Amérika démokratiyini ilgiri sürüsh fondi Uyghur yash aktiplargha maharet östürüsh we dostluq ornitish pursiti yaritip berdi

Dunya Uyghur qurultiyi yashlar komitéti re'isi gheyur qurban muxbirimizning ziyaritini qobul qilmaqta. 2015-Yili 7-may, washin'gton.

D u q ning 10-nöwetlik yash Uyghur aktiplirini terbiyilesh kursi ikkinchi künige qedem qoydi, oxshimighan döletlerdin washin'gton'gha yighilghan 50 etrapida Uyghur yash aktipliri bügün washin'gton'gha jaylashqan amérika démokratiyini ilgiri sürüsh fondining binasida, “Uyghur birlikining simwoli”, “Amérika dölet mejliside dawa élip bérish qedem basquchliri we taktikiliri”, “Uyghur kishilik hoquq mesililirini anglitishning taktika we istratégiyiliri”, “Tibetlerning dawa yolidiki tejribiliri” dégendek témilarda nezeriyiwi bilimlerni munazirilishish, so'al sorash, teqlidi praktikilarni élip bérish qatarliq janliq shekillerde ögendi.

Ziyaritimizni qobul qilghan yash kursantlar, mezkur kursning, amérika we xelq'araliq teshkilatlarning xizmet sistémiliri qurulmisi bilen tonushush we ular bilen ish élip bérip yollirini igilesh hemde pa'aliyet qabiliyitini östürüshte qimmetlik purset bolupla qalmay, dunyaning her qaysi jayliridiki oxshash ghayidiki yashlarning dostluq ornitishida bir köwrük bolghanliqini bildürdi.

Uyghur yash aktipliri bügün, dunya Uyghur qurultiyining yéngi bir nöwetlik yash aktiplirini terbiyilesh kursining muweppeqiyetlik échilishigha yardemde boluwatqan amérika démokratiyini ilgiri sürüsh fondining xizmet binasida Uyghur dawasining kesiplishishide zörür bolghan démokratiye, kishilik hoquq hemde xelq'ara qanunlar qatarliq asasiy bilimler boyiche terbiyilinish derslirini almaqta.

Kursqa qatnashqan yash aktiplar, amérikida yashawatqan Uyghur yashlardin bashqa, kanada, türkiye, gérmaniye, norwégiye, awstraliye, qazaqistan qatarliq ellerdin kelgen 17 yashtin 25 yash etrapidiki qiz oghullardin teshkil tapti.

Bu xelq'ara miqyasida Uyghur dawasini élip bériwatqan yashlarning, rehberlik we xizmet qabiliyitini yuqiri kötürüshni meqset qilghan mezkur kursning bügünki birinchi dersi “Bostanliq kimlikliri: xitayning yipek yolidiki Uyghur milletchiliki” namliq kitabning aptori, doktor justin rudelson ependining “Uyghur ömlükining simwoli” témidiki derslikidin bashlandi, uningda Uyghurlar tarixtin buyan qurghan impériye we döletlerning Uyghurlarning ömlükige simwol bolalaydighanliqi körsitildi. U yene Uyghur ejdadliri qurghan impératorluqlirining xen sulalisi bilen parallél dewrlerge toghra kélidighanliqini sherhlep ötti.

Kursantlar yene amérikida pa'aliyet élip bériwatqan adwokat nuri türkel hemde amérika Uyghur birleshmisi re'isi alim séytoflarning yéteklishi bilen amérika dölet mejlisining her qaysi komitétlarning qurulmisi we amérika hökümitining xizmet tertipliri qatarliqlar heqqide chongqur tonushqa ige qilindi we qiziqarliq teqlidiy praktikilarni élip bardi.

Amérikida shundaqla özi turushluq ellerdiki hökümetlerde, Uyghur weziyiti we mesililirini anglitishning istratigiyeliri üstide öz pikirlirini otturigha qoyushti. Bügünki kurs etigen sa'et 8 yérimdin chüshtin kéyin 6 giche dawam qildi. Biz teneppus ariliqida bir qanche kursantlarni ziyaret qilip ularning mezkur kurstin alghan tesiratlirini soriduq.

Dunya Uyghur qurultiyining bu nöwetlik yash aktiplarni terbiyilesh kursini teshkillesh orunlashturush xizmetliride aktip rol oynawatqan dunya Uyghur qurultiyi yashlar komitétining re'isi gheyur qurban ependi ziyaritimizni qobul qilip, yash aktiplarning yétilishide Uyghur milliy herikitige qatnishishqa bolghan hewes we bügünkidek asasiy bilimlerge ige bolushtin tejribilerdin bashqa yene pa'aliyetni izchil élip bérishqa bolghan psixika teyyarliqning muhim orunda turidighanliqini tekitlidi.

Kursantlarning pa'aliyet programmiliri amérika démokratiyini ilgiri sürüsh fondining xizmet binasida yene bir kün dawam qilidu.