партийә секретарлиқиға тәйинлинип, униң уйғурлар үстидин елип барған бастурушлириниң 4 йиллиқи мунасивити билән әнглийә пайтәхти лондондики бирләшкән дөләтләр тәшкилати бинаси алдида, 30-авғуст күни «из-дерәксиз йоқ болуп кәткәнләр күни» мунасивити билән лондондики хитай әлчиханисиниң алдида хитайға қарши наразилиқ намайишлири өткүзүлди.

Буниңдин дәл 4 йил бурун, йәни 2016-йили 28-авғуст күни хитай мәркизий һөкүмити, тибәттики коммунист партийә баш секретари чен чүәнгони уйғур аптоном райониниң секретари қилип тәйинлигәниди. Бу төт йил җәрянида чен чүәнго башчилиқидики һөкүмәтниң көп санда кишини сәвәбсиз қолға елиши, кесиветиши вә җаза лагерлириға солиши һәм бу лагерларниң техигичә давам қилиши кишиләрниң қаттиқ наразилиқини қозғимақта.

Биз намайиш тоғрисида техиму тәпсилий мәлумат игиләш үчүн д у қ ниң лондондики ишханисиниң мәсули рәһимә мәхмут ханим билән телефон сөһбити елип бардуқ. У, б д т ниң лондондики ишханисиниң алдида тибәт, уйғур вә әнглийәликләр бирликтә намайиш өткүзүп, намайиш ахирида бирләшкән дөләтләр тәшкилати баш секретари антонио гутеррескә бир парчә хәт сунғанлиқини баян қилди.

Д у қ ниң лондон ишханиси билән тибәтләрниң лондондики тәшкилати билән бирликтә язған хәттә, уйғур вә тибәтләргә қарита елип бериливатқан ирқий қирғинчилиқ сияситидә ши җинпиң билән чен чүәнгониң мәсулийити барлиқи баян қилинғандин кейин, бирләшкән дөләтләр тәшкилатиниң буларни сотқа тартиши тәләп қилинған. Рәһимә мәхмут ханим бу һәқтә тохталди.

Арқидин 30-авғуст күни болса хитайниң лондондики әлчиханиси алдида намайиш өткүзүлди. Намайишни дуня уйғур қурултийи билән лондондики тибәт тәшкилати бирликтә уюштурған. Биз нәқ мәйданға телефон қилип намайиш тоғрисида мәлумат игилидуқ. Лондондики хитай әлчиханиси алдида өткүзүлгән намайишқа 80 әтрапида уйғур, тибәт вә әнглийә ишчилар партийәсиниң әзалири иштирак қилған болуп, улар бирдәк «уйғурларға әркинлик», «тибәтләргә әркинлик», «хитайлар зулумни тохтатсун», «хитайлар шәрқий түркистан билән тибәттин чиқип кәтсун», «җаза лагерлири тақалсун», «из-дерәксиз йоқ болуп кәткәнләр қәйәрдә?» дегәндәк шоарларни товлашқан.

Дуня уйғур қурултийиниң лондондики вәкили рәһимә мәхмут ханим бу намайишни әнглийәдики тибәт бирлики тәшкилати билән д у қ ниң бирликтә «из-дерәксиз йоқ болуп кәткәнләр күни» мунасивити билән уюштурғанлиқини, намайишниң тәсирлик өткәнликини тәкитлиди.

28- Вә 30-авғуст күнлири лондонда өткүзүлгән иккила намайишқа қатнашқан уйғур паалийәтчи маһирә әйса ханим бу иккила намайишқа уйғур, тибәт, хоңкоңлуқлар, җәнубий әзәрбәйҗанлиқлар вә түркләрниңму қатнашқанлиқини ейтти.

Әнглийә уйғур уюшмиси мәсуллиридин керәм қари лондонда әнглийә ишчилар партийәсиниң изчил һалда һәр айниң 5-күни уйғурлар үчүн намайиш өткүзүватқанлиқини, йәһудийлар вә башқа милләтләрниңму һәр һәптә уйғурлар үчүн намайиш өткүзүватқанлиқини, әмма әнглийәдики уйғурларниң көпиниң бу намайишларға қатнишиватқанлиқи, лекин уларниң буниңдин кейин техиму актип болуши керәкликини тәкитлиди.

Пикирләр (0)
Share
Толуқ бәт