Qaramayliq xanim: “8-Dékabir ot paji'esi” de oqutquchi amine dawut öz mes'uliyitini ada qildi

1994-Yili 12-ayning 8-küni qaramay sheherlik dostluq kinoxanisida yüz bergen ot apitide qaza qilghan oqughuchilarning ata-anisining yigha-zari.

Dostluq kinoxanisining ot apitidin kéyinki körünüshi. 1994-Yili dékabir, qaramay.

“8-Dékabir qaramay ot apiti” Uyghur rayonining yéqinqi zaman tarixidiki eng paji'elik ot apiti bolup, amine dawut xanim shu apette qaza qilghan oqutquchilarning biri.

Amine dawut bolsa qaramay sheherlik 2-ottura mektepning oqutquchisi, 4 balining anisi. U, xizmettiki estayidilliqi we mes'uliyetchanliqi bilen köp qétim mektep we qaramay sheherlik ma'arip idarisi teripidin “Munewwer oqutquchi” bolup mukapatlan'ghan.

-1989Yildin bashlap qaramay sheherlik 2-ottura mektepte “Tejribe sinip” sinip tesis qilinip, bashlan'ghuch sinipqa 7 yashliq ösmürler qobul qilinidu hemde shu sinipqa mektepning teklipi bilen amine dawut sinip mes'uli bolidu.

1994-Yili 8-dékabir, qaramay sheherlik dostluq kinoxanisida ma'arip xizmet yighini échilidu. Qaramay shehiridiki 7 toluq ottura, 8 bashlan'ghuch mekteptin bolup jem'iy 796 oqutquchi-oqughuchi we ürümchidin kelgen bir qisim kadirlar qatarida amine mu'ellimmu sinipidiki 20 artuq oqughuchisi bilen yighin'gha qatnishidu.
Biz aldi bilen qaramay sheherlik 2-ottura mektepke téléfon qilip, ehwal igileshke tirishqan bolsaqmu, téléfonni qobul qilidighan adem chiqmidi.

Biz yene shu weqe yüz bergen waqitta 2-ottura mektep toluq yilliqida oquwatqan qaramayliq xanim arqiliq amine dawut mu'ellimning 4neper oqughuchisini qutuldurush yolida hayatidin ayrilghan paji'eni igileshke tirishtuq.

Ziyaritimizni qobul qilghan qaramayliq xanim, özining eyni chaghda mektepte we jem'iyettin anglighanlirini eslep ötti.

Uning éytishiche, kulubqa ot ketkendin kéyin, amine mu'ellim oqughuchilirini tarqaqlashturup, özi bille kulubtin sirtqa chiqip kétidu, emma oqughuchilarning sani alghanda alimjan abduxaliq, adiljan, pirdun qurban, mensur ablet qatarliq 4 neper oqughuchisining yoqluqini bilgendin kiyin, bashqa oqughuchilarni derhal bixeter orun'gha tarqaqlishishini tapilap, özi yene külüp ichige oqughuchilirini izdep kirip kétidu.

Shu esnada kulubning ishiki tokluq yögelme ishik bolghachqa, ot sewebidin tok üzülgende özlükidin chüshüp kétip étilip qalidu. U chaghda ichidin otning qoyuq isi chiqip, amine mu'ellim 4neper oqughuchisi bilen birlikte is élip hayatidin ayrilidu.

Biz qaramaydiki ot apitide hayatidin ayrilghan Uyghurlarning uruq -tughqanlirini ziyaret qilip, shu waqittiki ehwalni hemde hazirqi oylighanlirini igileshke tirishqan bolsaqmu, emma weqege 21yildin ashqan bolghachqa neq meydanda bar bolghanlarni yaki ularning a'ile tawabi'atlirini ziyaret qilishqa imkanimiz bolmidi.