Marko rubiyo “Uyghur mejburiy emgikining aldini élish qanuni” ni qayta tonushturghan

Muxbirimiz memetjan jüme
2021.01.31
Share on WhatsApp
Share on WhatsApp
Marko rubiyo “Uyghur mejburiy emgikining aldini élish qanuni” ni qayta tonushturghan Amérika kéngesh palata ezasi marko rubiyo.
Social Media

Bu hepte amérika kéngesh palata ezasi marko rubiyo kéngesh palata ezasi jéf mérkléy bilen birliship “Uyghur mejburiy emgikining aldini élish qanuni” ni qayta tonushturghan.

“Florida küdilik géziti” ning 29-yanwar xewer qilishiche, rubiyoning ishxanisi mezkur qanun layihesini: “Uyghurlarni mejburiy emgekke sélish arqiliq yasalghan mehsulatlarning amérikigha kirmeslikige kapaletlik” qilidighanliqini bildürgen.

Kéngesh palata ezasi marko rubiyo mundaq dégen: “Xitay kommunistik partiyesi Uyghur we bashqa musulman az sanliq milletlerge, bolupmu irqiy qirghinchiliq we insaniyetke qarshi jinayetlerni öz ichige alghan kishilik hoquq depsendichiliklirini sadir qiliwatqan bolghachqa, buni körmeslikke sélishqa bashqa bahane yoq. Biz uning ornigha pütün küchimiz bilen ularni toxtitishimiz kérek”

Mérkléy mundaq dégen: “Köp yillardin buyan, xitay hökümiti shinjangda irqiy qirghinchiliq qilip, Uyghur we bashqa musulmanlarni asas qilghan bashqa az sanliq milletlerni özlirining diniy we medeniyet aditidin waz kechküzüsh üchün, ularni qiynash, türmige solash, mejburiy emgek we bésimgha duchar qildi”

U yene: “Mejburiy emgek bilen ishlepchiqirilghan tawarlarning amérikigha import qilinishini cheklesh arqiliq irqiy qirghinchiliqqa shérik bolmasliqimizgha kapaletlik qilish we bu wehshiylikni sadir qilghuchilarni jawabkarliqqa tartishqa toluq wede bérishimiz kérek,” dégen.

Mezkur qanun layihesini yene arizona shtatining jumhuriyetchiler partiyesidin bolghan wekili jon buzmenmu qollighan bolup, u 29-yanwar öz torbétide élan qilghan bayanatida: “Xitay kompartiyesining Uyghur we bashqa musulman az sanliq milletlerge qaratqan kishilik hoquq depsendichilikige choqum xatime bérilishi kérek. Amérikining diniy az sanliq milletlirini qoghdash we ulargha yardem bérish mejburiyiti bar. Bu qanun layihisi xitay kompartiyesining qebih qilmishliri üchün uni jawabkarliqqa tartishimiz yolidiki tunji qedem.”

Mezkur qanun layihesini marku rubiyo bilen palata ezasi jéf mérkliy hemkarliship tonushturghan bolup, nöwette awam palatasidiki her ikki partiyening ortaq qollishigha érishken we qollaydighan palata ezalirining sani 27 neperdin ashqan.

“Uyghur mejburiy emgikining aldini élish qanuni” marko rubiyo bilen amérika awam palata ezasi jim makgowérnning hemkarliqida ötken yili bir qétim tonushturulghan idi. Melum bolushiche, bu nöwet qaytidin tonushturulghan yéngi layihe bu hepte awam palatasi tashqi munasiwetler komitétigha yollan'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.