Londonda xitaygha qarshi namayish ötküzüldi

Ixtiyariy muxbirimiz erkin tarim
2020-08-31
Élxet
Pikir
Share
Print

28-Awghust küni sabiq tibet aptonom rayoni kommunistik partiye sékrétari chén chüen'goning Uyghur rayonining kommunistik partiye sékrétarliqigha teyinlinip, uning Uyghurlar üstidin élip barghan basturushlirining 4 yilliqi munasiwiti bilen en'gliye paytexti londondiki birleshken döletler teshkilati binasi aldida, 30-awghust küni "Iz-déreksiz yoq bolup ketkenler küni" munasiwiti bilen londondiki xitay elchixanisining aldida xitaygha qarshi naraziliq namayishliri ötküzüldi.

Buningdin del 4 yil burun, yeni 2016-yili 28-awghust küni xitay merkiziy hökümiti, tibettiki kommunist partiye bash sékrétari chén chüen'goni Uyghur aptonom rayonining sékrétari qilip teyinligenidi. Bu töt yil jeryanida chén chüen'go bashchiliqidiki hökümetning köp sanda kishini sewebsiz qolgha élishi, késiwétishi we jaza lagérlirigha solishi hem bu lagérlarning téxigiche dawam qilishi kishilerning qattiq naraziliqini qozghimaqta.

Biz namayish toghrisida téximu tepsiliy melumat igilesh üchün d u q ning londondiki ishxanisining mes'uli rehime mexmut xanim bilen téléfon söhbiti élip barduq. U, b d t ning londondiki ishxanisining aldida tibet, Uyghur we en'gliyelikler birlikte namayish ötküzüp, namayish axirida birleshken döletler teshkilati bash sékrétari antoni'o gutérréske bir parche xet sun'ghanliqini bayan qildi.

D u q ning london ishxanisi bilen tibetlerning londondiki teshkilati bilen birlikte yazghan xette, Uyghur we tibetlerge qarita élip bériliwatqan irqiy qirghinchiliq siyasitide shi jinping bilen chén chüen'goning mes'uliyiti barliqi bayan qilin'ghandin kéyin, birleshken döletler teshkilatining bularni sotqa tartishi telep qilin'ghan. Rehime mexmut xanim bu heqte toxtaldi.

Arqidin 30-awghust küni bolsa xitayning londondiki elchixanisi aldida namayish ötküzüldi. Namayishni dunya Uyghur qurultiyi bilen londondiki tibet teshkilati birlikte uyushturghan. Biz neq meydan'gha téléfon qilip namayish toghrisida melumat igiliduq. Londondiki xitay elchixanisi aldida ötküzülgen namayishqa 80 etrapida Uyghur, tibet we en'gliye ishchilar partiyesining ezaliri ishtirak qilghan bolup, ular birdek "Uyghurlargha erkinlik", "Tibetlerge erkinlik", "Xitaylar zulumni toxtatsun", "Xitaylar sherqiy türkistan bilen tibettin chiqip ketsun", "Jaza lagérliri taqalsun", "Iz-déreksiz yoq bolup ketkenler qeyerde?" dégendek sho'arlarni towlashqan.

Dunya Uyghur qurultiyining londondiki wekili rehime mexmut xanim bu namayishni en'gliyediki tibet birliki teshkilati bilen d u q ning birlikte "Iz-déreksiz yoq bolup ketkenler küni" munasiwiti bilen uyushturghanliqini, namayishning tesirlik ötkenlikini tekitlidi.

28- We 30-awghust künliri londonda ötküzülgen ikkila namayishqa qatnashqan Uyghur pa'aliyetchi mahire eysa xanim bu ikkila namayishqa Uyghur, tibet, xongkongluqlar, jenubiy ezerbeyjanliqlar we türklerningmu qatnashqanliqini éytti.

En'gliye Uyghur uyushmisi mes'ulliridin kérem qari londonda en'gliye ishchilar partiyesining izchil halda her ayning 5-küni Uyghurlar üchün namayish ötküzüwatqanliqini, yehudiylar we bashqa milletlerningmu her hepte Uyghurlar üchün namayish ötküzüwatqanliqini, emma en'gliyediki Uyghurlarning köpining bu namayishlargha qatnishiwatqanliqi, lékin ularning buningdin kéyin téximu aktip bolushi kéreklikini tekitlidi.

Toluq bet