Mal doxturi qurban raxmanning lagérda qiyin-qistaqtin ölgenliki ilgiri sürülmekte

Muxbirimiz shöhret hoshur
2019-08-27
Élxet
Pikir
Share
Print
Xitay Uyghur rayonida qurghan yighiwélish lagérlirining bir. 2019-Yili 2-iyun, atush.
Xitay Uyghur rayonida qurghan yighiwélish lagérlirining bir. 2019-Yili 2-iyun, atush.
AFP

Kuchaliq muhajirlardin biri ötken hepte radiyomizgha uchur yollap, kucha ishxila yéziliq mal doxturxanisining xadimi qurban raxmanning mushu ayning béshida lagérda ölgenlikini melum qildi. Igilinishiche, da'iriler qurban raxmanning jesitini a'ilisige qayturghanda uning xiro'éndin zeherlen'genlikini éytqan. A'ile ezaliri bu izahatqa heyran bolup, ölüm sewebini éniqraq bilmekchi bolghinida saqchilar tehdit sélish arqiliq ularning éghizini tuwaqlighan. Muxbirimizning téléfonini qobul qilghan saqchi xadimi ishxala mal doxturxanisidin ikki kishining lagérgha ekétilgenliki, buning birining qurban raxman ikenlikini delillidi. Emma u qurban raxmanning ölüm uchuri heqqide melumat bérelmidi.

Kuchaliq muhajirning inkas qilishiche, bu yil 35 yash chamisidiki mal doxturi qurban raxman ötken yili mushu mezgilde xizmet orni bolghan ishxila yéziliq mal doxturxanisidin béshigha qara xalta kiydürülüp élip kétilgen we aridin bir yil ötkende a'ilisige jesiti qayturulghan. Téléfonimizni qobul qilghan kuchadiki bir saqchi xadimi ishxi'ala mal doxturxanisidin ikki kishining lagérgha ekétilgenliki, bulardin birining abdurusul tursun, yene birining bolsa qurban raxman ikenlikini delillidi. Inkasta déyilishiche, qurban raxman ish ornidin ekétilgendin kéyin awwal kucha nahiyelik qamaqxanida 3 hepte tutup turulghan, andin yangaqliq bagh dégen jaydiki "Terbiyelesh merkizi" ge yötkelgen. Mezkur saqchi xadimi qurban raxmanning qamaqxanidin j x idarisining yénidiki "3‏-Terbiyelesh merkizi" ge yötkelgenlikini delillidi.

Inkasta déyilishiche, qurban raxmanning a'ile ezaliri saqchilardin uning ölüm sewebini sorighinida saqchilar uning xiro'éndin zeherlen'genlikini éytqan we xiro'énni qachan we qeyerde chekkenliki heqqide chüshendürüsh bermigen. A'ile ezaliri bu sewebke heyran qalghanliqini bildürginide saqchilar bu seweb heqqide tekrar so'al sorimasliq, sorashqa toghra kelse özlirimu "Terbiyelesh" ke bérishqa teyyarliq qilip qoyush heqqide agahlandurghan.

Inkaschi muhajir qurban raxmanning 1‏-awghust yéza igilik uniwérsitétining charwichiliq kespini püttürgenliki, uning aq tamaka chékishtek bir aditining bolmighanliqini ilgiri sürdi. Emma mezkur saqchi xadimi qurban raxmanning ölüm sewebini sorighinimizda uning 10 yil burun aq tamaka chekkenliki heqqide jinayet xatirisi barliqini éytti. Biz uningdin qurban raxmanning aq tamakini eng yéqinda qachan we qeyerde chekkenlikini sorighinimizda bu so'algha alaqidar rehberlerdin jawab élishimizni tewsiye qildi. Qurban raxmanning özining aliy mekteptiki sawaqdishi ikenlikini bayan qilghan mezkur inkaschi yurttiki tonush-bilishliridin anglighanlirigha asasen, qurban raxmanning tordin atalmish "Bölgünchilik" mezmunidiki léksiye anglighanliqi üchün lagérgha ekétilgenlikini eskertti. Mezkur saqchi xadimi qurban raxmanning tutulushidiki bu sewebnimu inkar qilmidi. Inkasta qurban raxmanning xizmetdashlirining "Diniy esebiylik" alametlirini pash qilishqa qistalghanliqi we u buni ret qilghanliqi üchün qéyin-qistaqqa élin'ghanliqi, qurban raxmanning qéyin-qistaqtin ölgenlik éhtimalliqi otturigha qoyulghan. Mezkur saqchi xadimi qurban raxmanning qiyin-qistaqta ölgenlik éhtimalliqi heqqide éghiz échishni keskin türde ret qildi we bu heqte alaqidar rehberler bilen sözlishishimiz kéreklikini tekitlidi.

Ishxi'ala yézisidiki bir ahalining bayanliridin qurban raxmanning ikki perzenti barliqi, ayaliningmu özi tutulup 3 aydin kéyin lagérgha ekétilgenliki melum. Emma uning ölümidin ayalining xewiri bar-yoqluqi we érining yüzini köreligen yaki körelmigenliki hazirche melum emes.

Toluq bet