Uyghur mektepliridiki ten jazasi we ata-anilarning endishisi (2)

Muxbirimiz eziz
2016.03.28
Share on WhatsApp
Share on WhatsApp
balilarni-urush-ten-jazasi.jpg Uyghur rayonidiki melum mektepte oqutquchining oqughuchilarni uruwatqan körünüshi.
Social Media

Féysbok we ündidar qatarliq ijtima'iy taratqular arqiliq melum bolghan uchurlargha qarighanda Uyghurlar diyaridiki bir qisim bashlan'ghuch we ottura mekteplerde oqutquchilarning oqughuchilargha ten jazasi qollinish hadisisi mewjut bolmaqta. Biz ziyaret jeryanida sözleshken bir qisim Uyghur ata-anilarmu bu ehwallarning mewjutluqini hemde özlirining bu heqtiki endishilirini ipadilidi.

Uyghurlar diyaridiki melum ottura mektepning ilmiy mudiri öz mektipide léntigha élinip qalghan oqutquchining oqughuchilarni urghan sin körünüshining rastliqini étirap qilghandin kéyin, Uyghurlar diyaridiki bashlan'ghuch we ottura mekteplerde oxshimighan derijide mewjut boluwatqan oqughuchilargha ten jazasi bérish we uninggha alaqidar mesililer heqqide biz mektep sirtidiki bir qisim kishilerni ziyaret qilduq. Bu heqte ziyaritimizni qobul qilghan bir qisim ata-anilar we ma'aripchilar özlirining shexsi pikirlirini otturigha qoydi, shundaqla telim-terbiyidiki usulning muhimliqini alahide tekitlidi.

Bu heqte Uyghur ma'aripchisi abduweli ayub pikir bayan qilip ötti. U özining ötkenki tejribilirige asasen terbiye usulidiki tayaq arqiliq telim bérishning usul jehettiki xataliqini körsitish bilen birge, buning, hazirqi xitay jem'iyitidiki mesililerni zorluq küchi arqiliq hel qilish xahishining éghirlap kétiwatqanliqining ma'arip sahesidiki bir türlük ipadisi, dep qaraydighanliqini bildürdi.

Ziyaret jeryanida qeshqerdin ziyaritimizni qobul qilghan hajigül xanim öz perzentining mekteptiki ehwaligha birleshtürüp, özining a'ile muhitida mewjut bolmighan balilarni urush qilmishining mekteplerde mewjut bolushigha süküt qilalmaydighanliqini bildürdi. Uning qarishiche, terbiye usuli arqiliq mesilini chüshendürüsh tamamen mumkin iken.

Ghulja shehiridiki élyas ependi gerche ma'arip saheside xizmet qilmighan bolsimu, özining hajigül xanimgha oxshash pikirde ikenlikini bildürdi. Uning qarishiche, mekteplerdiki ten jazasini cheklesh nizamliri bu mesilini ünümlük hel qilalmighan.

Axirida abduweli ayub Uyghur jem'iyitidiki a'ililerdimu mewjut boluwatqan ata-anilarning balilargha qol tegküzüsh hadisisini mekteplerdiki oqutquchilarning oqughuchilarni urushi bilen sélishturushqa bolmaydighanliqini éytti. Uning qarishiche, “Anisi tepken mozayning jéni aghrimas” dégendek oqughuchilar ata-anisining tayiqini untup kételigen bilen, oqutquchisining urghinini asanliqche yadidin chiqiralmaydiken. Shunga bir qisim oqutquchilarning “Men yaxshi niyette oqughuchilarni urdum” dep özlirini aqlishini qobul qilghili bolmaydiken.

Ziyaret jeryanida Uyghur mektepliride bir qisim oqutquchilarning bu xildiki oqughuchilargha jismaniy jehettin qol tegküzüsh qilmishidin bashqa yene atalmish “Qosh til” sinipliridiki oqughuchilarning ghururini depsende qilish xahishiningmu belgilik salmaqni igileydighanliqi melum bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.