Los anjélistiki Uyghurlar kitab yermenkiside hésdashliq qozghidi

Muxbirimiz gülchéhre
2019-04-15
Élxet
Pikir
Share
Print
Jenubiy kaliforniye uniwérsitétida ötküzülgen kitab yermenkisige échilghan, "Uyghurlarni qutquzayli" dégen lozunka ésilghan bir botka. 2019-Yili 13-aprél, los anjélis.
Jenubiy kaliforniye uniwérsitétida ötküzülgen kitab yermenkisige échilghan, "Uyghurlarni qutquzayli" dégen lozunka ésilghan bir botka. 2019-Yili 13-aprél, los anjélis.
RFA/Gülchéhre

Amérikaning kaliforniye shtatida yashawatqan Uyghurlar, los anjélistek türlük xelq'araliq medeniy, ammiwi we ijtima'iy pa'aliyetler köplep ötküzülidighan bu alahide dangliq sheherning her türlük pursetlirini Uyghurlarning weziyitini anglitish meydanigha aylandurushqa qoldin kélishiche tirishchanliq körsitiwatqanliqi melum.

Los anjélista yashawatqan on nechche a'ililik Uyghurning özlükidin uyushup teyyarliq körüshi bilen, 13 we 14-féwral künliri los anjélis shehiridiki dangliq uniwérsitétlardin jenubiy kaliforniye uniwérsitétida ötküzülgen kitab yermenkisige "Uyghurlarni qutquzayli" dégen lozunka ésilghan bir botka échilghan. Botkigha Uyghurche neshr qilin'ghan kitablardin bashqa yene Uyghurlarning medeniyetlirining örnekliri süpitide, her xil qol-hünerwenchilik buyumliri, chalghu eswablarning modélliri qatarliqlarmu qoyulghan bolup, bular yermenkige qatnashturulghan bashqa nechche yüzligen kitab botkiliridin bekrek közge chéliqip, sayahetchilerni özige jelp qilghan.

Mezkur kitab yermenkiside Uyghurlarni tonushturushta türtkilik rol oynighuchilardin 20 nechche yildin buyan los anjélis shehiride yashawatqan nurnisa qurban xanimning éytishiche gerche özining yilda bir ötküzülidighan bu chong kitab yermenkisige da'im qatniship kéliwatqan bolsimu, bu nöwet Uyghurlarningmu tunji qétim bu yermenkidin orun élishi iken.

Nurnisa xanim yene, wetinide uruq-tughqanliri xitay hökümiti teripidin lagérlargha qamalghan Uyghurlar her xil shekillerde pa'aliyetlerge aktip qatniship, dunyaning diqqitini xitay hökümitining Uyghurlar wetinide insaniyetke qarshi élip bériwatqan jinayetlirige qaritish we ularning yardimige érishish yollirini izdewatqanliqi, bu yermenkiningmu del shundaq meqsette élip-bérilghanliqi shundaqla özliri kütkendek inkaslargha érishkenlikini bildürdi. Uning qeyt qilishiche, bu kitab yermenkisige 100 mingdin 150 mingghiche adem qatnashqanliqi mölcherlenmektiken. Uyghurlar yermenkige qatnashquchilargha özliri teyyarlighan Uyghurlar we lagérlar heqqidiki teshwiqat waraqlirini tarqatqan.

Bu yermenkige qatniship, ziyaretchilerge Uyghurlar weziyitini tonushturushta aktip xizmet qilghanlar peqet Uyghurlarla bolup qalmastin, belki yene ularning amérikiliq dostlirimu ulargha xalis yardemde bolghan. Hepte axiridiki dem élish künlirini Uyghurlar üchün hésdashliq qozghash pa'aliyetliri üchün serp qilghanliqidin memnunluqini bildürgen, bir amérikiliq xanimdin néme sewebtin bu kitab yermenkiside Uyghurlargha yardem qilghanliqini sorighinimizda, u semimiylik bilen "Men Uyghur dostlurumni söyümen, Uyghurlarni söyimen" dep sözini bashlidi.

Bu xanim yene "Uyghurlar bunche éghir zulumgha uchrawatqan peytte, ular méhri-shepqet we yardemge eng mohtaj waqtida ulargha qolumdin kélishiche yardem qilish méning burchum, herbir insanning burchi. Yermenke jeryanida epsuski nurghun adem Uyghurlarni tunji qétim anglawatqanliqini bildürdi, démek yenimu keng anglitish kérek, méningche meyli kichik bolsun, chong bolsun her qandaq pa'aliyet soruni bir purset. Her qandaq bir pa'aliyetke qatnishish bir netije. Biz Uyghurlar uchrawatqan bu paji'eni, mesilining jiddiy we éghirliqini toxtimay anglitishimiz kérek" dédi.

Uyghurlargha hésdashliq qozghash pa'aliyitige qatnashqan bu xanim yene etraptiki Uyghur dostlirining, öz a'ilisi xitay hökümitining tehditi astida turghan shara'ittimu, ularning imkanining yétishiche zulumgha qarshi heriket qiliwatqanliqidek pidakarliqidin tesirlen'genliki we ilham alghanliqini, ulargha cheksiz hörmet we qayil ikenlikini bildürdi.

Toluq bet