Uyghur yashlirini terbiyilesh kursi bügün bashlandi

Uyghur yashlirini démokratiye, kishilik hoquq, qanuniy bilimler bilen terbiyilesh kursidin körünüsh. 2017-Yili 29-mart, biryussél.

Bélgiye paytexti biryusséldiki Uyghur yashlirini démokratiye, kishilik hoquq, qanuniy bilimler bilen terbiyilesh kursi bügün resmiy bashlandi.

Melum bolghinidek, dunyaning her yéridin kelgen 50 neper Uyghur yashliri 29-mart yawropa parlaméntida ötküzülgen “Uyghurlarning étiqad we sayahet erkinlikining cheklinishi” namliq yighin'gha qatnashqan idi. Bügün 30-mart sa'et 9:00 da Uyghur yashlirini terbiyilesh kursi d u q yashlar komitétining re'isi gheyur qurban ependining chéchilish nutqi bilen bashlandi. Yighin'gha qatnashquchilar aldi bilen sherqiy türkistan istiqlal marshigha hörmet bildürdi.

Bügünki bu yighinda tunji bolup oksford uniwérsitétining tetqiqatchisi fi'ona xanim bu kurisqa qedem teshrip qilghan yashlar arisida ray sinash pa'aliyiti élip bardi. Sa'et9din 30 minut ötkende bashlan'ghan bu pa'aliyette “Sherqiy türkistanning istiqbaligha qandaq qaraysiz?”, “Bu nöwet yawropa parlaméntida ötküzülgen Uyghurlarning étiqad we sayahet erkinlikining cheklinishi namliq yighindin razi boldingizmu?” dégendek so'allar otturigha qoyuldi. Uyghur yashliri oz wetinining kelgüsige ümid bilen qaraydighanliqini bes-beste tekitleshti.

Fi'ona xanimning ray sinash pa'aliyiti axirlashqandin kéyin, sa'et 10:00 din bashlap kishilik hoquq mutexessisi pirré hégay ependi “Kishilik hoquq we b d t ning xizmet méxanizmni” dégen témida 3 sa'et ders ötti. Bu derste b d t kishilik hoquq kéngishi we uning terkibidiki türlük komitétlarning xizmet usuli, b d t gha sunulidighan doklatlarni hazirlashning 6 türlük qa'ide-prinsipliri tepsiliy chüshendürüldi. Derstin kéyin Uyghur yashlirini neq meydanda praktikigha uyushturup, sherqiy türkistan mesilisini b d t gha anglitish üchün 30 minut ichide sinaq doklat hazirlatquzdi.

Chüshtin kéyin sa'et 14:00 da, wakaletsiz milletler teshkilati (UNPO) xadimi lusiya parrochi xanim Uyghurlar mesilisini yawropa parlaméntida anglitishning usul-chariliri toghrisida ders ötti. U sözide, xitay zulumi seweblik künséri éghir weziyetke duch kéliwatqan Uyghurlar mesilisini yawropa parlaméntida anglitish hem xitaygha bésim bolidighan ünümlük qararlar aldurush üchün bésip ötüshke tégishlik qedem basquchlarni tepsiliy chüshendürdi.

Sa'et 15:00-18:00 da amistérdam uniwérsitétining proféssori charlotte hille “Xelq'ara qanun we öz teqdirini özi belgilesh” témisida 3 sa'et ders ötti.

Bügünki bu kursta Uyghur yashliri ötülgen derslerni nahayiti zor qiziqish ichide anglidi. Chüshenmigen mesililirini sorap bildi. Kurs ariliqidiki aram élish waqtida, her bir dölettin kelgen Uyghur yashliri özlirini tonushturup ötti we oz wetini, milliti üchün bejanidil xizmet qilish iradilirini bildürüshti.

Biz bügünki kurs xatimiside, bu pa'aliyetke qatnashqan herqaysi ellerdin kelgen Uyghur yashlirini ziyaret qilip, ularning kurstin hasil qilghan tesiratlirini bilishke térishtuq. Amérikidin kelgen tetqiqatchi zubeyre xanimmu özining bu pa'aliyet heqqidiki qarashlirini otturigha qoydi.

31-Mart ötküzülidighan d u q ning Uyghur yashlirini démokratiye, kishilik hoquq, qanuniy bilimler bilen terbiyilesh kursida yene bir qisim mutexessisler ders sözleydiken.